الماتىدا رەسپۋبليكالىق «تازا قازاقستان» باعدارلاماسى جانە «الماتى – ءبىزدىڭ ورتاق ءۇيىمىز» قالالىق جوباسى اياسىندا ەكولوگيالىق جاعدايدى جاقسارتۋعا جانە مەگاپوليستى كوگالداندىرۋعا باعىتتالعان اۋقىمدى ەكواكسيا ءوتتى. «جارقىن كۇز» اتتى ناۋقان قالاداعى 8 اۋداننىڭ تۇرعىنىن بىرىكتىرىپ، كوشە تازالاۋ مەن اعاش وتىرعىزۋ جۇمىستارىندا بەلسەندى قاتىستى، دەپ حابارلايدى aqshamnews.kz.
المالى اۋدانىنداعى ماحاتما گاندي اتىنداعى ساياباقتىڭ ماڭىندا تاڭەرتەڭنەن باستاپ كەرەمەت اتموسفەرا ورنادى. جاقىن ماڭداعى ۇيلەردىڭ تۇرعىندارى شۇڭقىر قازىپ، تۇسكەن جاپىراقتاردى جيناپ، كوشەت وتىرعىزدى. كوپتەگەن ادامنىڭ بالالارىمەن كەلگەنى كوڭىلگە قۋانىش سىيلايدى، ويتكەنى بۇل ەكولوگيالىق دۇنيەتانىمدى قالىپتاستىرۋ تۇرعىسىنان ماڭىزدى.
تاستاك-2 شاعىن اۋدانىندا قالاداعى كوللەدجدەردىڭ وقىتۋشىلارى مەن ستۋدەنتتەرى بەلسەندىلىك تانىتتى.
- بۇگىن ءبىز ەلۋگە جۋىق الما جانە شاعان كوشەتىن وتىرعىزدىق. بارلىق ستۋدەنت وسى اكسياعا قۋانا قاتىستى. ولار الماتىنىڭ سۇلۋلىعى مەن بولاشاعىنا ۇلەس قوسۋدىڭ ماڭىزدىلىعىن جاقسى تۇسىنەدى. جاستاردى مۇنداي ءىس-شارالارعا تۇراقتى تۇردە تارتۋ قاجەت دەپ ەسەپتەيمىن، سەبەبى بۇل ولاردىڭ تازا ءارى جاسىل مەگاپوليستە ءومىر ءسۇرۋدىڭ جاۋاپكەرشىلىك سەزىمىن قالىپتاستىرادى، - دەدى وقىتۋشى تولقىن توقتارحان قىزى.
الماتىباسجوسپار عيماراتىنىڭ ماڭىندا دا جۇمىس قىزدى. ەگەر جىل باسىندا بوستاندىق اۋدانىندا 6 مىڭ كوشەت وتىرعىزۋ جوسپارلانسا، اۋدان تۇرعىندارى مەن كاسىپكەرلەردىڭ قولداۋىمەن بۇل كورسەتكىش 15 مىڭنان استى!
اتالعان اۋدان تۇرعىندارى مەن ەكوبەلسەندىلەر گاگارين بۋلۆارىن رەتكە كەلتىردى. اكسياعا مەملەكەتتىك، قوعامدىق، ەكولوگيالىق جانە ءبىلىم بەرۋ ۇيىمدارىنىڭ 250-دەن استام وكىلى، سونداي-اق قالا تۇرعىندارى قاتىستى. قوقىس جيناۋمەن قاتار، سەرۋەندەۋ جولدارى مەن اللەيالارداعى قورشاۋلار، ورىندىقتار جانە باسقا دا جابدىقتار بويالدى.
ەكوبەلسەندى، اۋدان تۇرعىنى رادمير زەينۋللين جالپى قالالىق قوقىس جيناۋ اكسيالارىنداعى تاجىريبەسى تۋرالى ايتىپ بەردى.
- مەن سەنبىلىككە ءۇشىنشى رەت شىعىپ تۇرمىن. بۇگىن ەكى اعاش وتىرعىزدىم. قالانىڭ تازالىعىنا ۇلەس قوسقاندى ۇناتامىن، ويتكەنى وسىندا ءوستىم. قالانىڭ دامۋى ءارقايسىمىزعا بايلانىستى دەپ سانايمىن. وسىنداي اكسيالارعا ءجيى شىعايىق! - دەدى رادمير.
ناۋرىزباي اۋدانىندا اكسياعا جەرگىلىكتى اكىمدىك، دەنساۋلىق ساقتاۋ جانە ءبىلىم بەرۋ سالاسىنىڭ قىزمەتكەرلەرى، جاستار مەن ارداگەرلەر ت.ب. 250 ادام قاتىستى. تانىمال ساق قورعاندارىنىڭ اينالاسىنداعى الاڭدا 200 كوشەت وتىرعىزىلدى. «الما سيتي» تۇرعىن ءۇي كەشەنىنىڭ ماڭىندا 400 كوشەت، الاتاۋ داڭعىلى بويىندا تاعى 100 كوشەت وتىرعىزىلدى. ولاردىڭ اراسىندا قاراعاش، ءساناعاش جانە شاعان بار.
سونىمەن قاتار، اكسياعا قاتىسۋشىلار 300 تەكشە مەتر قوقىس شىعاردى.
قالا تۇرعىنىنىڭ ءبىرى اينۇر اتاپ وتكەندەي، «ءاربىر ادام الماتىنىڭ تازالىعىن جانە سۇلۋلىعىن ساقتاۋ ءۇشىن ۇلەسىن قوسۋعا ءتيىس». ال تاعى ءبىر تۇرعىن ولجاس مۇنداي ءىس-شارالارعا قالىس قالماۋدىڭ وتە ماڭىزدى ەكەنىن ايتتى.
- تەك بىرىگىپ، بارلىعىنا جايلى ءارى تازا ورتا قۇرا الامىز، — دەدى ول.
ناۋرىزباي اۋدانىندا وسىنداي شارالاردىڭ اپتا سايىن وتەتىنىنە نازار اۋدارۋ كەرەك.
الاتاۋ اۋدانىندا سەنبىلىككە 3 مىڭنان استام قاتىسۋشى جينالدى. 6 گەكتار اۋماقتا — ALA پاركى مەن جاڭا ساين كوشەسىنىڭ بويىندا 2100 اعاش وتىرعىزىلدى. ولارادىڭ اراسىندا ءساناعاش، شاعان جانە قاراعان بار. 540 تەكشە مەتر قوقىس شىعارىلدى. بۇل جۇمىستار ءۇشىن 42 بىرلىك ارنايى تەحنيكا قولدانىلدى.
اكسياعا قازاقستاننىڭ حالىق ارتيسءى، كومپوزيتور التىنبەك كورازبايەۆ جانە ءانى اباي بەگەي دە قاتىستى. ارتيستەر تۇرعىنداردى تەك سەنبىلىك كۇندەرى عانا ەمەس، ۇنەمى تازالىقتى ساقتاپ، قالانى ايالاۋعا شاقىردى.
ءاۋەزوۆ اۋدانىندا ەكولوگيالىق اكسياعا 500-دەن استام ادام قاتىستى. جالپى 500-گە جۋىق اعاش كوشەتى وتىرعىزىلدى. بۇل جۇمىستارعا 22 بىرلىك تەحنيكا تارتىلدى.
ايتا كەتۋ كەرەك، ەكولوگيالىق اكسياعا 10 مىڭنان استام قالا تۇرعىنى قاتىسىپ، 300-دەن استام ارنايى تەحنيكا جانە 1755 كوممۋنالدىق قىزمەتكەرلەر جۇمىلدىرىلدى. قالانىڭ ءار جەرىندە 10 مىڭنان استام كوشەت وتىرعىزىلدى، ونىڭ ىشىندە 1200 كوشەت الاتاۋ اۋدانىنداعى جاڭا ALA پاركىندە وتىرعىزىلدى.
