ۇكىمەتتە «تازا قازاقستان» ەكولوگيالىق اكسياسىنىڭ ىسكە اسىرىلۋ بارىسى قارالدى: 2024 جىلى اكسياعا 6،2 ملن ادام قاتىستى – 1،1 ملن توننا قالدىق جينالىپ، 1،6 ملنعا جۋىق اعاش وتىرعىزىلدى، دەپ حابارلايدى aqshamnews.kz
ق ر پرەمەر-مينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا «تازا قازاقستان» ەكولوگيالىق اكسياسىنىڭ ىسكە اسىرىلۋ بارىسى تۋرالى ماسەلە قارالدى.
ەكولوگيا جانە تابيعي رەسۋرستار ءمينيسترى ەرلان نىسانبايەۆ 2024 جىلى اكسياعا قاتىسۋشىلاردىڭ جالپى سانى 6،2 ملن ادامدى قۇراعانىن، 1،1 ملن توننا قالدىق جينالىپ، 1،6 ملن اعاش وتىرعىزىلعانىن باياندادى.
پرەمەر-مينيستر «تازا قازاقستان» اكسياسىنىڭ ازاماتتاردىڭ مىنەز-قۇلىق مادەنيەتىن قالىپتاستىرۋ، جالپىادامزاتتىق قۇندىلىقتاردى قولداۋ جانە تابيعاتتى قورعاۋدىڭ جاڭا يدەولوگياسىن قالىپتاستىرۋ ماسەلەسىندەگى ماڭىزدىلىعىن اتاپ ءوتتى.
«پرەزيدەنتتىڭ بارلىق باستامالارى، ونىڭ ىشىندە ەكولوگيا مەن قورشاعان ورتانى جاقسارتۋ، زاڭدىلىق پەن ءتارتىپتى ساقتاۋ قاعيداتى ءار ادامنىڭ وي-ساناسى مەن مىنەز-قۇلىق مادەنيەتىن قالىپتاستىرۋعا جانە سول ارقىلى جالپىادامزاتتىق قۇندىلىقتاردى قولداۋعا باعىتتالىپ وتىر. ولار ۋاقىتشا ناۋقانعا ەمەس، تابيعاتتى ايالاۋعا، اينالاڭا، تاريح پەن داستۇرگە قۇرمەتپەن قاراۋعا ۇندەيتىن قوعامدىق جاڭا يدەولوگيا رەتىندە ورنىعۋى ءتيىس»، — دەپ اتاپ ءوتتى ولجاس بەكتەنوۆ.
«تازا قازاقستان» اكسياسى ەكولوگيالىق احۋالدى جاقسارتۋ باعىتىندا كەشەندى ءىس-شارالار كوزدەلگەن 2029 جىلعا دەيىنگى ۇزاقمەرزىمدى تۇجىرىمداما مارتەبەسىنە يە بولعانى ايتىلدى.