المالى اۋدانىنا جۇمىس ساپارى بارىسىندا الماتى اكىمى دارحان ساتىبالدى جوندەۋ جۇمىستارى ءجۇرىپ جاتقان ا.يمانوۆ اتىنداعى سكۆەرگە باردى. مۇندا كەسپە تاستار توسەلىپ، سىرتقى جيھازدار جاڭارتىلىپ، پەرگولا ورناتىلىپتى. بۇعان دەيىن تۇرعىنداردىڭ وتىنىشىمەن بالالاردىڭ ويىن الاڭى مەن يت سەرۋەندەۋگە ارنالعان اۋماق جاسالعان بولاتىن.
سكۆەر مۇسىرەپوۆ اتىنداعى تەاتردىڭ ماڭىندا. مەگاپوليس اكىمى ونىڭ جاي-كۇيىمەن تانىستى، ونەر ورداسىننىڭ اينالاسىن كۇردەلى جاڭارتۋ جوسپارلانىپ وتىر. ساۋلەتشى نەللي لاپتيەۆا قالا باسشىسىنا اۋماقتى بولاشاقتا كوركەيتۋ جوباسىن ۇسىندى. جوبا اياسىندا زاماناۋي جارىق تارتىلىپ، ويىن الاڭى ورناتىلادى، اتكەنشەگى بار پەرگولا، ىڭعايلى دەمالىس ورىندارىن قۇرۋ سەكىلدى جۇمىستار جۇرگىزىلمەك.
جوبامەن تانىسۋ كەزىندە قالا باسشىسى كەڭىستىكتى تەاتر تاقىرىبىنا ساي بەزەندىرۋدىڭ ماڭىزدىلىعىنا توقتالدى. بۇل باعىتتا اۋەزوۆ اتىنداعى قازاق ۇلتتىق دراما تەاترى ماڭىنداعى اۋماقتىڭ كوركەمدەلۋ ۇلگىسى ەسكەرىلمەك.
ساۋلەتشى بۇل تۇجىرىمدامادا بالالارعا ارنالعان ويىن ەلەمەنتتەرى مەن ينتەراكتيۆتى جارىق جۇيەسى قاراستىرىلعانىن اتاپ ءوتتى. جارىق قۇرىلعىلار قيمىل-قوزعالىس كەزىندە، ادام جۇرگەندە اۆتوماتتى تۇردە جانادى.
جۇمىس ساپارىنىڭ سوڭىندا اكىم گوگول كوشەسىندەگى ءبىر اۋلاعا باردى. مۇندا «حالىق قاتىساتىن بيۋدجەت» باعدارلاماسى اياسىندا ينفراقۇرىلىم جاڭارتىلىپ جاتىر. دارحان ساتىبالدى تۇرعىندارمەن تىلدەسىپ، پىكىرىن تىڭدادى. الماتىلىقتار ۇسىنىستارىنىڭ ەسكەرىلگەنىن جانە جۇمىستاردىڭ ساپاسىنا كوڭىلى تولاتىنىن جەتكىزدى.