قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە ەلىمىزدىڭ ءتولقۇجاتى – كوك پاسپورتتىڭ ماڭىزىنا ەرەكشە توقتالدى. ول بۇل قۇجاتتىڭ قازىرگى تاڭدا تەك جەكە باس كۋالىگى عانا ەمەس، ۇلتتىق بىرەگەيلىكتىڭ نىشانىنا اينالعانىن اتاپ ءوتتى. بۇل تۋرالى Aqshamnews.kz سايتى حابارلايدى.
مەملەكەت باسشىسىنىڭ ايتۋىنشا، قازاقستان رەسپۋبليكاسى ءتولقۇجاتىنىڭ حالىقارالىق دەڭگەيدەگى ابىرويى جىل وتكەن سايىن ارتىپ كەلەدى. بۇل ەلىمىزدىڭ سىرتقى ساياساتتاعى سالماعى مەن ىشكى تۇراقتىلىعىنىڭ ناتيجەسى.
"كوك پاسپورتىمىز ۇلتتىق بىرەگەيلىگىمىزدىڭ ايقىن نىشانىنا اينالدى. جىل وتكەن سايىن ءتولقۇجاتىمىزدىڭ ابىروي-بەدەلى كوتەرىلىپ كەلەدى"، – دەدى پرەزيدەنت.
بۇگىندە قازاقستاندى تۇراقتى تۇرۋعا نەمەسە ساياحاتتاۋعا قولايلى ەل رەتىندە تاڭدايتىن شەتەلدىك ازاماتتاردىڭ سانى ارتىپ كەلەدى. بۇل – ەلىمىزدىڭ بەيبىت، ءقاۋىپسىز، اشىق قوعام ورناتۋداعى جەتىستىكتەرىنىڭ ناقتى كورىنىسى.
توقايەۆ قازاقستاننىڭ حالىقارالىق رەيتينگتەردەگى پوزيسياسىنا دا توقتالىپ، بۇل كورسەتكىشتەردىڭ مەملەكەتتىڭ دامۋ دەڭگەيىن ناقتى ايقىندايتىنىن ايتتى.
"قازاقستان بەدەلدى حالىقارالىق رەيتينگتەردەگى قاۋىپسىزدىك يندەكسى بويىنشا اينالامىزداعى كوپتەگەن مەملەكەتتەردىڭ ءبارىنىڭ دەرلىك الدىندا تۇر"، – دەدى مەملەكەت باسشىسى.
سونىمەن قاتار، «ءتارتىپ پەن قاۋىپسىزدىك» كورسەتكىشى بويىنشا ەلىمىز 142 ەلدىڭ ىشىنەن 43-ورىنعا جايعاسقان. بۇل – قۇقىقتىق ءتارتىپ پەن ازاماتتاردىڭ قورعانىسىنىڭ حالىقارالىق دەڭگەيدە مويىندالۋى.
كوك پاسپورت بۇگىندە تەك ازاماتتىقتىڭ بەلگىسى عانا ەمەس، قازاقستاننىڭ ىشكى تۇراقتىلىعى مەن حالىقارالىق ارەناداعى بەدەلىنىڭ سيمۆولىنا اينالدى. مەملەكەت باسشىسى اتاپ وتكەندەي، بۇل – ەل تاۋەلسىزدىگىنىڭ، ۇلتتىق بىرەگەيلىكتىڭ جانە دامىعان قۇقىقتىق جۇيەنىڭ ناقتى كورىنىسى.