حالىقارالىق سيمپوزيۋم ونلاين رەجيمدە بولدى.
ءىس-شارانى قازاقستان رەسپۋبليكاسىنىڭ كونستيتۋسيالىق كەڭەسى «استانا» حالىقارالىق قارجى ورتالىعىمەن بىرلەسىپ ۇيىمداستىردى.
2021 جىلعى 27 تامىزدا قازاقستان رەسپۋبليكاسى تاۋەلسىزدىگىنىڭ 30 جىلدىعىنا جانە كونستيتۋسيا كۇنىنە ارنالعان «ينتەرنەت ءداۋىرى: قۇقىق ۇستەمدىگى، ادام قۇندىلىقتارى، مەملەكەتتىك تاۋەلسىزدىك» اتتى تاقىرىپتا حالىقارالىق سيمپوزيۋم ونلاين رەجيمدە ءوز جۇمىسىن باستادى، دەپ حابارلايدى Almaty-akshamy.kz «ايقىن» باسىلىمىنا سىلتەمە جاساپ.
حالىقارالىق سيمپوزيۋمدى كونستيتۋسيالىق كەڭەس ءتوراعاسى قايرات ءمامي اشىپ، كەز كەلگەن مەملەكەتتە تاۋەلسىزدىكتىڭ بۇكىلحالىقتىق قۇندىلىق ەكەنىن اتاپ ءوتتى.
رەسپۋبليكانىڭ قولدانىستاعى كونستيتۋسياسى تاۋەلسىزدىك كونتۋرىن تۇپكىلىكتى رەسىمدەدى جانە بارلىق سالالاردىڭ جەدەل دامۋى ءۇشىن قولايلى جاعداي جاسادى.
قازاقستان رەسپۋبليكاسىنىڭ پرەزيدەنتى ق.ك. توقايەۆتىڭ قۇتتىقتاۋى ءىس-شاراعا ەرەكشە ءمان بەردى. وندا اتاپ كورسەتىلگەندەي، مەملەكەتتىڭ دامۋى كونستيتۋسيا نەگىزىندە، ونىڭ ءارپى مەن رۋحىنا تولىق سايكەس جالعاسىپ كەلەدى. قازىرگى زامانعى مەملەكەت پەن ازاماتتىق قوعام جولىنداعى بارلىق ءىرى جەتىستىكتەر حالىقتىڭ ەرىك-جىگەرىمەن قابىلدانعان اتا زاڭعا نەگىزدەلگەن.
مەملەكەت باسشىسى سيمپوزيۋم تاقىرىبىنىڭ وزەكتىلىگىن اتاپ ءوتىپ، سيفرلىق دامۋدىڭ اۋقىمى مەن جىلدامدىعى حالىقارالىق قوعامداستىقتىڭ الدىنا ادام مەن ازاماتتىڭ ىرگەلى قۇقىقتارى مەن بوستاندىقتارىنىڭ ساقتالۋىن قامتاماسىز ەتۋ، ونىڭ زاڭدى مۇددەلەرىن قورعاۋ، سيفرلىق تەڭسىزدىكتى جويۋ، قوعام مەن مەملەكەتتىڭ سيفرلىق تاۋەلسىزدىگىن ساقتاۋ سياقتى ماڭىزدى مىندەتتەر قويىپ وتىرعانىنا نازار اۋداردى.
فورۋمنىڭ قوناقتارى قازاقستاندىقتاردى تاۋەلسىزدىك مەرەيتويىمەن قۇتتىقتاپ، سيمپوزيۋمدى تابىستى وتكىزگەنى جانە ازيالىق قاۋىمداستىققا ويداعىداي ءتوراعالىق ەتكەنى ءۇشىن قازاقستان رەسپۋبليكاسىنىڭ كونستيتۋسيالىق كەڭەسىنە شىنايى ريزاشىلىقتارىن ءبىلدىردى.