قازاقستاندا وقۋشىلار كەڭەيتىلگەن تەگىن مەديسينالىق تەكسەرۋدەن 6، 10، 12، 14، 15، 16 جانە 17 جاستاردا وتەدى.
بۇل تۋرالى الماتى قالالىق №11 ەمحانا ديرەكتورىنىڭ بالالىق شاق جونىندەگى ورىنباسارى الماش اردابايەۆا ايتتى، دەپ حابارلايدى Almaty-ashamy.kz قازاقپاراتقا سىلتەمە جاساپ.
مەكتەپتەگى مەديسينالىق تەكسەرۋ - جىل سايىن وتكىزىلەتىن ءىس-شارا، ونى وتكىزۋ ۋاقىتىن مەديسينالىق ۇيىم بەلگىلەيدى جانە ونى مەكتەپ اۋماعىندا العاشقى مەديسينالىق جەدەل جاردەمنىڭ اۋماقتىق ۇيىمىنىڭ ماماندارى جۇرگىزەدى.
دارىگەردىڭ ايتۋىنشا، مەكتەپ وقۋشىلارىنىڭ پروفيلاكتيكالىق مەديسينالىق تەكسەرۋدەن وتكەنى دۇرىس. سەبەبى، ولاردا بۇل كەزەڭدە گورمونالدى جانە فيزيكالىق جاعدايدىڭ بەلسەندى وزگەرىستەرى بولادى. تەكسەرۋ مەديسينالىق كومەكتىڭ كەپىلدىك بەرىلگەن كولەمى شەڭبەرىندە تەگىن جۇرگىزىلەدى.
كەڭەيتىلگەن مەديسينالىق تەكسەرۋدەن ءوتۋ 6، 10، 12، 14، 15، 16 جانە 17 جاستاردا قاراستىرىلعان.
«مەكتەپتە مەديسينالىق تەكسەرۋ بالالاردىڭ دەنساۋلىعىن باقىلاۋ، ءقاۋىپتى اۋىتقۋ مەن اۋرۋلاردىڭ ەرتە كورىنىسىن انىقتاۋ ءۇشىن جۇرگىزىلەدى. بالالاردا، اسىرەسە جاسوسپىرىمدەردە بۇل وتە ماڭىزدى. گورموندار ويناي باستاعاندا، جەتىلمەگەن دەنەدە كۇتپەگەن جەردەن اقاۋلار پايدا بولۋى مۇمكىن. ال وقۋدىڭ ءوزى اۋىر جانە ۇلكەن سترەسس. سيمپتومداردى باقىلاۋ جانە بالاعا ۋاقىتىندا كومەكتەسۋ - ونى بولاشاقتا دەنساۋلىققا بايلانىستى كۇردەلى ماسەلەلەردەن ارىلتادى»، - دەيدى دارىگەر.
الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، العاشقى الدىن الا مەديسينالىق تەكسەرۋ ءبىرىنشى سىنىپقا تۇسكەن كەزدە جۇرگىزىلەدى، ول تۇرعىلىقتى جەرى بويىنشا ەمحانادا جۇرگىزىلەدى. ارى قاراي وقۋشىلار ءار وقۋ جىلىنىڭ باسىندا تەكسەرىلەدى. پروفيلاكتيكالىق مەديسينالىق تەكسەرۋ مامانداردىڭ تەكسەرۋىن جانە مەديسينالىق اقپاراتتىق جۇيەدە (ماج) پروفيلاكتيكالىق مەديسينالىق قاراپ-تەكسەرۋدەن وتكەنى تۋرالى دەرەكتى تولتىرۋدى كوزدەيدى.
جاسوسپىرىمدەرگە وتپەلى كەزەڭدە (6، 10، 14، 15، 16 جانە 17 جاستا) تەرەڭدەتىلگەن (كەڭەيتىلگەن) پروفيلاكتيكالىق تەكسەرۋ جۇرگىزىلەدى. 7، 8، 9، 11، 13 جاس ارالىعىنداعى بالالاردى پەدياتر نەمەسە جالپى تاجىريبە دارىگەرى مەن ءتىس دارىگەرى تەكسەرەدى.
«مىسالى، 13 جاستان باستاپ پسيحوتروپتىق، ەسىرتكى زاتتارىنىڭ مەديسينالىق ەمەس قولدانىلۋىنا نەمەسە بولماۋىنا تەكسەرۋ جۇرگىزىلەدى، 10 جاستان اسقان قىزداردى تەكسەرۋ كەزىندە گينەكولوگيالىق انامنەزگە، شاعىمعا، ەتەككىر فۋنكسياسىنىڭ بۇزىلۋىنا ەرەكشە نازار اۋدارىلادى. 12 جاستان اسقان بالالاردى تەكسەرۋ كەزىندە شاش ءوسۋ تۇرىنە (ەركەك نەمەسە ايەل تۇرىنە) نازار اۋدارادى. كورسەتىلىم بولعان جاعدايدا قىزدار بالالار گينەكولوگىنا جىبەرىلەدى. 9-دان 10 جاسقا دەيىنگى بالالاردا ابستراكتىلى-لوگيكالىق وپەراسيالاردىڭ، لوگيكالىق پايىمداۋدىڭ جانە ت. ب. قالىپتاسۋى قوسىمشا باعالانادى. پاتولوگيالىق وزگەرىستەر انىقتالعان كەزدە مەكتەپتىڭ مەديسينا قىزمەتكەرى بالانى تىركەلگەن جەرى بويىنشا ەمحاناعا بەيىندى مامانعا قوسىمشا تەكسەرۋگە جىبەرەدى»، - دەپ حابارلادى الماتى قالالىق قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتى.
ايتا كەتەيىك، بارلىق مەديسينالىق اقپاراتتار مەديسينالىق قۇپيا بولىپ تابىلادى. وعان تەك اتا-انا مەن ءجاسوسپىرىمنىڭ ءوزى 15 جاستان باستاپ قول جەتكىزە الادى.