ۆاكسينا قانشا تۇرادى؟
ەكپە الۋدان قاشپاڭىز، ول – ىندەتتى جەڭۋدىڭ جالعىز جولى!
ق ر دەنساۋلىق ساقتاۋ ءمينيسترى الەكسەي سويدىڭ مالىمدەۋىنشە، وتكەن ايلارمەن سالىستىرعاندا، ىندەت جۇقتىرعانداردىڭ سانى ەكى ەسە قىسقارعان. الماتى بويىنشا كورسەتكىش تە ءدال وسىنداي. رەسپۋبليكا دەڭگەيىندە ءولىم-جىتىم كورسەتكىشى 2 اپتانىڭ ىشىندە 1،6 ەسە تومەندەگەن. وڭىرلەردەگى ەپيدەميولوگيالىق احۋالدىڭ جاقسارۋىنا بايلانىستى اۋرۋحانالاردا ەم الىپ جاتقان ناۋقاستاردىڭ سانى ازايعان. بۇل كورسەتكىشتەرگە كوروناۆيرۋسقا قارسى سالىنعان ەكپەنىڭ دە ەداۋىر اسەرى بارىن ايتىپ وتىر ماماندار.
قازاقستان حالقىن ۆاكسينالاۋ ءۇشىن مەملەكەت بيۋدجەتىنەن 50 ملرد تەڭگە ءبولىنىپ وتىر
ەلىمىزدە كۇن سايىن شامامەن 80–100 مىڭ ادامعا ەكپە ەگىلەدى. وڭىرلەردە ۆاكسينا تاپشىلىعى جوق. دەگەنمەن حالىق اراسىندا كوروناۆيرۋسقا قارسى ەكپەگە ءالى دە قىرىن قارايتىندار از ەمەس. ال بىلتىردان بەرى جەر-جاھاندى ءبىر تارىنىڭ قاۋىزىنا سىيعىزىپ، ابىگەرگە سالىپ تۇرعان COVID-19 ادام نە ەل، نە جەر تاڭداپ جاتپايدى، جولىنداعى كەزىككەندى جايپاپ وتەدى. سوندىقتان وعان توسقاۋىل قويۋ ءۇشىن ۆاكسينا الۋ كەرەك. ول ءۇشىن مەملەكەت قالاعان ەكپەڭىزدى سۋ تەگىن ۇسىنىپ وتىر. جالپى، قازاقستان حالقىن ۆاكسينالاۋ ءۇشىن مەملەكەت بيۋدجەتىنەن 50 ملرد. تەڭگە بولىنگەن.
ەڭ العاش ەلىمىزگە بيىلعى 31 قاڭتاردا رەسەيلىك «سپۋتنيك V» ۆاكسيناسىنىڭ 22 مىڭ دوزاسى جەتكىزىلگەن بولاتىن. ونىڭ ءبىر دوزاسىنىڭ قۇنى 11 مىڭ تەڭگەدەن اينالعان. رەسەي كەيىن پرەپارات كولەمىنىڭ كوپتەپ وندىرىلۋىنە بايلانىستى جانە ونەركاسىپتىك ءوندىرىستىڭ تەحنولوگياسىن وڭتايلاندىرۋ ەسە بىنەن ونىڭ قۇنىن ءتۇسىردى. بۇگىندە اتالعان ەكپەنىڭ ەكى دوزاسى قوسىمشا اقىسىز 5 مىڭعا تومەندەدى.
ءتول ۆاكسينامىزدى جاساپ شىعارۋ ءۇشىن ەل قازىناسىنان 2،5 ملرد. تەڭگە جۇمسالدى
ال بيىلعى مامىردا ءوزىمىزدىڭ وتاندىق عالىمدار «QazCovid-in» ۆاكسيناسىن جاساپ شىعاردى. پرەپاراتتىڭ ءبىر دوزاسى 4،7 دوللار (قوسىمشا اقىسىز 2132 تەڭگە) كولەمىندە بولدى. ءتول ۆاكسينامىزدى جاساپ شىعارۋ ءۇشىن ەل قازىناسىنان 2،5 ملرد. تەڭگە جۇمسالدى.
الماتى تۇرعىندارىن تەگىن ۆاكسينالاۋ ءۇشىن بۇگىندە جەرگىلىكتى بيلىك وكىلدەرىنىڭ ۇسىنىسىن قولداي كەتكەن كاسىپكەرلەر قىرۋار قاراجات تۇراتىن ساۋدا ورىندارىن دا حالىق يگىلىگى ءۇشىن تەگىن بەرسىن، اۋرۋحانا، ەمحانا عيماراتتارىنان بولەك، ءىرى ساۋدا-ويىن-ساۋىق ورتالىقتارىنان، ساۋدا ۇيلەرى مەن بازارلاردان، ءتىپتى، مادەنيەت وشاقتارىنان دا ارنايى ورىندار ءبولىپ، ەكپە ەگۋ پۋنكتتەرىن اشتى. ماقسات – حالىققا تەگىن ۆاكسينانى الۋ ءۇشىن قولايلى جاعداي جاساۋ. سونىمەن، شاھاردا باس-اياعى 211 ەكپە ەگۋ پۋنكتى جۇمىس ىستەپ تۇر. وعان قوسا، قۇرامىندا كاسىبي ماماندار بار كوشپەلى ءموبيلدى بريگادالار ەل ارالاپ ءجۇر. ولار تۇرعىندارعا قولايلى ورىندارعا بارىپ ەكپە سالىپ بەرەدى.
وكىنىشكە وراي، ءبىز مەملەكەت جاساپ بەرىپ وتىرعان وسىناۋ مۇمكىندىكتەردى پايدالانباي وتىرعانىمىز جاسىرىن ەمەس. ءالى دە الەۋمەتتىك جەلىلەردە جەلدەي ەسىپ جۇرگەن رەسمي ەمەس جالعان اقپاراتتارعا كوبىرەك سەنىپ وتىرمىز. بوس سوزدەردى تەرمەلەپ جۇرگەندە كوزگە كورىنبەيتىن ۆيرۋس بىلتىرعىداي تاعى دا باس كوتەرتپەي جۇرمەسە يگى. ال قازىرگى تاڭدا كوروناۆيرۋسقا قارسى ەكپەگە قول جەتكىزە الماي قىناداي قىرىلىپ جاتقان نەمەسە وزدەرى وندىرۋگە قاۋقارسىز مەملەكەتتەر دە بار.
ۆاكسينادان ەمەس، ۆيرۋستان قورقۋ كەرەك
وتكەن اپتادا تاراعان دەرەك كوزدەرىنە سۇيەنسەك، بيىلدىققا الەم بويىنشا كوروناۆيرۋستان 1 ميلليون 880 مىڭنان استام ادام كوز جۇمعان. جارتى جىلداعى ادام ءولىمى بىلتىرعى كورسەتكىشتەن اسىپ تۇسكەن. ءقازىر ۆاكسينالاۋ قارقىندى ءجۇرىپ جاتقان باتىس ەلدەرىندە ەپيدەميولوگيالىق احۋال تۇراقتالا باستاعانىمەن، افريكا، لاتىن امەريكاسى مەن ازيانىڭ كەيبىر مەملەكەتتەرىندە ءقاۋىپ قايتا كۇشەيگەن. ءۇندىستاندا «الفا» جانە «دەلتا» شتامدارى تاراپ كەتتى. بۇل بريتاندىق جانە ءۇندى دەپ ايتىلىپ كەلگەن شتامداردىڭ رەسمي اتاۋى. اسىرەسە، العاش رەت ءۇندىستاندا انىقتالعان ۆيرۋستىڭ «دەلتا» ءتۇرى مامانداردى قاتتى الاڭداتىپ وتىر.
تەز تارالاتىن بۇل شتامم جاستارعا دا اۋىر تيەدى. سوڭعى اپتالاردا وڭتۇستىك افريكا رەسپۋبليكاسى، ۋگاندا، ناميبيا، برازيليا، پەرۋ ەلدەرىندە اۋرۋدى جۇقتىرۋ دەرەگى جيىلەپ كەتكەن. بۇل ەكپە الۋ بويىنشا باي مەن كەدەي ەلدەردىڭ اراسىنداعى الشاقتىقتى كورسەتەدى. ماسەلەن، افريكادا حالىقتىڭ تەك 2%-ى، ال ازيادا 6%-دان استامى ەكپەنىڭ ءبىرىنشى دوزاسىن سالدىرعان. دۇنيەجۇزىلىك دەنساۋلىق ساقتاۋ ۇيىمىنىڭ ماماندارى كوروناۆيرۋستىڭ «دەلتا» شتامى ەۋروپادا تارالىپ، حالىقتى قىسپاققا الۋى مۇمكىن دەپ ەسكەرتۋدەن جالىعار ەمەس.
بۇگىندە ەلىمىزدە كوروناۆيرۋسقا قارسى ۆاكسينانىڭ 4 ءتۇرى قولجەتىمدى: وتاندىق «QazVac»، سوسىن «سپۋتنيك V»، «Hayat Vax SARS-CoV-2 Vero Cell» جانە «كوروناۆاك».
17 ماۋسىمداعى دەرەككە سۇيەنەر بولساق، الماتى قالاسى بويىنشا ءبىر تاۋلىك ىشىندە 5 802 ادام ۆاكسينا الدى. 1 اقپان – 16 ماۋسىم ارالىعىندا قالا بويىنشا بارلىعى 357 299 ادام ۆاكسينا العان. ۆاكسينا العانداردىڭ جالپى سانىنان 60 جاستان اسقان قارت كىسىلەر 41 117 ادامدى قۇرايدى. قالا بويىنشا ۆاكسينانىڭ قالدىعى – ءبىرىنشى كومپونەنتتىڭ 80 251 دوزاسى جانە ەكىنشى كومپونەنتتىڭ 101 691 دوزاسى بار. ۆاكسينادان ەمەس، ۆيرۋستان قورقۋ كەرەك. ەكپە الۋدان قاشپاڭىز. ول - ىندەتتى جەڭۋدىڭ بىردەن-بىر جالعىز جولى.