قاستەرلى تاۋەلسىزدىكتىڭ 30 جىلدىعىنا وراي ءداستۇرلى سۇحباتىمىزدى جالعاستىرامىز. وسىعان وراي اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى ت.تەبەگەنوۆتى سوزگە تارتقان ەدىك.
–تەمىرحان اعا، تاۋەلسىزدىك سىزگە نەسىمەن قىمبات؟
– راسىندا، ەگەمەن ەل بولۋ اتا-بابا اماناتىنىڭ ورىندالعانىمەن پاراپار. دۇنيەدە ەتەك-جەڭىن جيناعان، قارقىنداپ دامىعان قازاق ەلى بار. تاۋبە! بەيبىت مەكەندە ءسىز بەن ءبىز عۇمىر كەشۋدەمىز. ارتىمىزدان قاراكوزدەر ءوسىپ كەلەدى. ولاردى نوسەردەن كەيىنگى جايقالعان بايشەشەككە تەڭەيمىن. بۇگىندە سولاردىڭ اراسىندا ءدارىس بەرىپ جۇرگەن ءوزىمدى باقىتتى سانايمىن.
– جاستار تۋرالى وي قوزعادىڭىز، تولىعىراق ايتىپ بەرسەڭىز؟
– ۇلى اقىن، ويشىل دانا اباي اتامىزدىڭ ەسىمىمەن اتالاتىن ۋنيۆەرسيتەتتە ساباق بەرۋدەمىن. اسىرەسە، ولەڭ سوزگە جاقىنمىن. ءاردايىم شاكىرتتەرىمە اقىل-كەڭەسىمدى ايتىپ جۇرەمىن. كوبىنەسە دارىستەرىمدە ەركىندىك بەرىپ، كەڭەسىپ، پىكىر الماسىپ وتكەندى ءجون كورەم. سوندا الدىڭىزداعى بالانىڭ ويى سەرپىلىپ، ىلىمگە تىنىسى اشىلادى. سونداي-اق، وقىتۋشى دا شابىتتانادى. جاستارعا ۇلكەن سەنىممەن قارايمىن.
– ومىرلىك ۇستانىمىڭىز جونىندە ايتساڭىز؟
– فيلوسوفيالىق ساۋال قويىپ وتىرسىز. ادام بولىپ، عالامعا كەلگەننەن كەيىن بىرنارسەگە ۇمتىلادى. جاسىمنان اكەمنىڭ قاسىندا جۇرۋگە اۋەس بولدىم. اتقا مىندىك. سەرۋەن قۇردىق. سىردىڭ بويىندا تالاي قىزىق كەزدەر ءوتتى. تاپ-تاماشا بالالىق بال داۋرەندى كەشتىك. ەسەيىپ ەر جەتكەندە بارىپ ۇستانىمعا كوڭىل بولەدى ەكەنسىڭ. ءسىزدىڭ سۇراعىڭىزدىڭ ءمانىن ۋاقىتپەن بىرگە قالىپتاسادى دەمەكپىن.
– ەلىمىزدىڭ بولاشاعىن قالاي ەلەستەتەر ەدىڭىز؟
– بۇل دا ءپالساپالىق ۇعىم. «ءبىرىڭدى قازاق ءبىرىڭ دوس، كورمەسەڭ ءىستىڭ ءبارى بوس» دەپتى دانىشپان اباي. ول راس. قازاق حالقى ارعى-بەرگى تاريحىندا تالايدى كوردى. نەبىر وقيعالاردى باستان وتكەردى. ءبارىن ەڭسەردى. ءقازىر الەم تانىعان ايبىندى مەملەكەتكە اينالۋدا. ەندى وسى بيىكتى ۇستاپ، ىلگەرىلەي بەرۋ كەرەك. الدا ءعىلىم-بىلىمدى وركەندەتسەك، ۇتارىمىز كوپ بولماق. قازاقستاننىڭ بولاشاعى جارقىن بولارىنا سەنەمىن.
– سۇحباتىڭىزعا راقمەت!