قازاقستان رەسپۋبليكاسى پرەزيدەنتى جانىنداعى ۇلتتىق قۇرىلتاي مۇشەسى، ق ر پارلامەنتى ءماجىلىسىنىڭ VI شاقىرىلىم دەپۋتاتى شايماردان نۇرىموۆ:
– بۇل كۇن ءاربىر قازاقستاندىقتىڭ ومىرىندە ەرەكشە ماڭىزعا يە. ول ءبىزدىڭ ەگەمەن ەلىمىزدىڭ قۋاتتى، دەربەس جانە تاۋەلسىز مەملەكەت رەتىندە جەتكەن تابىستارىنىڭ سيمۆولىنا اينالدى. قازاقستاننىڭ حالىقارالىق ارەناداعى بەدەلى ارتىپ، پىكىرىنە قۇلاق اساتىن ەلگە اينالعانىن كورسەتەدى.
تاۋەلسىزدىك جىلدارىندا ءبىز ءوز كونستيتۋسيامىزدى قابىلداپ، زاڭدارىمىزدى بەكىتتىك، تۇراقتى ەكونوميكا قۇردىق. كورشى ەلدەرمەن مەملەكەتتىك شەكارامىزدى دەليميتاسيالادىق، قۋاتتى اسكەر جاساقتادىق جانە الەمنىڭ ءارتۇرلى ەلدەرىمەن تابىستى ساۋدا قارىم-قاتىناسىن جولعا قويدىق. ەلىمىزدە 100-دەن استام ۇلت وكىلى تاتۋلىق پەن ىنتىماقتاستىقتا ەڭبەك ەتىپ، بولاشاق ۇرپاقتىڭ يگىلىگى ءۇشىن ايانباي قىزمەت ەتۋدە.
قازاقستان بۇۇ-نىڭ تولىققاندى مۇشەسى جانە كوپتەگەن حالىقارالىق، ايماقتىق ۇيىمدارعا بەلسەندى قاتىسۋشى. ءبىز يادرولىق قارۋدان باس تارتىپ، بۇكىل الەمگە بەيبىتسۇيگىشتىك پەن كورشى ەلدەرمەن دوستىق قارىم-قاتىناس ورناتۋ ۇلگىسىن كورسەتتىك. بۇل تەك كورشى مەملەكەتتەرمەن عانا ەمەس، سونىمەن قاتار بۇكىل وركەنيەتتى الەممەن ۇيلەسىمدى بايلانىستار قۇرۋعا نەگىز بولدى.
ءاربىر قازاقستاندىق ءۇشىن بۇل مەرەكە – ەلىمىزدىڭ قول جەتكىزگەن تابىستارى ءۇشىن ماقتانىش جانە قازاقستاننىڭ جارقىن بولاشاعى ءۇشىن ايانباي ەڭبەك ەتۋگە دەگەن نيەتتىڭ مەرەكەسى.
بارشا وتانداستارىمدى شىن جۇرەكتەن قۇتتىقتايمىن! ءبىزدىڭ ورتاق ءۇيىمىز – قازاقستانىمىز گۇلدەنە بەرسىن!