ەكولوگيالىق قاۋىپسىزدىك ماسەلەسىندە ەكوپوستتاردىڭ ماڭىزى زور. قورشاعان ورتانىڭ احۋالىن جاقسارتۋ ءۇشىن «تازا قازاقستان» رەسپۋبليكالىق باعدارلاماسى اياسىندا «تازا اۋا» ناۋقانى جالعاسىن تاۋىپ كەلەدى. وتكەن دەمالىس كۇندەرى پوليسەيلەر ەكولوگتارمەن بىرگە بىرنەشە كولىكتى تەكسەرىپ، ەكولوگيالىق تالاپقا سايكەس كەلمەيتىن كولىك جۇرگىزۋشىلەرىنە اكىمشىلىك حاتتاما تولتىردى.
مونيتورينگتىڭ ماقساتى – كولىكتەردىڭ زياندى شىعارىندىلارىن ازايتىپ، ەكولوگيالىق ستاندارتقا سايكەستىگىن قاداعالاۋ. الماتىعا كىرەتىن كولىكتەردى تەكسەرۋ ءۇشىن 19 ەكولوگيالىق پوست ورناتىلعان. اۋا ساپاسىن باقىلاۋ ءۇشىن مۇنداي نىسانداردان بولەك، تاعى 3 جىلجىمالى ەكولوگيالىق بەكەت جۇمىس ىستەيدى. ەكوبەكەتتەردەگى ءموبيلدى قۇرىلعىلار اۋا ساپاسىن باقىلاپ، ەكولوگيالىق جاعدايدى جاقسارتۋ ماقساتىندا قولدانىلادى. ەكولوگتار ارنايى قوندىرعىمەن ءبىر ساتتە كولىكتەن بولىنگەن گازدىڭ كولەمىن انىقتايدى. بەكەتتەر قالانىڭ كىرەبەرىس جولدارىندا، ماڭىزدى كولىك توراپتارىندا جانە لاستانۋ دەڭگەيى جوعارى ايماقتاردا ورنالاسقان.
2023 جىلى ەكوپوستتاردا الماتى قالاسى پوليسيا دەپارتامەنتىنىڭ قىزمەتكەرلەرى 25 728 اكىمشىلىك حاتتاما راسىمدەدى. 2024 جىلى جۇرگىزىلگەن 204 996 ولشەۋ ناتيجەسىندە، 34 708 اۆتوكولىكتىڭ (نەمەسە 17%-ىنىڭ) بەلگىلەنگەن ۋىتتىلىق جانە تۇتىندىلىك دەڭگەيىنەن اسىپ كەتكەنى انىقتالدى. وسىعان بايلانىستى 31 682 اكىمشىلىك حاتتاما تولتىرىلعان.
· تاقىرىپقا وراي
ابدۋحاميت امانقۇل، اعا ەكولوگ: اۋا ساپاسىن جاقسارتۋدىڭ جولى
«تازا اۋا» اكسياسى اياسىندا 2024 جىلى جىلجىمالى ەكوپوستتار قالا اۋماعىندا 1197 ولشەۋ جۇرگىزدى. ونىڭ ىشىندە 239 ديزەلدى، 958 بەنزين-گازبەن جۇرەتىن اۆتوكولىك تەكسەرىلدى. ناتيجەسىندە 552 اۆتوكولىكتىڭ (ياعني تەكسەرىلگەندەردىڭ 46%-ىنىڭ) بەلگىلەنگەن نورمالاردى بۇزعانى انىقتالدى. 466 اۆتوكولىكتە كومىرتەگى توتىعىنىڭ (CO) مولشەرى رۇقسات ەتىلگەن دەڭگەيدەن جوعارى، 86 اۆتوكولىكتە تۇتىندىلىك دەڭگەيىنىڭ ارتقانى تىركەلدى. جىلجىمالى ەكوپوستتار اتالعان زاڭبۇزۋشىلىقتار بويىنشا 20 مەملەكەتتىك تىركەۋ ءنومىرىن ۋاقىتشا تاركىلەدى. قازىرگى ۋاقىتتا 12 اۆتوكولىك اقاۋلارىن جويىپ، قايتا تىركەۋگە الىندى. ەكوپوستتاردىڭ وڭ ناتيجەسى – ۋىتتىلىق جانە تۇتىندىلىك نورمالارىن بۇزاتىن اۆتوكولىكتەر سانىنىڭ ازايۋى. 2020 جىلى بۇل كورسەتكىش 20%-دان استام بولسا، 2024 جىلى شامامەن 17%-دى قۇرادى.