«تاۋەلسىزدىك تاعىلىمى» - ماڭىزدى ماقالا
قازاقستان رەسپۋبليكاسى تۇڭعىش پرەزيدەنتى، ەلباسى نۇرسۇلتان ءابىش ۇلى نازاربايەۆتىڭ «تاۋەلسىزدىك تاعىلىمى» اتتى ماقالاسى جارىققا شىقتى. اتالمىش ماقالامەن مەن دە تانىسىپ، مۇقيات وقىپ شىقتىم.
ەلباسى تاۋەلسىزدىكتىڭ ءمانى مەن ماڭىزدىلىعىن، حالقىمىزدىڭ وتكەن كۇردەلى جولىن، قوعامىمىزدىڭ قالىپتاسۋى مەن ەكونوميكانىڭ جاڭا ارناعا بەت بۇرۋىن، حالىقارالىق ساياساتتاعى ورنامىز جايلى كەڭىنەن تارقاتىپ ايتتى.
تاۋەلسىزدىك جىلدارىندا جەتكەن ايتۋلى جەتىستىكتەرىمىزدىڭ بىرلەسكەن ورتاق ەڭبەكپەن، ۇلىستار اراسىنداعى اۋىزبىرشىلىكپەن جانە ءار قازاقستاندىقتىڭ ۇلەسىمەن جۇزەگە اسقاندىعىنا دا توقتالدى.
نۇرسۇلتان ءابىش ۇلى قابىلدانعان كۇردەلى شەشىمدەردى، ورىن العان ستراتەگيالىق سۇراقتاردىڭ جىلدام جانە سالماقتى تۇجىرىممەن قابىلدانعاندىعىن، وعان ءوزىنىڭ قوسقان ۇلەسى جانە تاۋەلسىزدىك جىلدارىندا ەل ءۇشىن اتقارعان ايتۋلى ەڭبەكتەرى، باتىل ءارى وڭ قادامدارى تۋرالى جان-جاقتى مالىمدەدى. وسىمەن قاتار، ەلباسى ءوزىنىڭ كوپشىلىك الدىندا سويلەگەن سوزىندە كەيبىر ماسەلەلەردىڭ استارىندا ۇلكەن ساياسات جاتقاندىعىن ايقىن اڭعارىپ، وعان قاتىستى ويىن اشىق جەتكىزىپ، باتىل قادامدار جاساعاندىعىن دا ايتىپ ءوتتى. بۇل ءوز كەزەگىندە ەلىمىزدىڭ دەربەس مەملەكەت بولىپ قالىپتاسۋىندا ماڭىزدى رولگە يە ەكەندىگى انىق.
ءبىراق، ەلباسى ەل ەگەمەندىگىنە، تۋعان حالقىنىڭ ومىرىنە قاتىستى بارلىق ءتۇيىندى ماسەلەلەردى تەك ءوز ىقپالىمەن عانا تارقاتتىم دەپ ماساتتانعان جوق. ول ەڭ اۋەلى تاريحتى تەرەڭىنەن قوزعاپ، تاۋەلسىزدىك جولىندا ءبىزدىڭ اتا-بابالارىمىزدىڭ ەڭبەگى ەرەن، ءرولى باسىم ەكەندىگىن ەرەكشە اتاپ ءوتتى. بۇل ءبىرىنشى كەزەكتە ەلباسىنىڭ كورەگەندىگىن اڭعارتادى. ەكىنشىدەن، ونىڭ وسىنداي ءومىر جولى وسكەلەڭ ۇرپاق ءۇشىن ونەگە ەكەندىگىن ۇعىنۋىمىز قاجەت. ەلباسىنىڭ باستاعان ساليقالى ساياساتى بۇگىندە جالعاسىن تاۋىپ، قازاقستان تاڭداعان جولىن جۇيەلى تۇردە جالعاستىرىپ كەلەدى.
سوندىقتان، «تاۋەلسىزدىك تاعىلىمى» ماقالاسى وسكەلەڭ ۇرپاقتى بىلىمگە، پاراساتتىلىققا، باتىلدىققا، تاريحىمىزدى ءبىلىپ، وتكەننەن ساباق الۋعا جانە كەمەل كەلەشەگىمىزگە نىق قادام باسۋعا شاقىراتىن ماڭىزدى ماقالا دەپ بىلەمىن.