27 ناۋرىز - الەمدە دۇنيەجۇزىلىك تەاتر كۇنى
ءومىردىڭ ءوزى ساحنادا جاندى سۋرەت بولىپ ورىلەتىن تەاتر - ونەردىڭ بيىك شىڭى.
بۇل تۋرالى aqshamnews.kz Egemen.kz-كە سىلتەمە جاساي وتىرىپ حابارلايدى.
قازاق دالاسىنداعى كاسىبي ۇلت تەاترىنىڭ ەسىگى سول كەزەڭدە ەل استاناسى بولىپ تۇرعان قىزىلوردادا 1926 جىلى اشىلدى. تەاتر ۇجىمى كورەرمەنمەن العاش رەت قوشكە كەمەڭگەردىڭ «التىن ساقا» قويىلىمى ارقىلى قاۋىشتى.
1928 جىلى استانا الماتىعا اۋىسۋىمەن تەاتردا الاتاۋ باۋرايىنا قونىس اۋدارىپ، 1937 جىلدان باستاپ اكادەميالىق تەاتر اتاعىن الدى، ال 1961 جىلدان باستاپ م.اۋەزوۆتىڭ ەسەمىن يەلەندى.
مىنە، سودان بەرگى ءجۇز جىلعا جۋىق ۋاقىتتا قازاق دالاسىندا تەاتر تۇلەپ، تەاتر مادەنيەتى وركەن جايدى. بۇگىندە مەملەكەتتىك تەاترلارمەن قاتار تاۋەلسىز تەاترلاردىڭ تۋىپ، جاڭا ىزدەنىس، جاڭا شەشىم، تىڭ قويىلىمدارىمەن ونەرسۇيەر قاۋىمدى قۋانتىپ جاتقانى بايقالادى. كەيىنگى جىلدارداعى كوپتىڭ كوڭىلىنىڭ تەاتر تولعامدارىن ەرەكشە تالعاممەن ۇعىپ، ىزدەپ تۇراتىنداردىڭ قاتارىنىڭ قالىڭداپ جاتقانىن بۋرابايدا وتكەن ۇلتتىق قۇرىلتايدا پرەزيدەنت قاسىم-جومارت توقايەۆ: «قازاقستاندا تەاتر ونەرىنە قىزىعۋشىلىق ارتىپ كەلەدى. زال كورەرمەنگە تولى، قويىلىمداردىڭ پرەمەراسىنا بيلەتتەر ەكى-ۇش اپتا بۇرىن ساتىلىپ كەتەدى. ساحنا ونەرىنە قۇشتار جانداردىڭ اراسىندا جاستاردىڭ كوپ بولۋى كوڭىلگە ەرەكشە قۋانىش ۇيالاتادى»، دەپ اتاپ وتكەن بولاتىن.
جالپى تارلان ونەر تۋرالى كوكىرەك كوزى وياۋ دارىن يەلەرى دارا وي ورامدارىن دەستەلەگەن. سولاردىڭ ءبىر پاراسىن نازارىڭىزعا ۇسىنباقپىز:
تەاتر - سىمباتتى ونەردىڭ ىشىندەگى ەڭ زور ونەردىڭ ءبىرى. م.اۋەزوۆ
تەاتر – حاس سۇلۋدىڭ كوز جاسىنداي ءمولدىر ونەر. ع.مۇسىرەپوۆ
تەاتر – ادامنىڭ ءوزىن-وزى ساحنادان كورىپ، ءوزىن-وزى تۇسىنەتىن ورىن. ش.ايمانوۆ
تەاتر - كۇردەلى ينتەللەكتۋالدىق گارمونيادان تۇراتىن، ءۇش جاقتان بىردەي قيىننان قيىسقان ساحنالىق ونەر. س. اشىمبايەۆ
تەاتر - مەنىڭ قاسيەتتى قاعبام. ت.جامانقۇلوۆ
مادەنيەت مايدانىنداعى سۇبەلى ءىسىمىزدىڭ ءبىرى — تەاتر. تەاتر كورىنگەننىڭ ەرمەگى ەمەس، ەڭبەك. ەڭبەكتىڭ كوركەمى. تەاتر — كوڭىل كوتەرۋدىڭ عانا ورنى ەمەس، مادەني وشاق. ونەر ورنى، ەڭبەكشىلەر ۇستەمدىگىنىڭ مادەنيەت مايدانىنداعى قارماۋلى ورىننىڭ ءبىرى.
ءى. جانسۇگىروۆ
تەاتر دايىن دراماتۋرگيانى قويىپ بەرۋ ەمەس، ونداعى وقيعالاردىڭ نەگە ولاي بولعانى جايىندا ويلانۋ. ت. سۋدزۋكي
تەاتر – ومىرلىك سۇراقتارعا شەشىم تاباتىن جوعارعى ينتەنسيا. ا. گەرسەن