الماتى حالقى ءوزى تۋعان قالاسىنىڭ ۇقىپتى ءارى تازا بولعانىن قالايدى. وسى ماقساتپەن سەنبىلىك اكسياسى ءوتتى.
28 پانفيلوۆشىلار ساياباعىندا الماتىلىقتار سەنبىلىككە شىقتى.
اتالعان يگى باستاما رەسپۋبليكالىق «تازا قازاقستان» اكسياسىنىڭ نەگىزىندە سونداي-اق «الماتى – ءبىزدىڭ ورتاق ءۇيىمىز» قالالىق ناۋقانى اياسىندا جۇزەگە اسىرىلدى.
مۇنىڭ ماقساتى – قالا تازالىعىن ساقتاپ، ەكولوگيالىق احۋالدى جاقسارتۋ.
«ءبىز ءوز شاھارىمىزدىڭ ادەمى، تاپ-تازا بولعانىن قالايمىز. ەشقانداي قوقىس كوشەدە، اۋلادا شاشىلىپ جاتپاسا ەكەن. ەگەر ءار ازامات ءوز ماڭايىنا ۇقىپتى قاراسا، ەكولوگيالىق بەلسەندىلىك ارتا تۇسەدى»، – دەدى ەرىكتى جاراس ەركىنبەك.
سونىمەن قاتار اتالعان اكسياعا ءار ساناتتاعى ادامدار دا كەلىپ قاتىسىپ، جاپپاي تازالىققا ءوز ۇلەستەرىن تيگىزدى.
«بۇرىن الماتى جاپ-جاسىل بولاتىن. كوشەدەگى ارىقتاردان سۋ مولدىرەپ اعاتىن. ءتىپتى اپورت وسكەن كەزدەر دە ەستە. بۇگىن قالانىڭ شىرايىن كىرگىزۋ ءۇشىن كوپتەگەن ىستەر جاسالىپ جاتىر. ءار ىسكە بەرەكە بەرسىن، قالامىز گۇلدەنە بەرگەي»، – دەدى قالا تۇرعىنى قارجاۋباي اقتازوۆ.