2025 جىلعى 20 مامىردا الماتى قالاسى ناۋرىزباي اۋدانىنداعى «وقۋشىلاردىڭ يننوۆاسيالىق شىعارماشىلىق ورتالىعىندا» قازاقستان رەسپۋبليكاسى وقۋ-اعارتۋ مينيسترلىگىنىڭ جوسپارىنا جانە الماتى قالاسى ءبىلىم باسقارماسىنىڭ مەملەكەتتىك تاپسىرىسىنا سايكەس «تەاتردىڭ عاجايىپ الەمى» اتتى رەسپۋبليكالىق تەاتر ونەرى فەستيۆال-بايقاۋىنىڭ قالالىق كەزەڭى ءوتتى.
بيىل بۇل شىعارماشىلىق دودانىڭ سەگىزىنشى رەت وتكىزىلۋى – ونىڭ تۇراقتى داستۇرگە اينالىپ، وسكەلەڭ ۇرپاق ءۇشىن ماڭىزىن ارتتىرا تۇسكەنىن كورسەتەدى.
اتالعان تەاتر فەستيۆالى — جاس تالانتتاردىڭ شىعارماشىلىق الەۋەتىن تانىتىپ قانا قويماي، كورەرمەن جۇرەگىنە جول تاپقان ەرەكشە مادەني وقيعا بولدى. تەاتر — ساحناداعى شىنايىلىق پەن جان ايقايىنىڭ ونەرى. ال ونى مەكتەپ وقۋشىلارىنىڭ جۇرەكپەن جەتكىزۋى — شىن مانىندە ماقتاۋعا تۇرارلىق.
قالالىق كەزەڭگە الماتىنىڭ سەگىز اۋدانىنان ىرىكتەۋدەن وتكەن 17 ۇزدىك تەاتر ۇجىمى قاتىستى. ولار: №79، №15، №91، №181، №104، №6، №125، №145، №143، №87، №43، №53، №19، №206، №176، №162، №198 مەكتەپتەر. قاتىسۋشىلاردىڭ جاسى 8 بەن 17 جاس ارالىعىندا. بايقاۋ ءتورت باعىت بويىنشا ءوتتى: درامالىق سپەكتاكل، مۋزىكالىق سپەكتاكل، ادەبي-مۋزىكالىق كومپوزيسيا جانە قۋىرشاق تەاترى.
قازىلار القاسىنىڭ قۇرامىنا تەاتر سالاسىنىڭ كاسىبي وكىلدەرى – ق ر ەڭبەك سىڭىرگەن قايراتكەرى جومارت زەينابىل، «دارىن» مەملەكەتتىك جاستار سىيلىعىنىڭ يەگەرى ەلدار وتاربايەۆ، كينو جانە تەاتر اكتەرى ولجاس ساق، رەجيسسەر، سەناريست مۇراتجان شومبالوۆ جانە ورتالىق ديرەكتورى اينۇر داۋلبايەۆا ەندى.
بيىلعى تەاتر فەستيۆالى – جاس تالانتتاردىڭ شىعارماشىلىعىن، ساحنالىق شەبەرلىگىن پاش ەتكەن اسەرلى ونەر مەرەكەسىنە اينالدى. قويىلىمداردىڭ ءارقايسىسى وزىندىك ايتارى، مازمۇنى، كوركەمدىك ەرەكشەلىگىمەن دارالانىپ، كورەرمەنگە سان ءتۇرلى ەموسيا مەن وي قالدىردى.
فەستيۆال شىمىلدىعىن اشقان №198 مەكتەپ-گيمنازياسىنىڭ «ساحنا Like» تەاترى «بولماعان بالالىق شاق» قويىلىمى ارقىلى كورەرمەندى تەرەڭ سەزىمگە بولەدى. اقبەرەن ەلگەزەكتىڭ شىعارماسىنا نەگىزدەلگەن بۇل سپەكتاكلدە وقۋشىلاردىڭ ساحنا ءتىلى مەن سەزىمىن جەتكىزۋ شەبەرلىگى ايقىن كورىندى. اقوش ءرولىن سومداعان وقۋشىنىڭ اكەگە ارنالعان مونولوگى – كورەرمەن كوز جاسىن تىيا الماعان ساتتەردىڭ ءبىرى بولدى.
سوعىس تاقىرىبىنا ەرەكشە دەن قويعان ۇجىمداردىڭ ءبىرى – №87 جالپى ءبىلىم بەرەتىن مەكتەپتىڭ «روستوك» تەاترى. «دەتي، ۆوينا…» قويىلىمى ارقىلى ولار جۇرەك تەبىرەنتەرلىك مونولوگتارمەن، مايدان حاتتارىنان ۇزىندىلەرمەن كورەرمەننىڭ جانىن تەربەدى. №162 مەكتەپ-گيمنازياسىنىڭ «جاسىن» تەاتر ۇجىمى «ءبىز سوعىستى كورگەن جوقپىز» قويىلىمى ارقىلى تاريحي جادى مەن قازىرگى ۇرپاق ساناسىنىڭ بايلانىسىن كورسەتە ءبىلدى. اسىرەسە باس كەيىپكەردىڭ رولىندە ويناپ، اۆتور ءسوزىن جەتكىزگەن وقۋشىنىڭ داۋىس ىرعاعى، اكتەرلىك شەبەرلىگى، ساحناداعى ەركىن قوزعالىسى مەن شىنايى ەموسياسى – تولىققاندى كاسىبي سپەكتاكل دەڭگەيىندە اسەر قالدىردى.
سايىن مۇراتبەكتىڭ «جۋسان ءيىسى» اڭگىمەسى ەكى تەاتر ۇجىمى – №176 مەكتەپ-گيمنازياسىنىڭ «THEAR» جانە №181 جالپى ءبىلىم بەرەتىن مەكتەپتىڭ «جاس ساحنا» تەاتر ۇجىمىمەن ساحنالانىپ، ءارقايسىسى ءوز ەرەكشەلىگىمەن كورىندى. «THEAR» تەاتر ۇجىمىنىڭ تازالىق پەن ساعىنىشقا تولى قويىلىمدا ساحنالىق كيىم، دەكوراسيا، مۋزىكا مەن ساحنا ءتىلى ءبىر-بىرىن تولىقتىرىپ، كوركەم تۇتاستىق جاسالدى. بۇل قويىلىم – ۇيلەسىمدىلىكتىڭ ۇلگىسى بولسا، «جاس ساحنا» تەاتر ۇجىمى ايان بەينەسى ارقىلى بالالىقتىڭ اڭعالدىعى مەن ساعىنىشىن نازىك سۋرەتتەدى.
ال №104 مەكتەپتىڭ «جاس ساحنا» تەاترى وتباسىلىق ماسەلەگە تەرەڭ ۇڭىلگەن «ءبىر ءتۇپ الما اعاشى» قويىلىمىمەن اۋىر تاقىرىپتى سەنىمدى كوتەرىپ، بالالاردىڭ اكتەرلىك شەبەرلىگىمەن ءتانتى ەتتى.
فەستيۆالگە ليريكالىق ءھام تراگەديالىق باعىتتاعى قويىلىمدارمەن قاتار، پوەتيكالىق جانە پلاستيكالىق فورمالارداعى ىزدەنىستەر دە ەندى. ماسەلەن، №145 مەكتەپ-گيمنازياسىنىڭ «فارابي» تەاتر ۇجىمى «اققۋلار ۇيىقتاعاندا» پوەتيكالىق قويىلىمىندا نازىكتىك پەن انالىق مەيىرىمدى وبرازدىق تۇرعىدان جەتكىزىپ، اققۋلاردىڭ اق كوستيۋمدەرى مەن انا رولىندەگى وقۋشىنىڭ ساحنالىق شەبەرلىگى ارقىلى قويىلىم كوركەمدىگىن ارتتىرسا، №206 مەكتەپ-گيمنازياسىنىڭ «باعىم» تەاترى «كوك ءبورى» پلاستيكالىق دراماسى ارقىلى ءبيدىڭ تىلىمەن ۇلتتىق رۋحتى وياتتى.
بالالار ەرتەگى قويىلىمدارى ارقىلى دا كورەرمەننىڭ كوڭىلىن جاۋلاپ، ساحنادا وزدەرىن ەركىن ۇستاۋمەن ەرەكشەلەندى. №79 مەكتەپ-گيمنازياسىنىڭ «بايتەرەك» تەاترى مۋزىكالىق ەرتەگى ارقىلى كوركەم كوستيۋمدەرى مەن ۇيلەسىمدىلىگىمەن ەستە قالسا، №125 مەكتەپتىڭ «سۆەتلياچوك» تەاتر ۇجىمى بالالاردى ەرتەگى الەمىنە جەتەلەدى. ال №43 مەكتەپ-ليسەيىنىڭ «الاقاي» تەاتر ۇجىمى قۋىرشاق تەاترى جانرىنا سەرپىن بەرىپ، ساحنالىق تەحنيكانى ۇتىمدى پايدالاندى.
فەستيۆالدە قىز تاربيەسى، اتا-انانىڭ ءۇمىتى مەن بالانىڭ مەيىرىمى سەكىلدى الەۋمەتتىك ماسەلەلەر دە كوتەرىلدى. №19 مەكتەپتىڭ «ءححى عاسىر» تەاتر ۇجىمىنىڭ «كۋرورت» سپەكتاكلى – وسى تاقىرىپتى شىنايى جەتكىزگەن مازمۇندى قويىلىمداردىڭ ءبىرى بولدى. جاس اكتەرلەر ءومىردىڭ شىندىعىن ساحناعا الىپ شىعا ءبىلدى.
دراماتۋرگيالىق تەرەڭدىك پەن ستيليستيكالىق ىزدەنىستى №15 مەكتەپ-گيمنازياسىنىڭ «ليسەدەي» تەاتر ۇجىمى «دەمون ونەگينا» قويىلىمى ارقىلى كورسەتتى. جاندى داۋىس، پلاستيكالىق بي، ءستيلدى كوستيۋمدەر – قويىلىم كوركەمدىگىن كۇشەيتتى. دەمون رولىندەگى وقۋشىنىڭ پسيحولوگيالىق تەرەڭدىگى مەن ەموسيونالدىق شەبەرلىگى ەرەكشە باعالاندى. بۇل قويىلىم تراگەديا جانرىنا ءتان اۋىرلىق پەن كوركەمدىكتى قاتار الىپ شىقتى.
ال №91 مەكتەپتىڭ «ماڭگىلىك جاستار» تەاتر ۇجىمى روزا مۇقانوۆانىڭ «ماڭگىلىك بالا بەينە» شىعارماسى ارقىلى سەمەي پوليگونىنداعى جارىلىس تراگەدياسى مەن بالالىق ارماننىڭ توعىسقان تۇسىن جۇرەكپەن جەتكىزدى. ءلايلانىڭ ايعا مۇڭىن شاعاتىن مونولوگى – كورەرمەننىڭ جۇرەگىن قوزعاعان ساحنالىق شەشىمدەردىڭ ءبىرى بولدى.
الەۋمەتتىك-پسيحولوگيالىق تاقىرىپتى №53 مەكتەپ-گيمنازياسىنىڭ «شامشىراق» تەاتر ۇجىمى ۇسىندى. «شەتەلگە ساتىلعان قازاق بالاسى» دراماسى ارقىلى شەتەلدىك وتباسى اسىراپ العان قازاق بالاسىنىڭ ءومىر جولى مەن كۇردەلى تاعدىرى تۋرالى باياندايتىن بۇل قويىلىم تەرەڭ الەۋمەتتىك ماسەلەلەردى قوزعادى. بالالار تاعدىرى، ۇلتتىق تامىرىنان اجىراۋ، ىشكى كۇيزەلىستەر كورەرمەننىڭ جۇرەگىنە جەتىپ، ءار جاندى ويلاندىردى.
№143 مەكتەپ-ليسەيىنىڭ «شامشىراق» تەاتر ۇجىمى دۋلات يسابەكوۆتىڭ «اپكە» شىعارماسى ارقىلى نازىك سەزىم مەن جان دۇنيەنىڭ تەرەڭ يىرىمدەرىن كورسەتتى. اسىرەسە قاماجاي رولىندەگى وقۋشىنىڭ ساحنادا ءوزىن ەركىن ۇستاۋى مەن تابيعي تارتىمدىلىعى، مىنەزدىڭ نازىكتىگىن كورسەتۋى قويىلىمنىڭ اسەرلى شىعۋىنا سەپ بولدى. جاس اكتريسا ساحنادا وتە كوركەم كورىندى. ال №6 مەكتەپ-گيمنازياسىنىڭ «GAUDEAMUS» تەاتر ۇجىمى «ۆوينا ي ليۋبوۆ» قويىلىمى ارقىلى سوعىس پەن ماحابباتتى اللەگوريالىق بەينەلەر ارقىلى جەتكىزدى. بۇل قويىلىم ۇلى جەڭىستىڭ 80 جىلدىعىنا ارنالعان. بالالار ساحنا ءتىلىن تولىق مەڭگەرگەن، ساحنالىق مادەنيەتى جوعارى دەڭگەيدە ەكەندىگىن اڭعارتتى.
№87 جالپى ءبىلىم بەرەتىن مەكتەپتىڭ «روستوك» تەاتر ۇجىمى «دەتي، ۆوينا…» اتتى قويىلىمدى ۇسىندى. سوعىس تاقىرىبىنداعى قويىلىمدا ساحنادا ون شاقتى بالا كەزەك-كەزەك ءوز مونولوگتارىن وقىدى. مايدان دالاسىنا جولدانعان حاتتاردان ۇزىندىلەر ايتۋ ارقىلى كورەرمەندى سوعىس تراگەدياسىمەن تەرەڭ ۇشتاستىردى. بالالاردىڭ شىنايى ويىنى مەن ءماتىندى جۇرەكپەن جەتكىزۋى زالداعى تىنىشتىقتى ورناتىپ، ەرەكشە ەموسيالىق اسەر قالدىردى.
بارلىق قويىلىمدار جاس ساحناگەرلەردىڭ تەاتر ونەرىنە دەگەن قىزىعۋشىلىعى مەن الەۋەتىن پاش ەتتى. ءار ۇجىم وزىنە ءتان مانەرمەن وي سالىپ، كورەرمەننىڭ جۇرەگىنە جول تابا ءبىلدى. بيىلعى فەستيۆال – جاس ونەرپازداردىڭ بولاشاعىنا سەنىم ۇيالاتقان شىعارماشىلىق الاڭعا اينالدى.
فەستيۆال قورىتىندىسى بويىنشا ۇزدىك ونەر كورسەتكەن تەاتر ۇجىمدارى مەن اكتەرلەر ءتۇرلى نوميناسيالار بويىنشا ماراپاتتالدى:
· باس جۇلدە – «ليسەدەي» تەاتر ۇجىمى (№15 مگ)
• I ورىن – «THEART» تەاتر ۇجىمى (№176 مگ)
• II ورىن – «جاسىن» تەاتر ۇجىمى (№162 مگ) جانە «ۇزدىك جاس اكتريسا» – اليا ەرجانوۆا
• II ورىن – «سۆەتلياچوك» تەاتر ۇجىمى (№125 جببم)
• III ورىن – «بايتەرەك» تەاتر ۇجىمى (№79 مگ)، سونداي-اق «كورەرمەن كوزايىمى» – زارينا ساتەنوۆا
• III ورىن – «جاس ساحنا» تەاتر ۇجىمى (№181 جببم)
• III ورىن جانە «ۇزدىك جاس اكتەر» – الينۇر اليمكيسا، «ساحنا Likە» تەاترى (№198 مگ)
ارنايى نوميناسيالار:
• «ۇزدىك ساحنالىق كوستيۋم» – «باعىم» تەاترى (№206 مگ)
• «ۇزدىك كوركەمسوز ورىنداۋشى» – «الاقاي» تەاترى (№43 مل)
• «ۇزدىك ساحنالىق كوستيۋم» جانە «كورەرمەن كوزايىمى» – اياجان داۋلەتبەك قىزى («فارابي» تەاترى، №145 مگ)
• «ۇزدىك كوركەمسوز ورىنداۋشى» – «GAUDEAMUS» تەاترى (№6 مگ)
• «ۇزدىك جاس اكتەر» – رامازان ماناسباي («جاس ساحنا»، №104 جببم)
• «ۇزدىك جاس اكتريسا» – اقنۇر راحىش («ماڭگىلىك جاستار»، №91 جببم)
قالالىق كەزەڭنىڭ «باس جۇلدە» يەگەرى اتانعان №15 مەكتەپ گيمنازياسىنىڭ «ليسەدەي» تەاتر ۇجىمى رەسپۋبليكالىق بايقاۋعا جولداما الدى.
بۇل فەستيۆال — وقۋشىلاردىڭ شىعارماشىلىققا دەگەن قۇلشىنىسى مەن الەۋەتىن تانىتقان، ونەرگە دەگەن قۇرمەت پەن سۇيىسپەنشىلىكتى ارتتىرعان تاماشا الاڭ بولدى. جاس اكتەرلەردىڭ ساحناداعى سەنىمدى ويىنى، تاقىرىپتاردىڭ تەرەڭدىگى مەن ساحنالىق مادەنيەتتىڭ دەڭگەيى — ۇستاز ەڭبەگىنىڭ ناتيجەسى مەن بولاشاق تەاتر ونەرىنىڭ ءۇمىتى ەكەنى انىق.
«تەاتردىڭ عاجايىپ الەمى» فەستيۆالى – جاس ونەرپازداردىڭ كاسىبي ساحناعا العاشقى قادامىن جاسايتىن الاڭى عانا ەمەس، ولاردى ومىرلىك ماڭىزدى قۇندىلىقتارعا باۋليتىن رۋحاني مەكتەپ. قاتىسۋشىلاردىڭ تەاترعا دەگەن ماحابباتى مەن ەڭبەگى، ۇستازدارىنىڭ شەبەرلىگى مەن شىدامدىلىعى وسى فەستيۆالدى شىن مانىندە جارقىن ونەر مەرەكەسىنە اينالدىردى.