كومپوزيتور، قازاقستاننىڭ ەڭبەك ەرى يليا جاقانوۆ داۋىس بەردى. ونەر زەرتتەۋشىسى «تاۋەلسىزدىكتىڭ ىرىسى مەن باقىتى كەلەر ۇرپاققا جايلى بولسا ەكەن» دەگەن تىلەگىن ءبىلدىردى، - دەپ حابارلايدى اlmaty-akshamy.kz قازاقپاراتقا سىلتەمە جاساپ.
قازاقتىڭ بەلگىلى ونەر قايراتكەرلەرى مەن اندەرىنىڭ تاريحىن زەرتتەپ، بىرنەشە كىتاپ جازعان يليا جاقانوۆتىڭ اتىراۋدا تۇرعانىنا 20 جىلدان اسقان. ول ۇنەمى ەلدىڭ قوعامدىق-ساياسي ومىرىنەن شەت قالماي، بەلسەندىلىگىن تانىتىپ جۇرەدى. وتكەن جىلى قازاقستاننىڭ ەڭبەك ەرى اتانعان يليا جاقانوۆ اتىراۋ قالاسىنداعى №7 سايلاۋ ۋچاسكەسىنە تىركەلگەن. بۇل سايلاۋ ۋچاسكەسىندە 2 314 سايلاۋشى داۋىس بەرىپ جاتىر. ال، بەلگىلى ونەر زەرتتەۋشىسى اتالعان سايلاۋ ۋچاسكەسىنە داۋىس بەرۋگە زايىبى تيىش التايەۆامەن بىرگە كەلدى.
«بۇگىنگى سايلاۋ – ەل ومىرىندەگى ۇلكەن وقيعا. ءبارىمىز ءۇشىن بۇل سايلاۋدىڭ جاۋاپكەرشىلىگى دە، ماڭىزى دا زور. سول سەبەپتەن، وسى سايلاۋدا تەك ءبىز عانا ەمەس، بارشا جۇرت سەنەتىن، جاۋاپتى جۇمىستار مەن ۇلكەن ىستەردىڭ باسى-قاسىنان تابىلا بىلەتىن، قوعامدا ءوزىنىڭ ەرەكشە ورنى بار، ءوزىنىڭ ەمەس، تۇتاس قوعامنىڭ قامىن ويلاپ، بولاشاعىنا بەيجاي قارامايتىن كانديداتقا داۋىس بەردىك. جاڭا قازاقستاننىڭ كەلەشەگى جارقىن بولۋى ءۇشىن سەرپىندى ىستەردىڭ جۇزەگە اسۋىنا ۇيىتقى بولاتىن قايراتتى، ىسكەر، ادال دەپۋتات قاجەت. ەلدىڭ سەنىمىنە يە بولعان سونداي دەپۋتتاتتار عانا ادىلەتتى قوعامدى قۇراتىن بولادى. وسى تۇرعىدان ايتقاندا، بۇگىنگى سايلاۋدا جىگەرلى، بىلىكتى، ءبىلىمدى كانديداتتىڭ عانا جۇلدىزى جانۋى كەرەك. جاڭارۋعا بەت بۇرعان قازاقستانىمىزدىڭ بولاشاعى ساۋلەلى، قادامى ەركىن بولىپ، تاۋەلسىزدىكتىڭ ىرىسى مەن باقىتى كەلەر ۇرپاققا جايلى بولسا ەكەن»، -دەدى يليا جاقانوۆ.