قالا تۇرعىندارى مەن ءتۇرلى ۇيىم وكىلدەرى بۇل اكسيانى قولدادى. اۋەزوۆ اۋدانىندا سەنبىلىككە ەكواكتيۆيستەر مەن تابيعاتقا بەيجاي قارامايتىن تۇرعىندار قاتىستى.
سەنبىلىكتىڭ ماقساتى — قالاداعى تازالىقتى ساقتاۋ جانە حالىقتى تازالىق مادەنيەتىن قالىپتاستىرۋعا ۇندەۋ. ەكولوگيالىق كامپانيانىڭ ەرەكشەلىكتەرى تۋرالى اۋەزوۆ اۋدانىنىڭ الەۋمەتتىك ءبولىمىنىڭ مەڭگەرۋشىسى زاكيدا تاستەمبەكوۆا ايتىپ بەردى:
– ءبىز ەكولوگيالىق اكسيالارعا ۇنەمى قاتىسامىز. باستى ماقسات – قالانى تازا ۇستاۋ، كوگالداندىرۋ جانە اباتتاندىرۋ. مۇنداي ارەكەتتەر جاس بۋىن ءۇشىن ۇلگى دەپ ويلايمىن، – دەدى ول.
مەگاپوليس تۇرعىندارى "تازا قازاقستان" جالپىەكولوگيالىق اكسياسىنان شەت قالمادى.
– ءبىز بۇل تازالىق شاراسىنا بۇرىننان قاتىسقىمىز كەلىپ جۇرگەنبىز. مىنە، بۇگىن قاتىسۋ ءساتى ءتۇستى. وزىمە 65 جاس تولدى. سوعان قاراماستان، ۇيدە دە "پلاستيك"، "شىنى"، "تاعام قالدىقتارىن" جەكە-جەكە ءبولىپ، سۇرىپتاۋعا تىرىسامىن. بارشاڭىزدى مۇقيات بولۋعا شاقىرامىن، – دەدى قالا تۇرعىنى قالدىباي ءابدىقادىروۆ.
جەتىسۋ اۋدانىندا دا سەنبىلىك ءوتتى. اكسيا تاڭعى ساعات 09:00-دە رىسقۇلوۆ داڭعىلى مەن بوكەيحانوۆ كوشەسىنىڭ قيىلىسىندا باستالدى.
– سەنبىلىكتىڭ باستى ماقساتى – تەك تازالىق ساقتاۋ عانا ەمەس، سونىمەن قاتار ەكولوگيالىق مادەنيەتتى قالىپتاستىرۋ. وكىنىشكە قاراي، كەيبىرەۋلەر "تازالىق – تەك كوممۋنالدىق قىزمەتتىڭ مىندەتى" دەپ تۇسىنەدى. بۇل تۇبەگەيلى قاتە پىكىر. ەكولوگيا – ۇلكەن ماسەلە، ونى ءبارىمىز بىرىگىپ شەشۋىمىز كەرەك، – دەدى جەتىسۋ اۋدانى اباتتاندىرۋ ءبولىمىنىڭ باس مامانى ەرنار باتىروۆ.
جالپى سەنبىلىككە 2500-دەن استام قالا تۇرعىنى قاتىستى جانە قالا اۋداندارىندا 82 ارنايى تەحنيكا جۇمىلدىرىلدى.
اۋەزوۆ اۋدانى (ساين مەن اباي كوشەلەرىنىڭ قيىلىسى): اعاشتاردى سانيتارلىق كەسۋ، ارام شوپتەردى جويۋ، تروتۋارلار مەن قوعامدىق كەڭىستىكتەردى تازارتۋ، جاسىل ايماقتاردى اباتتاندىرۋ.
المالى اۋدانى (نازاربايەۆ-كابانباي باتىر-روزىباكييەۆ-كاراساي باتىر جانە تولە بي-تۋرگۋت وزال-رايىمبەك-روزىباكييەۆ كوشەلەرى شەڭبەرى): كوشەلەردى سىپىرۋ، بالالار جانە سپورت الاڭدارىن جوندەۋ مەن سىرلاۋ، قوقىس جاشىكتەرىن سىرلاۋ، جارىق شامدارىن اۋىستىرۋ، كوگالداردى شابۋ جانە سۋارۋ، تروتۋارلار مەن سكۆەرلەردى جۋۋ.
الاتاۋ اۋدانى ("دارحان" ىقشاماۋدانى): قوقىس جيناۋ، جاسىل ايماقتاردى كۇتىپ-باپتاۋ، تۇسكەن جاپىراقتاردى جيناۋ، جولدار مەن تروتۋارلاردى جۋۋ، الەۋمەتتىك نىسانداردىڭ اۋماعىن تازالاۋ جانە باسقا دا اباتتاندىرۋ جۇمىستارى.
جەتىسۋ اۋدانى (رىسقۇلوۆ داڭعىلى مەن بوكەيحانوۆ كوشەسىنىڭ قيىلىسى): جاپىراقتار مەن قوقىستى سىپىرۋ، اعاش دىڭدەرىن تۇزەۋ، تروتۋارلاردى سىپىرۋ جانە جۋۋ.
مەدەۋ اۋدانى ("مەركۋر گراد" تك، 27، 28، 29، 30 ۇيلەر الاڭى جانە "دوستىق" سكۆەرى): اۋلا اۋماقتارىن تازارتۋ، بالالار جانە سپورت الاڭدارىن جوندەۋ مەن سىرلاۋ، قوقىس جاشىكتەرىن سىرلاۋ، جارىق شامدارىن اۋىستىرۋ، اعاشتاردى سانيتارلىق كەسۋ، تروتۋارلار مەن سكۆەرلەردى جۋۋ، جاياۋ جۇرگىنشى ايماقتارىن تازارتۋ.
بۇل بارلىق ورىننان 700 تەكشە مەتردەن استام قوقىس شىعارىلدى.