تاۋەلسىزدىك كۇنى مەگاپوليس اكىمى باقىتجان ساعىنتايەۆ Medeu Park Hotel قۇرىلىسىنىڭ جوباسىمەن تانىستى. 2022 جىلدىڭ سوڭىنا قاراي «مەدەۋ» قوناق ءۇيىنىڭ ورنىنا جاڭا قوناق ءۇي سالۋ جوسپارلانۋدا، دەپ حابارلايدى اlmaty-akshamy.kz
«مەدەۋ» مۇز ايدىنىندا قوناق ءۇي ينفراقۇرىلىمىن قالپىنا كەلتىرۋ جوباسى قازاقستاندىق جانە شەتەلدىك تۋريستەردى تارتۋ ءۇشىن ىسكە اسىرىلۋدا. قۇرىلىس الاڭىن ارالاۋ بارىسىندا ب. ساعىنتايەۆ قوناق ءۇي جوباسىمەن تانىستى. ءۇش قاباتتى ەكى عيماراتتان تۇراتىن كەشەن 2،1 گا اۋماقتا سالىنادى، ءبىرىنشى قاباتتا 90 ورىندىق قوناق ءۇي جانە 300 ورىندىق مەيرامحانا، ەكىنشى قاباتتا – اپارت-وتەل بولادى.
ەكى بلوكتىڭ قوناقتارىنا ارنالعان قوناق ۇيدە 25 مەترلىك باسسەين، سپا، كونفەرەنس-زالدار، سەرۋەندەۋگە جانە دەمالۋعا ارنالعان اشىق دەمالىس ورنى بولادى.
جاڭا قوناق ءۇي كەشەنىن جوبالاۋ كەزىندە بارلىق قاجەتتىلىكتەر، سونىڭ ىشىندە قالىپتاسقان تابيعي-ساۋلەتتىك انسامبل، قورشاعان ورتانى قورعاۋ شارالارى، دەمالۋشىلاردىڭ قاجەتتىلىكتەرى ەسكەرىلدى.
كەشەن اۋماعىندا سونداي-اق بىرنەشە قوعامدىق سانيتارلىق توراپتار، شۇعىل مەديسينالىق كومەك كورسەتۋ پۋنكتى، ۆەلوپاركوۆكالار، گادجەتتەردى قۋاتتاۋعا ارنالعان نۇكتەلەر جانە بەينەباقىلاۋ جۇيەسى قاراستىرىلعان.
ۇلتتىق پاراليمپيادا كوميتەتىمەن ىنتىماقتاسىپ، ينكليۋزيۆتى ورتانى قامتاماسىز ەتۋ ءۇشىن مۇندا مۇمكىندىگى شەكتەۋلى ادامداردى تاسىمالداۋعا ارنالعان ورىندار، سونداي-اق كىرەبەرىستەر مەن ليفتىلەرگە كەدەرگىسىز قولجەتكىزۋ قامتاماسىز ەتىلگەن.
2020 جىلى تۋريزم يندۋسترياسى كوروناۆيرۋستىق پاندەميادان زارداپ شەككەندەردىڭ ءبىرى بولدى. دەگەنمەن، ىشكى تۋريستەر سانى 422 مىڭ ادامدى قۇرادى.
2021 جىلدىڭ ەكىنشى توقسانىنىڭ قورىتىندىسى بويىنشا، الماتىداعى تۋريستەردىڭ جالپى سانى 501،4 مىڭنان استام ادامدى قۇرادى، ونىڭ ىشىندە شەتەلدىك تۋريستەر – 54،2 مىڭ، ىشكى تۋريستەر - 447،2 مىڭنان استام.