ماڭىزدى قۇجاتقا شولۋ جاسالدى
رەسپۋبليكا كۇنى قارساڭىندا الماتى قالاسى قوعامدىق دامۋ باسقارماسى جانە پەداگوگيكالىق عىلىمدار اكادەمياسىنىڭ ۇيىمداستىرۋىمەن 19 قازان كۇنى دوستىق ۇيىندە «ەگەمەندىك دەكلاراسياسى – تاۋەلسىزدىك باستاۋى» تاقىرىبىندا عىلىمي-پراكتيكالىق كونفەرەنسياسى ءوتتى.
ءىس-شاراعا XII شاقىرىلعان قازاقستان رەسپۋبليكاسى جوعارعى كەڭەسىنىڭ دەپۋتاتتارى، زيالى قاۋىم، عىلىمي جانە شىعارماشىلىق سالاسىنىڭ قايراتكەرلەرى مەن الماتى قالاسى ءماسليحاتى دەپۋتاتتارى، سونداي-اق، الماتىداعى جوو جانە كوللەدجدەردىڭ پروفەسسور-وقىتۋشىلار قاۋىمى، ماگيسترانتتار مەن دوكتورانتتار، ب ا ق قۇرالدارى وكىلدەرى قاتىستى. ءىس-شارا اياسىندا ق ر پرەزيدەنتى ءارحيۆى ۇيىمداستىرۋىمەن تاقىرىپتىق كورمە ۇيىمداستىرىلدى.
ماقساتى – تاۋەلسىزدىكتىڭ باستاۋى بولعان قۇجاتتىڭ ماڭىزدىلىعىن ايشىقتاپ، ەگەمەندىكتى نىعايتىپ، ەلدى ودان ءارى دامىتۋعا باعىتتايتىن ءىس-شارانىڭ حالىقتىڭ ءال- اۋقاتىن ارتتىرۋعا جانە ساياسي ترانسفورماسيانى ىسكە اسىرۋدا ماڭىزى زور.
كونفەرەنسيادا تاريحي كۇننىڭ باسى-قاسىندا بولىپ، قۇندى قۇجاتتىڭ قابىلدانۋىنا اتسالىسقان جوعارعى كەڭەس ءتورالقاسىنىڭ مۇشەسى، كوميتەت ءتوراعاسى، XII شاقىرىلعان قازاق كسر جوعارعى كەڭەسىنىڭ دەپۋتاتى، ق ر مەملەكەتتىك سىيلىقتىڭ لاۋرەاتى ورازالى سابدەن تاۋەلسىزدىك العان ۋاقىتتاعى ساتتەرىن ەرەكشە تەبىرەنىسپەن ەسكە الدى.
– قازاق كسر جوعارى كەڭەستە ەگەمەندىك تۋرالى دەكلا راسيا قابىلداعان ءسات ءالى ەسىمىزدە. تاۋەلسىزدىك العان كەزدەگى ىشكى تولقىنىسىمىز كوزىمىزدەن جاس بولىپ شىقتى. سەبەبى، بۇل اتا-بابالارىمىز اڭساعان، ارمانداعان ەگەمەندىك بولاتىن. ءبىزدىڭ بابالارىمىز قارۋدىڭ كۇشىمەن ەلدى قورعاسا، ءبىز ءبىلىمنىڭ كۇشىمەن ەگەمەندىككە ۇمتىلدىق. بۇل كۇن قازاق ەلىنىڭ ازاتتىق كۇنى، بۇدان ارتىق كۇن جوق، – دەدى ق ر ۇعا اكادەميگى.
ءوز كەزەگىندە تاريح عىلىمدارىنىڭ دوكتورى، پروفەسسور گەورگيي كان ماڭىزدى قۇجاتتى جازعان ازاماتتاردى قۇرمەتتەپ، ەستە ساقتاۋىمىز كەرەك ەكەنىن تىلگە تيەك ەتتى:
– بىرىنشىدەن، دەكلاراسيادان كەيىن زاڭ قابىلدانادى. ەلدىڭ تۇتاستىعى پايدا بولادى. ال ەكىنشىدەن، كەز كەلگەن ادام رەسپۋبليكا كۇنىن ەرەكشە قابىلدايدى. ءبىز وسى دەكلاراسيانى جازعان ادامداردى قۇرمەتتەپ ەسىمىزد ە ساقتاۋىمىز كەرەك. سەبەبى، وسى XII قازاق كسر جوعارعى كەڭەسىنە شاقىرىلعان دەپۋتاتتار ەگەمەندىككە قول جەتكىزۋ ءۇشىن تالاي ماڭداي تەرىن توكتى، – دەدى.
ەل تاۋەلسىزدىگىنىڭ باستاۋى بولعان ەگەمەندىك تۋرالى دەكلاراسيانىڭ ماڭىزىن ايشىقتاپ، ءمانىن تۇسىندىرگەن كونفەرەنسيا جاستاردىڭ ەلىن، جەرىن سۇيۋگە، ەگەمەندىكتىڭ ءقادىرىن تۇسىنۋىنە ەرەكشە اسەر ەتتى.