الماتى اكىمى دارحان ساتىبالدى جۇمىس ساپارى بارىسىندا قالا تۇرعىندارى مەن قوناقتارىنا ارنالعان جاڭا قوعامدىق كەڭىستىكتىڭ اباتتاندىرىلۋ جۇمىستارىن كورىپ قايتتى.
جاڭا ساياباق جاروكوۆ پەن سي سينحاي كوشەلەرىنىڭ قيىلىسىندا، «وڭتۇستىك» ساياباعىنىڭ سولتۇستىگىندە ورنالاسقان. جالپى اۋماعى 4،1 گەكتار.
قازىرگى تاڭدا اۋماقتا جاياۋ جۇرگىنشىلەرگە ارنالعان جولدار توسەلىپ، بالالارعا ويناۋعا ىڭعايلى الاڭقايلار ورناتىلىپ، جارىقتاندىرۋ جۇيەسى مەن شاعىن ساۋلەتتىك ەلەمەنتتەر قويىلىپ جاتىر. كوگالداندىرۋعا ەرەكشە كوڭىل ءبولىنىپ، 120-دان استام ءىرى اعاش، اتاپ ايتقاندا جوكە، تالشىن جانە قاراعاي وتىرعىزۋ كوزدەلگەن. جاڭا ساياباق الماتىلىقتاردىڭ تىنىعىپ، سەرۋەندەيتىن زاماناۋي ءارى جايلى مەكەنىنە اينالماق.
مەردىگەر ۇيىمداردىڭ وكىلدەرىنە قاراتا سويلەگەن قالا اكىمى اتقارىلاتىن ءىستىڭ مەرزىمى مەن ساپاسىن بۇلجىتپاي ورىنداۋدىڭ ماڭىزدىلىعىن اتاپ ءوتتى:
«مەردىگەرلەرگە ناقتى تاپسىرما بەرىلدى، قۇرىلىس بەلگىلەنگەن ۋاقىتتا ءارى ءتيىستى دەڭگەيدە اياقتالۋعا ءتيىس. قالا تۇرعىندارىنا ساپالى جۇمىس كەرەك، ءبىز مەرزىمنىڭ سوزىلىپ كەتۋىنە نەمەسە ءاتۇستى جاساۋعا جول بەرمەيمىز. ەگەر ءتارتىپ بۇزۋشىلىقتار انىقتالسا، قاتاڭ شارالار قولدانامىز»، — دەدى دارحان ساتىبالدى.
ول جوبانى جاۋاپسىز ورىنداعان جاعدايدا ورىنداۋشىلاردىڭ جەكە جاۋاپكەرشىلىگى بار ەكەنىن دە ەسكە سالدى. قالا باسشىسىنىڭ تاپسىرماسى بويىنشا قۇرىلىس جۇمىستارىن ءۇش اي ىشىندە تولىق اياقتاۋ جوسپارلانىپ وتىر.