الماتىدا ۇلتتىق ۇلاننىڭ اسكەري قىزمەتشىلەرى جەڭىستىڭ 80 جىلدىعى قارساڭىندا 101 جاستاعى مايدانگەر، وتستاۆكاداعى پولكوۆنيك قامبار سارسەنوۆتىڭ شاڭىراعىنا بارىپ، ارداگەردى مەرەيلى مەرەكەسىمەن قۇتتىقتادى.
كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري ءبولىمىنىڭ كومانديرى پولكوۆنيك ماقسات بايماعۇلوۆ باستاعان ۇلاندىقتار جانە ارداگەرلەر كەڭەسىنىڭ ءتوراعاسى زاپاستاعى مايور بەرىك الماعامبەتوۆ قامبار سارسەنوۆكە كوپتىڭ اتىنان قۇرمەت كورسەتتى. جينالعان قاۋىم مايدانگەردىڭ عيبراتتى عۇمىرىن ايرىقشا اتاپ ءوتتى.
ءور رۋحتى مايدانگەردىڭ تەرەزەسى استىندا اسكەري وركەستر اتى اڭىزعا اينالعان «جەڭىس كۇنى»، «سلاۆيانمەن قوشتاسۋ» مارشتارىن، سونداي-اق «سمۋگليانكا» جانە «كاتيۋشا» كومپوزيسيالارىن ورىندادى. ۇلاندىقتار سونداي-اق باتىر ارداگەردىڭ ءۇيىنىڭ الدىنان سالتاناتتى شەرۋمەن ءجۇرىپ ءوتتى.
قامبار ءامىر ۇلى اسكەرگە 1942 جىلى تامىزدا شاقىرىلدى. ول سوعىس جىلدارى ءۇش رەت جارالاندى. كالينين وبلىسىن، بەلورۋسسيانى، لاتۆيانى، ليتۆانى، پولشانى ازات ەتۋگە قاتىستى. شىعىس پرۋسسيا مەن گەرمانيا جەرىندە سوعىستى. كەنيسبەرگتە جارالانۋىنا بايلانىستى دەموبيليزاسيالاندى.
بۇگىندە كەۋدەسىندە I جانە II دارەجەلى ۇلى وتان سوعىسى، II جانە III دارەجەلى «داڭق»، «قىزىل جۇلدىز»، «جاۋىنگەرلىك ەڭبەگى ءۇشىن»، «كەنيسبەرگتى العانى ءۇشىن»، «گەرمانيانى جەڭگەنى ءۇشىن» وردەن-مەدالدارى جارقىراپ تۇر.
ءىىم جۇيەسىندە 33 جىل جۇمىس ىستەپ، زەينەتكە شىقتى. بۇگىندە قامبار ءامىر ۇلى – ق ر ءىىم، مەدەۋ اۋداندىق ارداگەرلەر كەڭەسىنىڭ جانە ەنەرگەتيكا جۇيەسىنىڭ قۇرمەتتى ارداگەرى.
– بۇگىن ءبىز ۇلى وتان سوعىسىنىڭ ارداگەرى قامبار سارسەنوۆ اقساقالعا سالەم بەرە كەلدىك، الدا كەلە جاتقان ۇلكەن مەرەكەمەن قۇتتىقتادىق. جىل سايىن ارداگەرلەرگە قۇرمەت كورسەتۋ ءبىزدىڭ داستۇرىمىزگە اينالدى. ءبىز ولاردىڭ ەرلىگىن ۇلگى ەتىپ، وسكەلەڭ ۇرپاقتى تاربيەلەيمىز. وكىنىشكە وراي، ارداگەرلەر قاتارى سيرەپ بارادى. سوندىقتان ءبىز ءارقاشان ولاردى نازاردان تىس قالدىرماي، قامقورلىق تانىتىپ كوڭىلدەرىن اۋلاۋعا تىرىسامىز، – دەدى اسكەري ءبولىم كومانديرى پولكوۆنيك ماقسات بايماعۇلوۆ.