الماتىدا «جارقىن كۇز» اتتى كۇزگى ناۋقان اياسىندا كەڭ كولەمدە تازالىق جۇمىستارى مەن اعاش وتىرعىزۋ شارالارى وتۋدە. بۇل ەكولوگيالىق اكسيا رەسپۋبليكالىق «تازا قازاقستان» باعدارلاماسى اياسىندا ۇيىمداستىرىلىپ، ەكولوگيالىق جاعدايدى جاقسارتۋ جانە قالانى جاسىلداندىرۋدى ماقسات ەتەدى، دەپ حابارلايدى aqshamnews.kz.
ناۋقان بارىسىندا الماتىنىڭ 8 اۋدانىنان 10 مىڭنان استام تۇرعىن تازالىق جۇمىستارىنا قاتىسىپ، ءوز ۇيلەرىنىڭ ماڭايىنا، كوشەلەر مەن پاركتەرگە جاڭا اعاشتار مەن بۇتالار وتىرعىزدى. ءار قاتىسۋشىعا وتىرعىزۋ ءۇشىن كوشەتتەر ۇسىنىلدى.
300-دەن استام تەحنيكا مەن 1755 كوممۋنالدىق قىزمەتكەرلەر اكسياعا جۇمىلدىرىلدى. جاستار دا بەلسەندى قاتىسىپ، مۇنداي شارالاردىڭ ۇيىمداستىرىلۋىنىڭ ماڭىزدىلىعىن اتاپ ءوتتى.
«الماتىنىڭ جارقىن كۇزىندە ءبىز قالاعا دەگەن قامقورلىعىمىزدى كورسەتەمىز. سەنبىلىككە قاتىسۋ ارقىلى ءبىز تازالىقتى قامتاماسىز ەتەمىز»، - دەدى الماتى قالاسى جاستار ساياساتىنىڭ مەملەكەتتىك قورىنىڭ ديرەكتورى باعدات اناربايەۆا.
بالالار دا بۇل شارادان تىس قالمادى، ولار ەرەسەكتەرمەن بىرگە قوقىستاردى جيناپ، اعاش وتىرعىزدى.
«بالالار سەنبىلىككە قاتىسا وتىرىپ، جاۋاپكەرشىلىكتى جانە تۋعان قالاعا دەگەن سۇيىسپەنشىلىكتى بويىنا سىڭىرەدى»، - دەيدى اتا-انالار.
كەڭ اۋقىمدى تازالىق جۇمىستارى بارىسىندا دەمالىس ايماقتارى، پاركتەر مەن سكۆەرلەر تازارتىلىپ، شامامەن 4 مىڭ تەكشە مەتر قوقىس شىعارىلدى. 10 مىڭنان استام اعاش وتىرعىزىلدى، ونىڭ ىشىندە جاڭا ALA پاركىنە 1200 كوشەت وتىرعىزىلدى.
اكسيا تۇرعىندار تاراپىنان ۇلكەن قولداۋ تاپتى. قازاقستاننىڭ حالىق ءارتىسى التىنبەك كورازبايەۆ دا اكسياعا قاتىسىپ، وسىنداي شارالاردىڭ قالا ورتادا قولايلى جاعداي جاساۋعا باعىتتالعان ماڭىزدى قادام ەكەنىن اتاپ ءوتتى.
«مۇنداي ءىس-شارالار جاستاردىڭ تۋعان قالاعا جاۋاپكەرشىلىگىن قالىپتاستىرادى»، - دەدى ول.
وتىرعىزۋ ءۇشىن قالادا جاقسى وسەتىن اعاش سورتتارى تاڭدالدى: الما، قاراعاش، اكاسيا، ۇيەڭكى سەكىلدى اعاشتار وتىرعىزىلدى. اكسيا بارىسىندا مادەني-ساۋىقتىرۋ باعدارلاماسى دا ۇيىمداستىرىلدى، تۇرعىندارعا كوڭىلدى ۋاقىت وتكىزۋگە مۇمكىندىك بەردى.