الماتىدا جەلتوقسان وقيعاسىنىڭ قاتىسۋشىلارى ستۋدەنتتەرمەن كەزدەسۋلەر وتكىزۋدە. بۇل جۇزدەسۋ كەشتەرىنىڭ ماقساتى – جاستاردىڭ پاتريوتتىق سەزىمدەرىن نىعايتۋ، ۇرپاقتار ساباقتاستىعىن جالعاستىرۋ. كەزدەسۋلەرگە مەگاپوليستەگى 20-عا جۋىق جەلتوقسان ۇيىمىنىڭ وكىلدەرى قاتىسۋدا.
ولاردىڭ قاتارىندا «جەلتوقسان اقيقاتى»، «پاتريوت-1986»، «عاسىر تاريحى. 1986 ج. جەلتوقسان»، «جەلتوقسان جۇلدىزدارى»، «جەلتوقسان زەينەتكەرلەرى»، جەلتوقسان 1986. تاۋەلسىزدىك»، «ءورشىل رۋح» سەكىلدى ۇيىمدارداعى جەلتوقسان وقيعاسىنىڭ قاتىسۋشىلارى بار.
بۇعان دەيىنگى كەزدەسۋلەر الماتى مەملەكەتتىك اۆتوموبيل قۇرىلىسى كوللەدجى، الماتى مەملەكەتتىك تۋريزم جانە قوناقجايلىلىق يندۋسترياسى كوللەدجى، كولىك جانە كوممۋنيكاسيا كوللەدجى، الماتى مەملەكەتتىك بيزنەس كوللەدجى جانە يننوۆاسيالىق كوللەدجدەر ستۋدەنتتەرى مەن وقىتۋشىلارى اراسىندا ءوتتى. جەلتوقسان وقيعاسىنىڭ قاھارماندارى جاستارمەن كەزدەسۋلەردە ەلىمىزدىڭ تاۋەلسىزدىگىنىڭ باستاۋى بولعان تاريحي وقيعا تۋرالى ەستەلىكتەرىمەن ءبولىستى.
«ءبىز جاساعان كەستە بويىنشا قالاداعى ءار ۇيىمنىڭ وكىلدەرىنەن قۇرالعان 7-8 جەلتوقسانشى وقۋ ورىندارىنا بارىپ، جاستارمەن كەزدەسەدى. ولار جاستارعا تاۋەلسىزدىك باستاۋى بولعان جەلتوقسان وقيعاسىنان سىر شەرتەدى. جەلتوقسانشى اعا-اپالارىنىڭ رۋحقا تولى اڭگىمەلەرىنەن جاستار وزدەرىنە وت الىپ، ەلجاندىلىق سەزىمدەرى ەسەلەنۋدە»، – دەيدى كەزدەسۋلەردى الماتى قالاسى قوعامدىق دامۋ باسقارماسىنىڭ قولداۋىمەن «پاتريوتتىق رۋح – باستى قۇندىلىق» جوباسى اياسىندا ۇيىمداستىرۋشى حالىقارالىق «جاناشىر» قوعامدىق قورىنىڭ باسشىسى جاڭىل اپەتوۆا.
كەزدەسۋ بارىسىندا ستۋدەنتتەر مەن وقىتۋشىلار جەلتوقسان قاھارماندارىنا سۇراقتار قويىپ، اشىق ديالوگ جۇرگىزدى.
سونىمەن قاتار، جاستار جەلتوقساندىق اعا-اپالارىنا پاتريوتتىق رۋحتاعى كونسەرتتىك باعدارلامالار مەن ارنايى قويىلىمدار ۇيىمداستىرىپ قارسى الۋدا.
راسىندا، جاستارعا سەرپىن بەرەر ءمۇنداي كەزدەسۋلەر قاجەت-اق. قازاقستاننىڭ ەڭ باستى قۇندىلىعى سانالاتىن تاۋەلسىزدىككە جول اشقان رۋحى اسقاق، تامىرى تەرەڭ جەلتوقسان تاريحىمىزدىڭ بولىنبەس بولشەگى دەسەك، ونىڭ ماڭىزىن ۇرپاقتان ۇرپاققا جەتكىزۋ بارىمىزگە بارىمىزگە پارىز.