قازاقستان فۋتبول فەدەراسياسى فۋتزالدان قازاقستان ۇلتتىق قۇراماسىنىڭ باس باپكەرى پاۋلو ريكاردو كاكامەن سەرىكتەستىكتى ءارى قاراي جالعاستىرادى، دەپ حابارلايدى aqshamnews.kz.
جاڭا كەلىسىمشارت 2026 جىلدىڭ سوڭىنا دەيىن سوزىلادى.
«وزبەكستاندا وتكەن الەم چەمپيوناتى ءبىزدىڭ كوماندانىڭ كەز كەلگەن قارسىلاسقا قابىلەتتى ەكەنىن كورسەتتى. تۋرنيردەگى ءساتتى ونەرىنىڭ ارقاسىندا ءبىزدىڭ كوماندا الەمنىڭ ۇزدىك بەستىگىنە ەندى. سونداي-اق، ءدۇبىرلى دودا جاستارىمىزدىڭ الەۋەتى زور ەكەنىن كورسەتتى. بۇل ەلىمىزدە فۋتزالدىڭ دۇرىس دامىپ كەلە جاتقانىن كورسەتەدى. باس باپكەر پاۋلو ريكاردو كاكا مىرزانىڭ قوسقان ۇلەسى زور. الدا ليتۆا مەن لاتۆيادا وتەتىن ەۋروپا چەمپيوناتىنىڭ ىرىكتەۋ ءتۋرنيرى. ءبىزدىڭ مىندەت – ەۋرونىڭ فينالدىق كەزەڭىنە شىعۋ. كاكا باپكەردىڭ باسشىلىعىمەن ءبىزدىڭ جىگىتتەر وسى ماقساتقا جەتۋ ءۇشىن بار كۇش-جىگەرىن سالاتىنىنا كۇمانىم جوق»، – دەدى قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆ.
پاۋلو ريكاردو كاكا العا جوعارى ماقسات قويعانىن اتاپ ءوتتى.
«قازاقستان فۋتبول فەدەراسياسى جانە قازاقستان فۋتزال قاۋىمداستىعىنا قولداۋ كورسەتىپ، سەنىم ارتقانى ءۇشىن العىسىمدى بىلدىرەمىن. قازاقستان قۇراماسى تەك ەڭ جوعارى ماقساتتى العا قويادى. ءبىز 2026 جىلعى ەۋروپا چەمپيوناتىنا جولداما الۋ ءۇشىن بار كۇشىمىزدى سالامىز»، – دەدى قازاقستان قۇراماسىنىڭ باس باپكەرى پاۋلو ريكاردو كاكا.
ەسكە سالا كەتەيىك، پاۋلو ريكاردو كاكا قازاقستان قۇراماسىن 2018 جىلدان بەرى جاتتىقتىرىپ كەلەدى. ونىڭ جەتەكشىلىگىمەن ءبىزدىڭ قۇراما 2021 جىلعى الەم چەمپيوناتىندا ءتورتىنشى ورىن الدى، بۇل الەم چەمپيوناتتارىنا قاتىسۋ تاريحىنداعى ەڭ ۇزدىك جەتىستىك. سونداي-اق قازاقستان قۇراماسى العاش رەت ۋەفا رەيتينگىندە ەكىنشى، فيفا رەيتينگىندە بەسىنشى ورىنعا كوتەرىلدى.