تاۋەلسىزدىك كۇنى الماتىدا «سۇڭقار» حالىقارالىق شاڭعى ترامپلينىندە سپورت كەشەنى اشىلدى

قالا اكىمى باقىتجان ساعىنتايەۆ سپورت كەشەنىنەن، بەيىمدەۋ ورتالىعىنان جانە جابىق ءجۇزۋ باسسەينىنەن تۇراتىن ەكىنشى كەزەكتەگى «سۇڭقار» حالىقارالىق شاڭعى ترامپلينىنە باردى

سپورت كەشەنى 6 مىڭ شارشى مەتردەن استام اۋماقتا ورنالاسقان، دەپ حابارلايدى Almaty-akshamy.kz

ول ءارتۇرلى سپورت تۇرلەرى بويىنشا اۋقىمدى شارالارعا ارنالعان: ەركىن، گرەك-ريم جانە ايەلدەر كۇرەسى، كازاك كۇرەسى، بوكس، دزيۋدو، تاەكۆوندو، ميني-فۋتبول، ۆولەيبول، باسكەتبول، گاندبول جانە ت.ب.

سپورت كەشەنى 1285 ورىنعا ەسەپتەلگەن (658 ستاسيونارلىق وتىراتىن ورىن، جىلجىمالى مىنبەلەردە – 627 ورىن). سپورت الاڭىنىڭ كولەمى – 22ح42 مەتر، توبەسىنىڭ بيىكتىگى – 12 مەتر.

كەشەن جاتتىعۋعا قاجەتتى سپورتتىق قۇرال-جابدىقتارمەن تولىق جابدىقتالعان. پاركەت جۇيەسىنە ەرەكشە نازار اۋدارىلادى، وڭتايلى ۇيكەلىس كوەففيسيەنتى بار ارنايى جابىن سپورتشىلاردىڭ قاۋىپسىزدىگىن قامتاماسىز ەتەدى.

7 جولعا ارنالعان 25ح16 مەترلىك جابىق ءجۇزۋ باسسەينى ءتۇرلى سۋ سپورت تۇرلەرى بويىنشا ءىرى، سونىڭ ىشىندە حالىقارالىق جارىستاردى وتكىزە الادى.

سونداي-اق، ورتالىقتا ساۋىقتىرۋ جانە دەمالۋ ءۇشىن ءۇي-جايلار، دۋش، ماسساج كابينەتى، كيىم شەشەتىن بولمەلەر، مەديسينالىق كابينەت، ساۋنا جانە جاتتىقتىرۋشى بولمەلەرى قاراستىرىلعان. ب ا ق ءۇشىن كوممەنتاتورلىق جانە پاركينگ بار.

بەيىمدەۋ-جاتتىعۋ ورتالىعىندا ءىس-شارالاردى وتكىزۋ ءۇشىن تولىق جابدىقتالعان 108 بولمە، ءۇش زاماناۋي كونفەرەنس-زال بار. 500 ورىندى سپورتشىلارعا ارنالعان ديەتولوگتىڭ قىزمەتتەرى بار كافە، باسسەينى بار اشىق جازعى الاڭ قاراستىرىلعان.

جوباعا 7،7 ملرد تەڭگە ينۆەستيسيالاندى. Almaty Business 2025 كاسىپكەرلىكتى دامىتۋ وڭىرلىك باعدارلاماسى اياسىندا سپورتتىق قۇرال-جابدىقتار ساتىپ الۋعا 84 ايعا جىلدىق 6%-بەن 500 ملن تەڭگە سوماسىندا جەڭىلدىكتى نەسيە بەرىلدى. وسى جوبانى قارجىلاندىرۋ اياسىندا باسسەيندەگى اۋتيست بالالارعا ارنالعان نۇسقاۋشىمەن تەگىن جاتتىعۋ مۇمكىندىگى قامتاماسىز ەتىلدى.