قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا ەل اۋماعىن جايلى جانە ءقاۋىپسىز مەكەنگە اينالدىرۋ جولىنداعى ۇلتتىق باستامالار تۋرالى كەڭىنەن ءسوز قوزعادى. ونىڭ ايتۋىنشا، ەلدىڭ تۇراقتىلىعى مەن وركەندەۋىنە تەك ەكونوميكالىق دامۋ عانا ەمەس، ەكولوگيالىق جانە مادەني-ەتيكالىق تاربيە دە تىكەلەي اسەر ەتەدى. بۇل تۋرالى Aqshamnews.kz سايتى حابارلايدى.
مەملەكەت باسشىسى اتاپ وتكەندەي، بۇگىندە «تازا قازاقستان» اتتى اۋقىمدى ەكولوگيالىق اكسيا ەل بويىنشا كەڭ قولداۋعا يە بولىپ، ناقتى ناتيجەلەر بەرىپ وتىر.
"مەنىڭ باستاماممەن بىلتىردان بەرى «تازا قازاقستان» اكسياسى جۇزەگە اسىرىلىپ جاتىر. جالپىۇلتتىق جوباعا 6 ميلليوننان استام ادام قاتىستى. 1،6 ميلليون توننادان اسا قوقىس جينالدى. 3،3 ميلليون كوشەت وتىرعىزىلدى"، – دەدى توقايەۆ.
پرەزيدەنت بۇل جوبانىڭ ماڭىزى – تەك سەنبىلىك وتكىزۋدە ەمەس، ەل ازاماتتارىنىڭ ەكولوگيالىق مادەنيەتىن ارتتىرۋ، تۋعان جەرگە دەگەن سۇيىسپەنشىلىكتى وياتۋ ەكەنىنە نازار اۋدارتتى.
"تازا قازاقستان – بۇل ءبىزدىڭ بۇگىنگى جانە ەرتەڭگى كۇنىمىزدىڭ كەپىلى. سوندىقتان بۇل جۇمىس ۇزدىكسىز جالعاسا بەرەدى"، – دەدى ول.
قاسىم-جومارت توقايەۆ ءوز سوزىندە تازالىق ۇعىمىن تەك ەكولوگيامەن شەكتەمەي، ونى ادامگەرشىلىك، ادالدىق، جاۋاپكەرشىلىك سياقتى رۋحاني كاتەگوريالارمەن بايلانىستىردى.
"ءبىز ءار ازاماتتىڭ، اسىرەسە جاستاردىڭ بويىنا تازالىق، ۇقىپتىلىق، جاۋاپتىلىق سياقتى قاسيەتتەردى ءسىڭىرۋىمىز كەرەك. تازا يا تازالىق، بۇل – كيەلى سوزدەر. ارى تازا ادام ەشقاشان ەلىن ساتپايدى"، – دەپ ناقتى ايتتى مەملەكەت باسشىسى.
ول ەل بولاشاعى جاستاردىڭ بويىندا وسى قۇندىلىقتاردى تاربيەلەۋ ارقىلى ۇلتتىق بىرەگەيلىك پەن جاۋاپتى ازاماتتىق پوزيسيانى قالىپتاستىرۋ قاجەت ەكەنىن باسا ايتتى.
"ءبىز «قازاقستان – ورتاق ءۇيىمىز» دەپ ۇنەمى ايتامىز. سوندىقتان ەلىمىز تازا، تارتىمدى، مادەنيەتتى بولۋى كەرەك"، – دەدى پرەزيدەنت.
بۇل سوزدەر تەك ەكولوگيالىق تازالىقتى عانا ەمەس، قوعامدىق ءومىردىڭ بارلىق سالاسىندا مادەنيەتتىلىك پەن جاۋاپكەرشىلىك قاعيداتتارىن ساقتاۋ قاجەتتىگىن بىلدىرەدى. ءار ازامات تۋعان ەلىنىڭ كوركەيۋى ءۇشىن جاۋاپتى ەكەنىن تەرەڭ سەزىنۋى ءتيىس.
«تازا قازاقستان» جوباسى – ەل تۇرعىندارىنىڭ ەكولوگيالىق، مادەني جانە ازاماتتىق سانا-سەزىمىن ارتتىرۋعا باعىتتالعان ستراتەگيالىق باستاما. بۇل جوبا ارقىلى مەملەكەت باسشىسى ەلدىڭ تازالىعى مەن ءتارتىبىن ۇلتتىق يدەولوگيانىڭ اجىراماس بولىگىنە اينالدىرۋدى كوزدەپ وتىر. ەلىمىزدىڭ ءاربىر ازاماتى ءۇشىن تۋعان جەردى تازا ۇستاۋ – پارىز عانا ەمەس، ۇلتقا دەگەن شىنايى ماحابباتتىڭ كورىنىسى.