الماتىلىق تەاتردان تارتۋ.
الماتىلىق تەاتر ارتىستەرى ەلوردا كورەرمەنىمەن قاۋىشتى، دەپ حابارلايدى Almaty-akshamy.kz.
الماتىلىق ونەرپازداردىڭ ەل تاۋەلسىزدىگىنىڭ 30 جىلدىعىنا وراي ەلوردا كورەرمەنىنە تارتۋ جاسادى. اباي اتىنداعى قازاق مەملەكەتتىك اكادەميالىق وپەرا جانە بالەت تەاترى «استانا وپەرا» ساحناسىندا ونەر كورسەتتى. باس شاھار تۇرعىندارىنا ۇجىم ەۋروپالىق كورەرمەندەردىڭ كوزايىمىنا اينالعان سپەكتاكلدەردى الىپ كەلدى.
تەاتر ارتيستەرى يتاليالىق رەجيسسەر ماتتەو ءماسسونيدىڭ قويىلىمىنداعى گاەتانو دونيسەتتيدىڭ «دون پاسكۋالە» وپەراسىن، موريس راۆەلدىڭ «بولەرو»، فريدەريك شوپەننىڭ «شوپەنيانا»، يوگانن سەباستيان باحتىڭ «باح شىعارماشىلىعىن تانۋ» بالەتتەرىن ۇسىندى. تەاتر ءسوليسى تاير ءتاجىنىڭ ايتۋىنشا، مەرەكەلىك كونسەرتكە دايىندىق جۇمىستارى دەمالىسسىز بىرنەشە اي جۇرگەن.
«قيىندىقتار ءاردايىم بولادى. ءبىرىنشى كەزەكتە دون پاسكۋالە ءبىزدىڭ انا تىلىمىزدەگى قويىلىم ەمەس، يتاليا تىلىندە. سوندىقتان تىلدىك شەكتەۋسىز، اكسەنتسىز جەتكىزۋ، ورىنداۋ قيىنعا سوعادى. بۇل جەردە قاتەسىز، ءتۇپنۇسقاداعىداي ورىنداۋ ماڭىزدى، ارينە، ءوزىڭنىڭ ەرەكشەلىگىڭدى قوسۋ ارقىلى. سەبەبى اينىتپاي كوشىرىپ الۋعا بولمايدى. ال گاسترولدىك ساپارعا كەلەر بولساق، ءبىز بىرنەشە اي كولەمىندە دايىندالدىق. جازدىڭ باسىنان باستاپ دەمالىسسىز جۇمىس ىستەدىك. ەگەر سوليستەر شىلدە ايىندا دەمالىسقا كەتەتىن بولسا، ءبىز دايىندىقتا بولدىق. سەبەبى ءبىرىنشى كەزەكتە بۇل – ەلىمىزدىڭ تاۋەلسىزدىگىنە ارنالعان ماڭىزدى كونسەرت. وندا تومەن دەڭگەيدە ونەر كورسەتۋگە بولمايدى»، - دەدى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ جەتەكشى ءسوليسى تاير ءتاجى.