58 كەلىدەن استام ەسىرتكى زاتتارى تاركىلەندى، كونتراباندانىڭ 57 ارەكەتى توقتاتىلدى، ءبىر جاسىرىن زەرتحانا جويىلدى، وسىنداي ناتيجەلەردى الماتى قالاسى ەكونوميكالىق تەرگەۋ دەپارتامەنتىنىڭ باسشىسى دانيار اقجانوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا حابارلادى.
ونىڭ ايتۋىنشا، الماتى اۋەجايى ورتالىق ازيانىڭ ءىرى اۆياسيالىق حابى بولا وتىرىپ، ەسىرتكىنى، نەگىزىنەن اقش پەن ەۋروپا ەلدەرىنەن زاڭسىز اكەلۋ ارەكەتتەرىنىڭ نەگىزگى باعىتتارىنىڭ ءبىرى بولىپ قالا بەرەدى. الايدا قۇقىق قورعاۋ ورگاندارىمەن جۇيەلى جانە ۇيلەسىمدى جۇمىس جۇرگىزۋدىڭ ارقاسىندا تىيىم سالىنعان زاتتاردى جەتكىزۋ ارەكەتتەرى ۇدايى توقتاتىلىپ وتىرادى.
«زاڭ جانە ءتارتىپ» ءىس-شارالارى اياسىندا ءبىز ەسىرتكى قۇرالدارىن كونتراباندالىق اكەلۋ فاكتىلەرىن انىقتاۋ جانە جولىن كەسۋ بويىنشا بەلسەندى جۇمىس جۇرگىزۋدەمىز. تەك وتكەن جىلى عانا 10 ادام پوشتالىق اۋدارىم ارقىلى كونتراباندا جاساعانى ءۇشىن سوتتالدى، ولارعا ناقتى 8 جىلدان 17 جىلعا دەيىن باس بوستاندىعىنان ايىرۋ مەرزىمدەرى تاعايىندالدى»، - دەپ اتاپ ءوتتى دانيار اقجانوۆ..
سپيكەردىڭ ايتۋىنشا، جۇمىس 2025 جىلى دا جالعاسۋدا. ەسىرتكىنى شەكارا ارقىلى زاڭسىز تاسىمالداۋدىڭ 11 فاكتىسى تىركەلگەن. الماتىدا، سونداي-اق پەتروپاۆل، سەمەي، كوكشەتاۋ، شىمكەنت جانە وسكەمەندە وتكىزىلگەن جەدەل ءىس-شارالاردىڭ ناتيجەسىندە اقش-تان پوچتا جونەلتىلىمدەرىن حالىق تۇتىناتىن تاۋارلار رەتىندە جاسىرىلعان ەسىرتكى زاتتارىمەن العان ادامدار ۇستالدى.
«زاڭسىز اينالىمنان 8 كەلىگە جۋىق ماريحۋانا مەن 15 كەلىگە جۋىق گاشيش مايى الىندى. بۇل - وپەراتيۆتەر، كينولوگتار جانە باسقا دا مامانداردىڭ بىرلەسكەن جۇمىسىنىڭ ناتيجەسى»، - دەدى اقجانوۆ.
الماتى ەتد باسشىسى ازاماتتاردىڭ ەسىرتكى قىلمىسىنا قارسى كۇرەسكە قاتىسۋىنىڭ ماڭىزدىلىعىن اتاپ ءوتىپ، كۇدىكتى فاكتىلەر تۋرالى ق ر قم-1458 Call - ورتالىعىنىڭ ءنومىرى بويىنشا حابارلاۋعا شاقىرادى.
«ەسىرتكىنىڭ زاڭسىز اينالىمىنا قارسى كۇرەس ءبىز ءۇشىن باسىمدىق بولىپ قالا بەرەدى. ءبىز الماتىدا جانە بۇكىل ەلدە زاڭدىلىق پەن قاۋىپسىزدىكتى قامتاماسىز ەتۋ بويىنشا جۇمىستى جالعاستىراتىن بولامىز»، - دەپ قورىتىندىلادى ەتد باسشىسى.