الماتىعا جىلدىڭ العاشقى توقسانىندا 450 مىڭ ساياحاتتاۋشى كەلگەن.
بۇل بىلتىرعى جىلمەن سالىستىرعاندا ەكى ەسەگە دەيىن وسكەنىن كورسەتەدى. ماماندار مۇنى شاھاردىڭ تۇمسا تابيعاتىمەن، گەوگرافيالىق ورنالاسۋىمەن جانە تاۋلارعا جاقىندىعىمەن بايلانىستىرادى. دەمالۋشىلارعا قولايلى جاعداي جاسالعانىنىڭ ارقاسىندا جەرگىلىكتى بيۋدجەتكە تۇسەتىن سالىقتىق تۇسىمدەر دە ەداۋىر ارتقان. بيىل ونىڭ كولەمى بىردەن 45 پايىزعا كوبەيىپتى، دەپ حابارلايدى Almaty-akshamy.kz qazaqstan.tv-كە سىلتەمە جاساپ.
ۇلتتىق تاعامدار ازىرلەۋمەن اينالىساتىن مەيرامحانا قىزمەتكەرلەرى سوڭعى 2-3 جىلدا قالا تۇرعىندارى مەن قوناقتارىنىڭ تاماقتانۋ مادەنيەتى وزگەرگەنىن ايتادى. تابيعي، ءارتۇرلى قوسپاسىز ازىرلەنەتىن اسقا سۇرانىس ارتقان. سەرۆيسكە دە كوڭىلدەرى تولادى.
زارينا ايدار قىزى، قاراعاندى قالاسىنىڭ تۇرعىنى:
ءدامدى، ءتاتتى، قىزمەت كورسەتۋ 100 پايىز.
گۇلزادا كوپتىك قىزى، شىمكەنت قالاسىنىڭ تۇرعىنى:
جاقسى. بەشبارماق جەدىك ءقازىر. قىمىران، قىمىز ءىشىپ وتىرمىز. تاماعى جاقسى، وتە ءدامدى. دەمالعان جەرىمىزدە دە، وتىرعان ورنىمىزدا دا وتە.
نيكولاس ستارگاردت، گەرمانيا ازاماتى:
بەشبارماق – مەنىڭ ەڭ سۇيىكتى اسىما اينالدى. سىزدەردە ەڭ ءدامدى تاعامدار دايىندالادى. الماتىعا ءۇشىنشى رەت كەلىپ تۇرمىن.
قۋان نۇراقىن، ءتىلشى:
تەڭىز دەڭگەيىنەن 1100 مەتر بيىكتىكتە ورنالاسقان الماتى الاقانداعىداي كورىنەتىن كوكتوبەنىڭ ورنى ەرەكشە. قالاعا ساياحاتتاۋشىلار بۇل جەرگە مىندەتتى تۇردە كوتەرىلەدى. دەمالىس ورنىنا كۇنىنە شامامەن 3500 مىڭ ادام بارادى.
قالا تۇرعىندارى مەن قوناقتارى پاندەميادان كەيىن تاۋدا دەمالعاندى، سەرۋەندەگەندى ءجون كورەدى. دەمالۋشىلاردىڭ سوزىنشە، شاھاردا بارلىق مۇمكىندىك قاراستىرىلعان. قىزمەت كورسەتۋ ساپاسى دا جاقسارعان.
سۋلتان جاسىم، كۋۆەيت ازاماتى:
بۇرىن سوڭدى قازاقستان تۋرالى ەستۋىم بولماسا العاش كەلۋىم. بۇگىن الماتىنىڭ ءبىراز جەرىن ارالادىم. حالقى وتە قوناقجاي ەكەن. ادامداردىڭ جۇزىنەن جىلىلىق بايقادىم.
قامبار ءماجيت ۇلى، اتىراۋ قالاسىنىڭ تۇرعىنى:
كاسسادان باستاپ قالاي كوتەرىلۋ كەرەك، قاي باعىتقا بارۋ كەرەك. اۆتوبۋسپەن باراسىڭ با، اسپالى جولمەن كوتەرىلەسىڭ بە سولاردىڭ بارلىعىن ايتىپ ءتۇسىندىرىپ، كەلگەن سوڭ فوتوگرافتار بار، ءارتۇرلى قىزمەتتەر كورسەتىپ جاتىر. ەستە قالاتىنداي جاقسى اسەر.
قالانىڭ تۋريزم باسقارماسى شەتەلدىك قوناقتارعا ىڭعايلى بولۋى ءۇشىن اعىلشىن تىلىندە سويلەيتىن سالا ماماندارىنىڭ سانىن ارتتىرۋدى قولعا العان.
اقمارال نۇراش قىزى، قالالىق تۋريزم باسقارماسى باسشىسىنىڭ ورىنباسارى:
ونىڭ ىشىندە كولىك توراپتارى قىزمەتىنىڭ قىزمەتكەرلەرى بار. شەكارا قىزمەتى، كەدەندىك جانە تەكسەرۋ قىزمەتتەرى بار. جانە تۋريستەردىڭ تىكەلەي ءوزارا ءىس-قيمىل جاسايتىن سالا ماماندارى، ەكسكۋرسوۆود، گيد، نۇسقاۋشىلار جانە تاعى باسقالار بار.
ەندى بيىل 150 شاقىرىمدى قۇرايتىن ۇلكەن جانە شاعىن شاتقالدار دەمالۋشىلارعا قولايلى ەتىپ جاسالىنباق. سونداي-اق ءۇش كەمپينگ-ايماق بولادى. ياعني وندا شاتىر، ورىندىعى بار ۇستەلدەر مەن ۇلتتىق ناقىشتاعى اتكەنشەكتەر قويىلماق. دەمالۋشىلارعا قولايلى جاعداي جاسالعانىنىڭ ارقاسىندا وسى جىلدىڭ العاشقى ءۇش ايىندا-اق جەرگىلىكتى بيۋدجەتكە 13،4 ميلليارد تەڭگە سالىق تۇسكەن. بۇل وتكەن جىلمەن سالىستىرعاندا 45 پايىزعا جوعارى.