قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى، №202 مەكتەپ-گيمنازياسى جانە جامبىل جابايەۆ ادەبي-مەموريالدى مۋزەيىنىڭ بىرلەسۋىمەن «جامبىل جابايەۆ ايتىستارىنىڭ كوركەمدىك-ەستەتيكالىق تابيعاتى» دەگەن تاقىرىپتا مۇعالىمدەرگە ارنالعان قالالىق سەمينار ءوتتى.
بۇل باسقوسۋ مازمۇنعا دا، مانگە دە تولى تاعىلىمدى شارا بولدى. ايتىس ونەرىنىڭ تەرەڭ تابيعاتىن تالقىلاپ قانا قويماي، جامبىل اتامىزدىڭ باي مۇراسىن جاڭا قىرىنان تانۋعا مۇمكىندىك تۋدى. جامبىل اقىننىڭ نەمەرەسى سالتانات تەزەكباي قىزى سەمينارعا ارنايى قوناق بولىپ قاتىستى. سونداي-اق اتالعان شاراعا جامبىل جابايەۆ اتىنداعى ادەبي-مەموريالدى مۋزەي كوشپەلى كورمەسىمەن كەلدى. سەمينار بارىسىندا №202 مەكتەپ-گيمنازيا مەن جامبىل جابايەۆ اتىنداعى ادەبي-مەموريالدى مۋزەي اراسىندا ءوزارا ىنتىماقتاستىق مەموراندۋمعا قول قويىلدى.
ۇلى تۇلعالاردىڭ مۇراسىن ۋاقىت تالابىنا ساي زاماناۋي فورماتتا ناسيحاتتاۋ – ءبىلىم مەن تەحنولوگيانىڭ توعىسقان تۇسى. وسى ماقساتتا ۇستازداردىڭ ەڭبەگىمەن جامبىل جابايەۆ مۋزەيىنىڭ ۆيرتۋالدى 3D نۇسقاسى ازىرلەندى. سونىمەن قاتار، جوبانى كوپشىلىككە تانىستىرۋ ءۇشىن ارنايى سايت اشىلدى. بۇل – جامبىل الەمىن جاڭا تۇرعىدا تانىتىپ، جاس ۇرپاققا ۇلى اقىن ءومىرىن سيفرلى كەڭىستىكتە جەتكىزەتىن ماڭىزدى باستاما.
شارانى ۇيىمداستىرعان №202 مەكتەپ-گيمنازيانىڭ قازاق ءتىلى مەن ادەبيەتى ءپانى مۇعالىمدەرى قۇرالاي شەرييەۆا، نازگۇل ۇركىمبايەۆا، عاليا ەلشىبايەۆا سىندى ۇستازداردىڭ قاجىرلى ەڭبەگى سەمينار مازمۇنىن بايىتىپ، جامبىل مۇراسىن جاڭا قىرىنان تانىتۋعا جول اشتى.
ايتا كەتەرلىك جايت، بۇل تاعىلىمدى باسقوسۋ جىر ءدۇلد ۇلى جامبىل جابايەۆتىڭ تۋعانىنا 180 جىل تولۋىنا ورايلاستىرىلعان ءىس-شارالاردىڭ باستاماسى ىسپەتتى بولدى.