مامانداردىڭ ايتۋىنشا، ءۇي تازالاپ، زاتتاردى رەتپەن ۇستاۋ كۇيزەلىستەن قۇتقارادى. ءبىر جاعىنان، بۇل قولجەتىمدى ءادىس بولسا، ەكىنشىدەن، ەندورفين دەڭگەيىن ارتىرۋدا پايداسى زور ەكەن. گاردەروبتاعى ارتىق زاتتاردان قۇتىلىپ، تازالىق جاساۋدىڭ باسقا دا ءتيىمدى جاقتارىن بۇگىندە پسيحولوگتار ءجيى ايتىپ ءجۇر.
باقىلاۋدا ۇستاۋ جانە قاۋىپسىزدىك سەزىمى
تازالىق جۇرگىزۋ بىزگە اينالامىزداعىنى قاداعالاپ جانە وندا نە بولىپ جاتقانىن باقىلاۋدا ۇستاۋدى سەزىندىرەدى. پسيحولوگتاردىڭ پايىمداۋىنشا، ادامدار ءومىردى ءبىر ۋىستا ۇستاپ تۇراتىنداي باقىلاي الماعانمەن، ءۇيىمىزدىڭ تازالىعىن قاداعالاۋ قولىمىزدان كەلەدى. سونىمەن قاتار ونداي سەزىم ادامداردا سەنىمدىلىك تۋدىرىپ، كوڭىل-كۇيگە وڭ اسەر ەتەدى ەكەن.
نازارىمىزدى شوعىرلاندىرۋ
ءۇيدىڭ ءىشىنىڭ رەتسىز ىبىرسىپ جاتۋى ادامنىڭ تەز شارشاۋى مەن سترەسسكە ۇشىراۋىنا تىكەلەي اسەر ەتەتىن كورىنەدى. پرينستون ۋنيۆەرسيتەتىندە جۇرگىزىلگەن زەرتتەۋ ناتيجەسىندە ىبىرسىعان، شاشىراڭقى بولمەدە كوڭىل توقتاتىپ، ءبىر ىسكە دەن قويۋ مۇنتازداي ەتىپ جينالعان، تازا بولمەگە قاراعاندا الدەقايدا قيىن ەكەنىن كورسەتكەن. ءبىزدىڭ كوزىمىز ءوزىمىز اينالىسىپ وتىرعان ىسكە ەش قاتىسى جوق وبەكتىلەرگە نازارى اۋا بەرەتىن كورىنەدى.
ياعني، وزىمىزگە بار ويىمىزبەن الدىمىزداعى نوۋتبۋك ەكرانىنا عانا قاراپ وتىرعانداي بولىپ كورىنسەك تە، شىن مانىسىندە، ۇستەل ۇستىندەگى كوفەدەن قالعان شىنى، قاجەتسىز قۇجاتتار، ت.ب شاشىلىپ تۇرعان زاتتاردىڭ ءبارىن كوزىمىز اڭعارىپ تۇرادى.
سوندىقتان جۇمىستىڭ ونىمدىلىگى ارتسىن دەسەك، تازا ۇستەلدە، جينالعان بولمەدە جۇمىس ىستەگەن ابزال.
تازالىق جاساۋدىڭ ادامعا وڭ اسەر ەتەتىن تاعى ءبىر تۇسى – ناقتىلىققا يتەرمەلەيدى. زەرتتەۋشىلەردىڭ ايتۋىنشا، ەگەر ادام الدىندا نە كۇتىپ تۇرعانىن بىلسە، ول بايسالدى بولىپ، وزىنە سەنىمدى بولا تۇسەدى. ادامنىڭ ميى حاوس پەن بەلگىسىزدىكتى جاقتىرمايدى. قانداي دا ءبىر ارەكەتتەن مي قانداي ناتيجە بولاتىنىن بىلگىسى كەلەدى. سول سەبەپتى دە سابىرلىق ساقتاپ، بوساڭسۋدىڭ ءبىر جولى – ۇيگە تازالىق جۇرگىزۋ. تازا بولمە مەن اۋاسى تازارعان پاتەردەن قالاي راحاتتاناتىنىن بىلگەننەن كەيىن-اق ادام ءوزىن جاقسى سەزىنە باستايتىن كورىنەدى.
پسيحيكانى تازارتۋ
شكاف سورەلەرىن جيناپ، رەتتەپ وتىرۋ تەك ارتىق زاتتاردان قۇتىلۋعا عانا ەمەس، سونىمەن بىرگە شاشىراعان ويلارىڭىزدى جونگە كەلتىرۋگە كومەكتەسەتىن كورىنەدى. اينالامىزدى رەتتەستىرۋدى قالاماۋ – بۇل ءبىزدىڭ ىشكى جان دۇنيەمىزدىڭ قانداي كۇيدە ەكەنىن بىلدىرەدى. دەپرەسسيادا جۇرگەن ادامنىڭ ءبىر بەلگىسى - ءۇي جۇمىستارىن جاساۋعا قۇلىقسىزدىق تانىتۋى. ءوزىمىزدىڭ اينالامىزدى كوپتەگەن قاجەتى جوق زاتتارمەن تولتىرۋ ارقىلى ءبىز وتكەننىڭ قۇرساۋىنان شىعا الماي، ومىرىمىزگە جاڭا ءبىر وزگەرىس ەنگىزۋگە قورقاتىنداي سەزىمدى باستان كەشىرەدى ەكەنبىز. ياعني، ءۇيدى تازالاۋ ارقىلى ءبىز ميىمىزدى، ويىمىزدى رەتكە كەلتىرىپ، ءسال دە بولسا قوبالجۋ مەن الاڭداۋشىلىقتان ارىلادى ەكەنبىز.
وزىڭە دەگەن سەنىمدىلىك
ءۇيدى تازالاپ، ءبىر جونگە كەلتىرگەننەن كەيىن، ادامدار باسقا دا مىندەتتەردى، مەيلى ول ۇيگە قاتىستى بولسىن، بولماسا جۇمىسقا قاتىستى ىستەردى قالاي باستاپ كەتكەندەرىن وزدەرى دە بايقاماي قالاتىن بولۋلارى كەرەك. ال جەتىستىككە جەتۋ سەزىمى تاعى دا العا ۇمتىلىپ، جاڭا جەتىستىكتەرگە تالپىنۋعا يتەرمەلەيدى. ولاي بولسا، ءومىرىڭىزدى رەتتەپ العىڭىز كەلسە، جاي عانا ءۇي تازالاۋدان باستاپ كورىڭىز!