ءقازىر باستى ماسەلەلەردىڭ ءبىرى - يت تۇرلەرىنىڭ تازالىعىن ساقتاۋ
قازاقى يت تۇقىمدارى تازى مەن توبەتتى ساقتاۋ جانە كوبەيتۋ ماسەلەلەرىنە قاتىستى زاڭ جوباسى ازىرلەنىپ، پارلامەنت ماجىلىسىندە جۇمىس توبىندا قارالىپ جاتىر.
بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنەن ءمالىم بولدى، دەپ حابارلايدى Almaty-akshamy.kz.
«مامانداردىڭ پىكىرىنشە، بۇگىنگى تاڭدا قازاقى تازى جانە توبەت تۇقىمىنىڭ تازالىعىن ساقتاۋعا قاتىستى قيىندىقتار بار جانە بۇل يت تۇقىمدارىنىڭ جويىلۋ ءقاۋپى ساقتالىپ تۇر. بۇل تۇرعىدا گەنوفوند جاعدايىن باعالاۋ مەن ولاردىڭ گەنەتيكالىق ءپروفيلىن قۇرۋ بويىنشا عىلىمي زەرتتەۋلەر جۇرگىزۋدىڭ زاڭنامالىق ءتارتىبىنىڭ جوقتىعى كەرى اسەر ەتىپ وتىر. وسى ورايدا مەملەكەت باسشىسىنىڭ تاپسىرماسى بويىنشا دەپۋتاتتىق كورپۋس قازاقى تازى مەن توبەتتى ساقتاۋ جانە كوبەيتۋ تۋرالى زاڭ جوباسىن ازىرلەدى»، - دەلىنگەن كوميتەت مالىمەتىندە.
زاڭ جوباسى وسى سالاداعى مەملەكەتتىك رەتتەۋدىڭ نەگىزگى قاعيداتتارىن بەلگىلەۋ ارقىلى اتالعان يت تۇقىمدارىنىڭ ساقتالۋى مەن كوبەيتۋ سالاسىنداعى سۋبەكتىلەردىڭ قىزمەتىن قۇقىقتىق رەتتەۋدە كەشەندى قادامداردى قامتىپ وتىر.
وسى ورايدا قازاقى ۇلتتىق اسىل تۇقىمدى يت تۇرلەرىنىڭ ستاندارتى پايدا بولادى. بۇل يت تۇقىمدارىن ساقتاۋ جانە ولاردى كوبەيتۋ سالاسىنداعى قىزمەتتى زاڭ جوباسىنا سايكەس جەكە تۇلعالارمەن قاتار، زاڭدى تۇلعالار دا جۇزەگە اسىرا الادى. زاڭ 2023 جىلدىڭ 1 شىلدەسىنەن باستاپ كۇشىنە ەنەدى دەپ جوسپارلانىپ وتىر.
اتالعان كوميتەت قۇرامىنداعى جانۋارلار دۇنيەسى جانە اڭشىلىق شارۋاشىلىعى باسقارماسى باسشىسى قۋات چۋماكايەۆ زاڭ جوباسىنا پارلامەنت دەپۋتاتتارى باستاماشىلىق ەتكەنىن ايتتى.
«ءبىزدىڭ ۆەدومستۆو بۇل سالاداعى ماسەلەلەرمەن اينالىسقاندىقتان، وكىلەتتى ورگان رەتىندە بەكىتىلدى. قۇجاتتى ق ر پرەزيدەنتىنىڭ ءىس باسقارماسى جانىنداعى پارلامەنتاريزم ينستيتۋتى دايارلادى. ءبىزدىڭ ماقسات – زاڭ جوباسى اياسىندا ءوزىمىزدىڭ ءتيىستى ۇسىنىستارىمىزدى ازىرلەۋ. قۇجات پارلامەنت ماجىلىسىندە جۇمىس توبى وتىرىستارىندا قارالىپ جاتىر»، - دەدى باسقارما باسشىسى.
ءقازىر باستى ماسەلەلەردىڭ ءبىرى - يت تۇرلەرىنىڭ تازالىعىن ساقتاۋ. قازاق تازىسى مەن توبەتتەردىڭ شىعۋ تەگى تۋرالى حالىقارالىق راستالعان قۇجاتتارى جوق. ويتكەنى بۇل تۇقىمدار حالىقارالىق كينولوگيالىق بىرلەستىكتەر جاعىنان مويىندالماعان.
تازا قاندى يتتەردى تىركەۋ ءۇشىن ەكى ماسەلەنى ەسكەرۋ قاجەت. بىرىنشىدەن، يت تۇقىمىنىڭ ستاندارتى. ەكىنشىدەن، تازا قاندى يتتەردىڭ ءتيستى سانى جيناقتالۋى ءتيىس.
اتاپ ايتقاندا، مەملەكەتتىڭ قارجىلاندىرۋىمەن اسىل تۇقىمدى تازى مەن توبەتتى ءوسىرۋ تۇرعىسىندا ۇلتتىق مۇرانى ساقتاۋدىڭ ماڭىزدىلىعىنا مەملەكەت ەرەكشە كوڭىل ءبولىپ وتىرعانىن بىلدىرەدى.
زاڭ جوباسى اياسىندا تازا قاندى تازى مەن توبەت تۇقىمىن ساقتاۋ جانە كوبەيتۋمەن، ساراپشىلار مەن ماماندار دايارلاۋمەن، كورمەلەر مەن ءتۇرلى دارەجەدەگى بايقاۋلار ۇيىمداستىرۋمەن، سونداي-اق ستاندارت ازىرلەۋمەن، تازى جانە توبەت تۇقىمدارىنىڭ شىعۋ تەگى تۋرالى كۋالىكتەر بەرۋمەن اينالىساتىن قازاقى يت تۇقىمدارىنىڭ ۇلتتىق ورتالىعىن قۇرۋ جوسپارلانىپ وتىر.
بۇدان بۇرىن حابارلانعانداي، بيىل كۇزدە ق ر پرەزيدەنتىنىڭ ءىس باسقارۋشىسى ايبەك دادەبايەۆ قازاقى يت تۇقىمدارى تازى مەن توبەتتى ساقتاۋ جانە قالپىنا كەلتىرۋ ماسەلەلەرى بويىنشا كەزەكتى جيىن وتكىزدى.