قازاقستاندىقتاردى تەگىن حابارلاندىرۋ سايتتارىنداعى الاياقتار تۋرالى ەسكەرتۋدە، دەپ حابارلايدى aqshamnews.kz.
Stopfake.kz الاياقتاردى تانىپ، ولاردىڭ ايلاسىنا قالاي تۇسپەۋگە بولادى جانە بانكتەر ولار يەمدەنىپ كەتكەن قارجىنى قايتارۋعا كومەكتەسە مە دەگەن سۇراقتارعا جاۋاپ بەرگەن.
بۇل سحەما قالاي جۇمىس ىستەيدى؟
الاياقتار تەگىن حابارلاندىرۋ سايتتارىندا ءوز قىزمەتتەرىن نەمەسە تاۋارىن جارنامالايدى. ولار كەز كەلگەن نارسەنى «ساتادى»: كونسەرتكە بيلەتتەر، كومپيۋتەرلەر، جيھازدار. باعاسى بارىنشا تارتىمدى بولادى – تومەن بولسا دا، كۇدىك تۋعىزباۋ ءۇشىن نارىقتىق باعا شەگىندە. «ساتىپ الۋشى» بايلانىسقا شىققاننان كەيىن، الاياقتار ودان Telegram نەمەسە WhatsApp مەسسەندجەرىنە ءوتۋدى سۇرايدى. وسىدان كەيىن تاۋاردى ساتىپ العىسى كەلەتىندەر كوپ، ونى باسقاعا ساتپاۋ ءۇشىن الدىن الا تولەم جاساۋدى وتىنەدى. «ساتىپ الۋشى» اقشا اۋدارعاننان كەيىن، الاياقتار حات-حاباردى ءوشىرىپ، بايلانىسقا شىقپاي قويادى.
ساتۋشى قۇجاتتارىنىڭ سۋرەتىن جىبەردى – وعان سەنۋگە بولا ما؟
جوق. بۇگىندە زاماناۋي گرافيكالىق رەداكتورلارمەن قۇجاتتاردىڭ ادامدى سەندىرە الاتىن «كوشىرمەسىن» جاساۋ،ا بولادى. ونىڭ ۇستىنە، قۇجاتتىڭ ءتۇپنۇسقالىعىن جاي سۋرەت ارقىلى تەكسەرۋ مۇمكىن ەمەس.
ساتۋشى تاۋارلاردىڭ سۋرەتى مەن ۆيدەوسىن جىبەردى. وعان سەنۋگە بولا ما؟
فوتوسۋرەت تە، ۆيدەو دا ءسىزدى الداپ جاتپاعانىنا كەپىل بولا المايدى. سۋرەتتى كورىپ، بىردەن اقشا اۋدارماعان ءجون.
ساتۋشى الدىن الا تولەم سۇرامايدى، ءبىراق ساتىپ العان نارسەمدى جەتكىزەتىن كۋرەردىڭ قىزمەتىنە تولەپ قويعانىمدى قالايدى. بۇل دا الاياقتىق پا؟
بۇل دا الاياقتىق بولۋى مۇمكىن. ەگەر كۋرەردىڭ قىزمەتى قاجەت بولسا، وندا جۇرگىزۋشىنىڭ وزىنە تولەۋگە نەمەسە تاۋاردى كۋرەرمەن جەتكىزۋ قىزمەتىن ۇسىناتىن كەز كەلگەن تاكسي اگرەگاتورىن پايدالانۋعا بولادى.
تەگىن جارناما سايتتارىن الاياقتارعا الدانىپ قالماي قالاي پايدالانۋعا بولادى؟
قاۋىپسىزدىك ماقساتىندا كوزبەن كورمەگەن تاۋار ءۇشىن اقشا اۋدارماڭىز.
تاۋاردى تاڭداعاندا ساتۋشىنىڭ ىس-ارەكەتىن باقىلاڭىز. مىنا جايتتار كۇمان تۋدىرۋى كەرەك:
– شەشىم قابىلداۋعا مۇمكىندىك بەرمەي، تاۋاردى ساتىپ الۋعا اسىقتىرسا؛
– تاۋاردى ساتىپ العىسى كەلەتىندەر كوپ دەپ دۇرلىكتىرسە؛
– ساتۋشى الدىن الا تولەم جاساۋدى سۇراسا: كەپىل نەمەسە جەتكىزۋ قىزمەتى ءۇشىن تولەم رەتىندە.
مەن الاياقتارعا اقشا اۋدارىپ قويدىم. بانك مەنىڭ اۋدارىمىمدى كەرى قايتارىپ، اقشامدى بەرە الا ما؟
ەگەر اقشانى ءوزىڭىز اۋدارساڭىز، ونى الۋشىنىڭ كەلىسىمىنسىز قايتارۋ مۇمكىن ەمەس. بۇعان «تولەمدەر جانە تولەم جۇيەلەرى تۋرالى» ق ر زاڭىمەن تىيىم سالىنعان.
بانك ءوزىم سويلەسۋ ءۇشىن ماعان اقشانى الۋشىنىڭ دەرەكتەرىن بەرە الا ما؟
جوق. بانكتىك شوتتار، وپەراسيالار جانە كليەنتتەر تۋرالى مالىمەتتەر بانكتىك قۇپيا بولىپ تابىلادى. «بانكتەر جانە بانك قىزمەتى تۋرالى» ق ر زاڭىنىڭ 50-بابىنا سايكەس بانك اقشا اۋدارىمىن الۋشى تۋرالى دەرەكتەردى سوتتىڭ نەمەسە باسقا ۋاكىلەتتى ورگانداردىڭ سۇراۋى بويىنشا عانا ۇسىنادى.
مەنى الاياقتار الداپ كەتسە نە ىستەۋىم كەرەك؟
ءبىرىنشى كەزەكتە، قۇقىق قورعاۋ ورگاندارىنا ارىز جازۋ كەرەك. ءتارتىپ ساقشىلارى ناقتى ءسىزدىڭ جاعدايىڭىزدا ودان ءارى قالاي ارەكەت ەتۋ كەرەك ەكەنىن ايتادى.
سونداي-اق بۇل تۋرالى بانككە حابارلاڭىز. بانك ىشكى تەرگەۋ جۇرگىزىپ، زاڭعا سايكەس اقشانى الۋشىعا قاتىستى شارالار قابىلدايدى، سونداي-اق سىزگە، باسقا كليەنتتەرگە وسى الاياقتاردىڭ ارەكەتىنەن زارداپ شەكپەۋى ءۇشىن كومەكتەسۋگە تىرىسادى.
وسى سۇراقتارعا بەرىلگەن جاۋاپتارعا قاراپ، الاياقتاردىڭ سحەمالارى كۇردەلى ەمەس ەكەنىن بايقايمىز. قاراپايىم ەرەجەلەردى ساقتاپ، ساق بولساڭىز، الاياقتاردى تانۋ قيىن بولمايدى.
«Kaspi.kz الاياقتارعا قارسى» ناۋقانى اياسىندا تەگىن حابارلاندىرۋ سايتتارىنداعى الاياقتىق تۋرالى جاڭا ۆيدەو شىقتى. الاياقتاردىڭ قالاي ارەكەت ەتەتىنىن كورىڭىز.
ەستەرىڭىزگە سالا كەتەيىك، Kaspi.kz قارجى نارىعىن رەتتەۋ جانە دامىتۋ اگەنتتىگىنىڭ قولداۋىمەن ەڭ كوپ تارالعان الاياقتىق سحەمالارى تۋرالى اعارتۋشىلىق باعىتتاعى ءبىرقاتار بەينەروليكتەر ءتۇسىردى. جاڭا بەينەروليكتەر ەكى اپتا سايىن Kaspi.kzء-تىڭ رەسمي YouTube ارناسىندا جاريالانادى.