تازى مەن توبەتتى ساقتاۋ ماسەلەلەرى بويىنشا بولەك زاڭ ازىرلەنەدى

تازى مەن توبەتتى حالىقارالىق كينولوگيالىق قاۋىمداستىقتا (FCI) تىركەۋ قاجەت.

ق ر پرەزيدەنتىنىڭ ءىس باسقارۋشىسى ايبەك دادەبايەۆ قازاقى يت تۇقىمدارى تازى مەن توبەتتى ساقتاۋ جانە قالپىنا كەلتىرۋ ماسەلەلەرى بويىنشا كەزەكتى جيىن وتكىزدى دەپ حابارلايدى Almaty-akshamy.kz باسقارمانىڭ باسپا ءسوز قىزمەتىنە سىلتەمە جاساپ.

كەزدەسۋدە مينيسترلىكتەردىڭ باسشىلىق وكىلدەرى ءبىر اي ىشىندە اتقارىلعان جۇمىس بارىسى تۋرالى بايانداپ، الداعى جوسپارىمەن ءبولىستى. ساراپشىلارمەن (كينولوگتار، عالىمدار) تالقىلاۋ ناتيجەسىندە تازى مەن توبەتتى ساقتاۋ جانە ونىڭ تۇقىمىن قالپىنا كەلتىرۋگە قاتىستى جەكە زاڭ جوباسىن ازىرلەۋ جونىندە شەشىم قابىلدانىن ايتتى.

جيىن قورىتىندىسى بويىنشا ەكولوگيا، گەولوگيا جانە تابيعي رەسۋرستار مينيسترلىگىنە باسقا مۇددەلى مەملەكەتتىك ورگاندارمەن بىرلەسە وتىرىپ زاڭ جوباسىنىڭ سوڭعى نۇسقاسىن ەنگىزۋ تاپسىرىلدى. سونىمەن قاتار اتالعان مينيسترلىك اۋىل شارۋاشىلىعى مينيسترلىگىمەن بىرلەسىپ قازاقى يت تۇقىمدارى ستاندارتىنىڭ جاڭا جوباسىن قاراستىراتىن بولدى.

«الدا اتقارىلاتىن ءىس از ەمەس. ۆەدومستۆوارالىق جۇمىس توبىنىڭ بارلىق شەشىمدەرى ساراپشىلارمەن بىرگە تالقىلانىپ، ولاردىڭ پىكىرى ەسكەرىلۋگە ءتيىس. كەزىندە پاناجايى بار كينولوگيالىق زەرتتەۋ ورتالىعىن سالۋ تاپسىرىلعان ەدى. ول جوسپار ورتا جولدان توقتادى. ەندى مۇنى سوڭىنا دەيىن جەتكىزۋ كەرەك. سونىمەن قاتار، تازى مەن توبەتتى حالىقارالىق كينولوگيالىق قاۋىمداستىقتا (FCI) تىركەتىپ، ولاردىڭ شىققان جەرى رەتىندە قازاقستاندى كورسەتۋ راسىمدەرىن ەرەكشە باقىلاۋعا الۋ قاجەت»، – دەدى ق ر پرەزيدەنتىنىڭ ءىس باسقارۋشىسى ايبەك دادەبايەۆ.