تۇركيانىڭ «قالاما قوش كەلدىڭىز» جوباسى - ەلوردادا

قازاقستان استاناسى تۇركيانىڭ مەملەكەتتىك ارناسىنىڭ جوباسى ءۇشىن تۇسىرىلەدى

«قالاما قوش كەلدىڭىز» اتتى  جوبا 13 بولىمنەن تۇرادى.  بۇدان بۇرىن لوندون، ريم، پاريج،  امستەردام، بۋداپەشت، سونداي-اق ماسكەۋ سىندى ەۋروپانىڭ ءىرى قالالارى تۇسىرىلگەن. ەندى باعدارلامانىڭ سەگىزىنشى ءبولىمى تولىقتاي نۇر-سۇلتان قالاسىنا ارنالماق، دەپ حابارلايدى Almaty-akshamy.kz

ترت مەن يۋنۋس ەمرە ينستيتۋتى اراسىندا قول قويىلعان ىنتىماقتاستىق اياسىندا ءتۇسىرىلىم توبى جۇمىستارىن باستاپ كەتتى.

ترت توبى  بايتەرەك مونۋمەنتى، بەيبىتشىلىك جانە كەلىسىم سارايى، حان شاتىر ويىن ساۋىق جانە ساۋدا ورتالىعى، قازاقستان ۇلتتىق مۋزەيى، قولجازبالار جانە سيرەك كىتاپتار ۇلتتىق ورتالىعى، ازىرەت سۇلتان مەشىتى، اتىراۋ كوپىرى، ەكسپو-2017 كەشەنى مەن قازاق ەلى مونۋمەنتى سياقتى ەلوردانىڭ ەڭ تانىمال ورىندارىن تۇسىرەدى.

نۇر-سۇلتانداعى يۋنۋس ەمرە ينستيتۋتىندا تۇرىك ءتىلىن ۇيرەنىپ جاتقان وقۋشىلار ەلوردانى تۇرىك كورەرمەندەرگە تۇرىكشە تانىستىرادى.

قازاقتىڭ ۇلتتىق اسپاپتارى دومبىرا مەن ساز سىرناي تارتاتىن ونەرپازدار تۇرىك كورەرمەندەرگە ءوز  ونەرلەرىن پاش ەتەدى. سونداي-اق جۇرگىزۋشىلەر ۇلتتىق تاعامداردان ءدام تاتىپ، قازاق اسحاناسى تۋرالى مالىمەت الدى.

پروديۋسەر-رەجيسسەر پارلايان يىلدىز، وپەراتورلار ميەۆليۋت دونەر مەن سەلچۋك كاراچام دايىندايتىن باعدارلاما TRT ارنالارىندا كورەرمەندەرگە جول تارتادى.