بەلگياداعى جوعارۋ وقى ورىندارىنىڭ ءبىرىنىڭ ستۋدەنتى وسىمەن ءتورت جىل ەشقانداي كۋرسقا بارماي-اق، ءوز بەتىنشە قازاق ءتىلىن وقىپ ۇيرەنىپ ءجۇر.
جاس جىگىت بۇل ىستە ايتارلىقتاي جەتىستىككە جەتكەن. بۇگىندە ول قازاقتارمەن ەمىن-ەركىن سويلەسە الادى.
ستەين رومبوۋت بەلگياداعى KU Leuven ۋنيۆەرسيتەتىنىڭ ءۇشىنشى كۋرسىندا وقيدى. ول 2018 جىلى اناسىمەن بىرگە قازاقستاننىڭ وڭتۇستىگىنە تۋريست رەتىندە بارىپ قايتقان. جەرگىلىكتى تۇرعىنداردىڭ قوناقجايلىعىنا ءتانتى بولعان بەلگيالىق قازاق ءتىلىن ءوز بەتىمەن وقىپ ۇيرەنەمىن دەگەن ماقسات قويادى. قازاقشاسىنىڭ دەڭگەيى ازىرگە ويداعىداي ەمەس. دەگەنمەن جاس جىگىت ونى جەتىك مەڭگەرە الاتىنىنا سەنىمدى. «بولاشاقتا قازاقستانعا تاعى دا ساپار شەكسەم»، – دەيدى.
«مەن باسىندا YouTube جەلىسى ارقىلى قازاقشا ۇيرەندىم، ءبىراق تەك قاراپايىم سوزدەردى ۇيرەندىم. ءبىراق سودان كەيىن مەن قازاقشا جاقسىراق بىلگىم كەلدى. سوندىقتان مەن قازاق ءتىلىنىڭ وقۋلىعىن قولداندىم. كىتاپتىڭ اتى – «Colloquial Kazakh»، اعىلشىن تىلدە جازىلعان، ءبىراق قازاق گرامماتيكاسىن وتە جاقسى تۇسىندىرەدى. ءبىراق ءبىر كىتاپ جەتكىلىكسىز، تەك گرامماتيكانى عانا مەڭگەرىپ قويماي، جاتتىعۋلار ورىنداۋ دا وتە ماڭىزدى. سوندىقتان مەن ونلاين قازاقتارمەن سويلەستىم. وسىلايشا، مەن قازاق ءتىلىمدى جاقسارتا الدىم»، - دەيدى «KU Leuven» ۋنيۆەرسيتەتىنىڭ ستۋدەنتى ستەين رومبوۋت.
ستەين جاڭا سوزدەردى تەز جاتتاۋ ءۇشىن ۇيالى تەلەفونىندا ارنايى سوزدىك قۇرعان. بۇگىندە وندا قازاقشا 2،5 مىڭعا جۋىق ءسوز بار. ستەين: «قازاقستاندا كەمى ءبىر جىل تۇرسام»، – دەيدى. ويتكەنى جىلدىڭ ءتورت مەزگىلىن دە تاماشالاعىسى كەلەتىن كورىنەدى.
«قازاقستانعا بارۋ – بۇل مەنىڭ تانداۋىم. ويتكەنى مىنا جەردە كوپ ادام يسپانياعا، يتالياعا بارعىسى كەلەدى، ءبىراق مەن كوبىسى بىلە بەرمەيتىن ەلگە بارعىم كەلەدى»، - دەيدى «KU Leuven» ۋنيۆەرسيتەتىنىڭ ستۋدەنتى ستەين رومبوۋت.
ستەين ۋاقىتتى بوسقا وتكىزبەي، اۋدارماشى نە اعىلشىن ءتىلىنىڭ ءمۇعالىمى سەكىلدى پايدالى ىسپەن دە اينالىسۋدى ارماندايدى.