الماتىنىڭ جەتىسۋ اۋدانىندا «تازا قازاقستان» رەسپۋبليكالىق اكسياسى اياسىندا كوگالداندىرۋ جانە كورىكتەندىرۋ جۇمىسى قارقىندى ءجۇرىپ جاتىر. اۋداننىڭ مالىمەتىنشە، بۇگىنگى كۇنگە دەيىن 800 ءتۇپ كوشەت وتىرعىزىلدى، سونداي-اق سەيفۋللين–جانسۇگىروۆ جولايىرىعى ماڭىندا ءىرى كولەمدى اعاش ەگۋ جالعاسىپ كەلەدى. جالپى، بۇل اۋماقتا 500 ءتۇپ ۇيەڭكى مەن جوكە وتىرعىزىلادى.
جولايىرىقتىڭ اينالاسىندا قوعامدىق كەڭىستىكتەردى كەشەندى كورىكتەندىرۋ تولىق اياقتالدى. جالپى اۋماعى – 3،4 گەكتار. مۇندا 30،4 مىڭ م² اۋماق كوگالداندىرىلىپ، 5،8 مىڭ م² كەسپە تاس توسەلدى، سۋارۋ جۇيەسىنە ارنالعان جەتى ۇڭعىما بۇرعىلاندى جانە 3،5 گەكتارعا اۆتوماتتى سۋارۋ جۇيەسى ورناتىلدى. بۇدان بولەك، 14 مىڭ بۇتا، 192 اعاش جانە 2 400 گۇل ەگىلىپ، ەكى الپىلىك توبە جاسالدى.
جالپى العاندا، بيىل جەتىسۋ اۋدانىندا اعاش ەگۋ جوسپارى تولىق ورىندالدى — بارلىعى 1 300 كوشەت وتىرعىزىلدى. بارلىق جاسىل جەلەككە ءتيىستى كۇتىم جاسالادى، ال قۋراعان اعاشتاردىڭ ورنىنا دەرەۋ ساۋ اعاشتار ەگىلەدى.
