اۋا رايىنىڭ قولايسىزدىعىنا قاراماستان، قالامىزدىڭ كوزىقاراقتى وقىرماندارى «الماتى پوچتامتىن» بەتكە الىپ، سۇيىكتى باسىلىمدارىمەن قاۋىشۋعا اسىقتى. بۇل كۇنى «حالىقتىڭ شىراعى، كوزى مەن قۇلاعى» اتانعان بارلىق مەرزىمدى باسىلىم وكىلدەرى «قازپوشتا» عيماراتىنا جينالىپ، ءداستۇرلى «جازىلۋشىلار كۇنى–2023» ءىس-شاراسىنا قاتىستى.
«جازىلۋشىلار كۇنى» مەرزىمدى باسپا ءسوز قۇرالدارىنىڭ ەكىنشى مەرەكەسى ىسپەتتى. انشەيىندە قىم-قۋىت تىرشىلىكتەن قولدارى بوساي قويمايتىن مەرزىمدى باسپا ءسوز وكىلدەرىنىڭ دە جەلپىنىپ، ءبىر سەرپىلەتىن كۇنى. ءباسپاسوزدىڭ بۇگىنگى جاي-كۇيى قوزعالىپ، كەلەشەگى ءسوز بولادى. ەڭ باستىسى، وقىرمانىمەن بەتپە-بەت كەزدەسكەن باسپا ءسوز وكىلدەرى ءۇشىن اشىق الاڭعا اينالدى. جالپى، داستۇرگە اينالعان «جازىلۋشىلار كۇنى» بۇل گازەت پەن وقىرمان اراسىن بايلانىستىرىپ تۇرعان التىن كوپىر. وسىناۋ ءبىر عانا كۇننىڭ كەيدە تۇتاس ءبىر باسىلىمنىڭ تاعدىرىن شەشكەن دە كەزدەرى بولعان. ءدال وسى كۇنى قالا تۇرعىندارى وزدەرى قالاعان باسىلىمعا تاڭداپ ءجۇرىپ جازىلادى.
«جازىلۋشىلار كۇنىنىڭ» تاعى ءبىر ەرەكشەلىگى – ءاربىر باسىلىمنىڭ وقىرماندارىنا جاسالاتىن جەڭىلدىكتەرى بار. مۇنداي جەڭىلدىكتەر جىل بويى ەمەس، ءدال وسى كۇنى عانا جاسالادى. سونىمەن قاتار، وقىرمانداردىڭ گازەتكە جازىلعان تۇبىرتەكتەرىن ۇتىسقا قوسىپ، باعالى سىيلىقتاردى ۇتىپ الۋعا دا مۇمكىندىگى بار. وسىنداي ەرەكشەلىككە تولى «جازىلۋشىلار كۇنى» بيىلعى جىلى ەرەكشە ەكپىنمەن ءوتتى. الەمدىك ىندەتكە بايلانىستى توقتاپ قالعان ءۇردىس قايتادان جانداندى. جازىلۋشىلار زالى وقىرماندارعا تولدى.
العاشقى ءسوز كەزەگىن «قازپوشتا» اكسيونەرلىك قوعامى «الماتى پوچتامتى» الماتى فيليالى ديرەكتورىنىڭ بيزنەس جونىندەگى ورىنباسارى تەمىرحان مۇسايەۆ الدى.
– وسى مەكەمەدە بۇگىن بارشامىز جينالىپ، باسىمىزدىڭ قوسىلعانىنا قۋانىپ تۇرمىن. الەمدىك ىندەتكە بايلانىستى 2019 جىلدان باستاپ «جازىلۋشىلار كۇنى» توقتاپ قالعان ەدى. بىلتىر وسى مەرەكەنى قايتا جاڭعىرتىپ، قولعا الۋ ءۇشىن «دوڭگەلەك ۇستەل» وتكىزگەنبىز. سول باسقوسۋدا بۇل ءۇردىستى جاڭعىرتۋ ماسەلەسى كۇن تارتىبىندە قارالدى. ناتيجەسىندە بۇگىن سىزدەرمەن قايتا قاۋىشىپ وتىرمىز. ءبىزدىڭ مەكەمەنىڭ باستى ماقساتى – مەرزىمدى ءباسپاسوزدىڭ جاندانۋى ءۇشىن ۇگىت-ناسيحات جۇمىستارىن جۇرگىزۋ. سىزدەردىڭ ەڭبەكتەرىڭىزدى، ونىمدەرىڭىزدى وقىرمانعا جەتكىزۋ. ارينە، قازىرگى جاھاندانۋ زامانىندا سيفرلاندىرۋ بەلەڭ العانىمەن، ءداستۇرلى ءباسپاسوزدىڭ، گازەت پەن جۋرنالدىڭ ورنى ەرەكشە ەكەنى بەلگىلى. سوندىقتان بۇدان بىلاي «جازىلۋشىلار كۇنىن» جىلىنا ەكى مارتە وتكىزگەلى وتىرمىز، – دەدى تەمىرحان كەنجالى ۇلى.
كەلەسى ءسوز كەزەگىن العان «پوشتالىق سەرۆيس» فيليالىنىڭ ديرەكتورى نۇرجان جابايەۆ «جازىلۋشىلار كۇنىنىڭ» ەرەكشەلىكتەرىمەن قاتار، پايدالى تۇستارىنىڭ دا كوپ ەكەنىنە توقتالدى. وقىرمان ءۇشىن دە، باسىلىم ءۇشىن دە ناتيجەلى ءۇردىس ەكەنىن ايتىپ، تابىس تىلەدى.
سونىمەن قاتار، بۇل كۇنى باسپا ءسوز وكىلدەرى دە وسىناۋ ءىس-شاراعا ۇيىتقى بولىپ وتىرعان «الماتى پوچتامتىنا» ريزاشىلىقتارىن ءبىلدىردى.
«ەگەمەن قازاقستان» گازەتىنەن ايگۇل تۇرىسبەكوۆا، «اlmaty aqshamy» گازەتىنىڭ جاۋاپتى حاتشىسى سەرىك جۇمابايەۆ ءسوز الىپ، ۇجىمنىڭ العىسىن جەتكىزدى.
«جازىلۋشىلار كۇنىنە» «ەگەمەن قازاقستان»، كازاحستانسكايا پراۆدا»، «قازاق ادەبيەتى»، «Almaty aqshamy»، «ۆەچەرنيي Almaty»، «زاڭ»، «تۇركىستان»، «ءمولدىر بۇلاق»، «بالالار الەمى»، باسقا دا كوپتەگەن باسىلىم وكىلدەرى قاتىسىپ، ءوز ونىمدەرىن ۇسىندى.
ءتۇس قايتا «جازىلۋشىلار كۇنى» اياسىندا باسىلىمدارعا جازىلعان وقىرماندار ۇتىس ويىندارىنا قاتىسىپ، التىناي سادىبەكوۆا جۇلدەگە يە بولدى.