جەتىسۋ اۋدانىنىڭ كوميۋنيتي ورتالىعىندا «تازا قازاقستان» رەسپۋبليكالىق باستاماسى اياسىندا «قاعاز boom» ەكولوگيالىق اكسياسى ۇيىمداستىرىلدى، - دەپ حابارلايدى Aqshamnews.kz.
ءىس-شارانىڭ نەگىزگى ماقساتى – قوعامدا ەكولوگيالىق مادەنيەتتى دامىتۋ، قالدىقتاردى بولەك جيناۋ داعدىسىن قالىپتاستىرۋ جانە تۇرعىنداردىڭ ەكوساناسىن ارتتىرۋ.
اۋدان تۇرعىندارى، جاستار مەن ستۋدەنتتەر بەلسەندى قاتىسىپ، قاجەتسىز گازەتتەردى، جۋرنالداردى، كارتون مەن كەڭسە قاعازدارىن تاپسىردى. شامامەن 2 توننا ماكۋلاتۋرا جينالىپ، ارنايى قابىلداۋ پۋنكتىنە جونەلتىلدى.
«قورشاعان ورتانى قورعاۋ – ورتاق مىندەتىمىز. بۇگىنگى «قاعاز boom» اكسياسىنا تۇرعىنداردىڭ بەلسەندى قاتىسۋى – قوعامدا ەكولوگيالىق مادەنيەتتىڭ ءوسىپ كەلە جاتقانىن، ازاماتتاردىڭ ەكولوگيا ماسەلەسىنە جاۋاپكەرشىلىكپەن قاراي باستاعانىن كورسەتەدى. ءبىز ەكولوگيالىق باستامالاردى ودان ءارى دامىتىپ، جاستاردى تابيعاتقا ۇقىپتى قاراۋعا تارتۋدى جالعاستىرامىز»، – دەدى جەتىسۋ اۋدانى كوميۋنيتي-ورتالىعىنىڭ جەتەكشىسى ەسەن ءابدىحالىق.
ۇيىمداستىرۋشىلاردىڭ ايتۋىنشا، مۇنداي ەكولوگيالىق ءىس-شارالار تۇراقتى تۇردە وتكىزىلىپ تۇرادى. بۇل تۇرعىنداردى قورشاعان ورتاعا ۇقىپتى قاراۋ مادەنيەتىن قالىپتاستىرۋعا مۇمكىندىك بەرەدى.