الماتى قالاسىنداعى «قازاقستان» ءقوناقۇيىنىڭ ارتىندا ورنالاسقان «دوستىق» ساياباعىندا «اق جول» دەموكراتيالىق پارتياسىنىڭ قالالىق فيليالى مەن جاستار قاناتىنىڭ وكىلدەرى ءماجىلىس دەپۋتاتى، پارتيا ءتوراعاسى ازات پەرۋاشيەۆتىڭ باستاۋىمەن «تازا قازاقستان» اكسياسى اياسىندا ۇيىمداستىرىلعان جالپىقالالىق سەنبىلىككە بەلسەنە قاتىستى.
ەكولوگيالىق مادەنيەتتى قالىپتاستىرۋ مەن قورشاعان ورتانى كوركەيتۋگە باعىتتالعان اكسيا بارىسىندا پارتيا مۇشەلەرى مەن ەرىكتىلەر تابيعاتتى ايالاۋعا، تۇراقتى دامۋ يدەيالارىن ىلگەرىلەتۋگە، قوعامنىڭ بەلسەندىلىگىنە نازار اۋدارۋعا تىرىستى. جاڭبىر مەن نايزاعايدان كەيىن ساياباق اۋماعىندا كوپتەپ قۇلاعان بۇتاقتار مەن جاپىراقتاردى جيناپ، بالالار الاڭىن، جاياۋ جۇرگىنشى جولدارىن تازالاپ، اباتتاندىرۋ جۇمىستارىنا كىرىستى. پارتيا وكىلدەرى بۇل مىندەتتى قىسقا ۋاقىت ىشىندە تياناقتى ورىنداپ شىقتى.
مەملەكەتتىك دەمالىستا ءجۇرىپ، ەلىمىزدىڭ ءتۇرلى وڭىرلەرىندەگى ءوندىرىس ورىندارىن ارالاپ جۇرگەن ازات پەرۋاشيەۆ الماتىعا ارنايى ات باسىن بۇرىپ، سەنبىلىككە پارتيالاستارىمەن بىرگە قاتىستى:
– بۇل جەردە ماسەلە پارتيادا دا، شارادا دا ەمەس. تازالىق – وزىمىزدەن باستالاتىن ۇعىم. قايدا تۇراتىنىمىز ماڭىزدى ەمەس: اۋىل بولسىن، قالا بولسىن، ءۇيىمىزدىڭ دە، ەلىمىزدىڭ دە كوركى – ءوز قولىمىزدا. ءۇيىڭدى سەنەن باسقا ەشكىم كەلىپ جيناپ بەرمەيدى. جاقسى ءومىر سۇرگىمىز كەلسە، وزىمىزدەن باستاۋىمىز كەرەك. بۇل – ومىرلىك ۇستانىم بولۋى ءتيىس. ار-ۇياتپەن، اتا-بابامىزدان جەتكەن داستۇرمەن ءومىر سۇرسەك، قوعام دا كوركەيەدى، – دەدى ول.
الماتى قالالىق فيليال ءتوراعاسىنىڭ ورىنباسارى ارمان ءجۇمادىل وسىنداي باستامالاردىڭ قوعام ساناسىن جاڭعىرتىپ، تۋعان جەرگە دەگەن سۇيىسپەنشىلىكتى وياتاتىنىن ايتتى:
– تاريحشى رەتىندە ايتارىم، ءبىر كەزدەرى مۇنداي سەنبىلىكتەر ءماجبۇرلى سيپاتتا وتەتىن. بۇگىنگى تاڭدا ولار حالىقتىڭ سانالى تاڭداۋىنا، تۋعان ءۇيىن، تۋعان جەرىن تازا ۇستاۋعا دەگەن ىشكى نيەتىنە اينالۋى قاجەت. اتا-بابالارىمىز تابيعاتتى ايالاۋدى ومىرلىك مۇرات تۇتقان. وسىنداي قاسيەتتەر ءاربىر قازاقتىڭ بويىنا ءسىڭىپ، ءومىرىنىڭ بولشەگىنە اينالۋى ءتيىس. قازىرگىدەي مازاسىز كەزەڭدە ءبىزدىڭ بارلىق ۋايىمىمىز تازالىقپەن باستالىپ، تارتىپپەن اياقتالسىن. تەك سوندا عانا ءبىز تۋعان قالامىز بەن وتانىمىزدىڭ بولاشاعى تۋرالى ەركىن ويلاي الامىز، – دەدى ول.
سەنبىلىككە قاتىسقان جاستاردىڭ اراسىندا الماتىدا وقۋ-جاتتىعۋ جيىنىن وتكىزىپ جاتقان ەرلەر مەن ايەلدەر اراسىنداعى قازاقستان قۇراماسىنىڭ رەگبيشىلەرى دە بولدى. ولار جاتتىعۋ ورنىنا ساياباقتى تاڭدادى.
ەرلەر قۇراماسىنىڭ كاپيتانى ماگومەدراسۋل ماگومەدوۆ شاقىرتۋ العانىن قۋانا قابىلداعانىن جەتكىزدى:
– بالا كۇنىمدە ءار سەنبى سايىن ۇيدە دە، مەكتەپتە دە، اۋلادا دا وسىنداي سەنبىلىكتەر وتەتىن. بۇگىندە ەلىمىزدىڭ ءار وڭىرىنەن كەلگەن جىگىتتەر دە بىزبەن بىرگە سەنبىلىككە شىقتى. ولار الماتىدا بۇقارالىق سەنبىلىك ءداستۇرى بار ەكەنىن كورىپ، قاتتى تاڭعالدى. ءوز قالالارىندا مۇنداي باستامالار سيرەك كەزدەسەدى ەكەن. بىزدەن ۇلگى الۋ كەرەك دەيدى. شىنىندا دا، قالا تازالىعى سىرت كوزگە بىردەن بايقالادى. ءبىراق مۇندا ءومىر سۇرەتىن – ءبىز. سوندىقتان ءبىز ءوزىمىز ءۇشىن، ءوز جايلىلىعىمىز ءۇشىن اتسالىسۋىمىز قاجەت، – دەدى ول.
قازاقستان ايەلدەر قۇراماسىنىڭ مۇشەسى كسەنيا كيم دە ءوز ويىن ورتاعا سالدى:
– قالا تۇرعىندارىنىڭ وسىنداي سەنبىلىككە بەلسەندى قاتىسۋى – وتە ماڭىزدى. بۇل – قالاعا دا، الماتىلىقتاردىڭ وزىنە دە پايدالى. قوعام بولىپ ءتارتىپتى ساقتاۋ – ءاربىرىمىزدىڭ ورتاق مىندەتىمىز. جەرىمىزدى ايالاۋعا، كۇتىپ ۇستاۋعا شاقىرامىن! – دەدى سپورتشى.