ءتىل ادامداردىڭ قارىم-قاتىناس قۇرالى بولعاندىقتان، ول سويلەۋ ارەكەتىنىڭ ارقاۋى بولىپ تابىلادى. ءتىل – ۇلت پەن ۇلتتى جاقىنداستىراتىن وزگەشە قاتىناس قۇرالى. ادام ءتىل ارقىلى بىر-بىرىمەن قاتىناسا الادى. ۇلت ۇستازى ا. بايتۇرسىن ۇلىنىڭ «ۇلتتىڭ ساقتالۋىنا دا، جوعالۋىنا دا سەبەپ بولاتىن نارسەنىڭ ەڭ قۋاتتىسى – ءتىل»،-دەپ ءتىلىمىزدىڭ ساقتالۋىنا ەرەكشە باعا بەرگەن.
الماتى قالاسىنىڭ ناۋرىزباي اۋدانى №176 مەكتەپ-گيمنازياسىندا قازاق ءتىلى مەن ادەبيەتى ءپانى بىرلەستىگىنىڭ ۇيىمداستىرۋىمەن 5 قىركۇيەك – قازاقستان حالقى تىلدەرى كۇنى مەرەكەسىنە وراي «ءتىلىم مەنىڭ – تىرەگىم» اتتى ادەبي كەش ءوتتى. مەكتەبىمىزدىڭ وقۋشىلارى انا ءتىلىنىڭ قاسيەتى، قۇدىرەتى ارقىلى تالاي تاماشا تۋىندىلاردى دۇنيەگە اكەلگەن ءسوز شەبەرلەرىنىڭ تۋعان تىلىنە ارناعان جىر جولدارىن مانەرلەپ وقىدى. اتاپ ايتار بولساق، 8 «د» سىنىپ وقۋشىسى قۇتتىعالييەۆا اقەركە «قازاق ءتىلى»، 8 «ا» سىنىپ وقۋشىلارى سەرىكحان عازيزا، ەسەن كاۋسار، 8 «گ» سىنىپ وقۋشىسى ەركىن اراي، 7 «د» سىنىپ وقۋشىسى جۇماعۇل ارۋجان، 9 «گ» سىنىپ وقۋشىسى ءسادۋاقاس يسلام، 6 «گ» سىنىپ وقۋشىلارى تاڭىربەرگەن ەراسىل، تۇرسىنحان ەراسىل، 5 «ۆ» سىنىپ وقۋشىسى رىسقۇلبەك اياۋلىم اقىن ولەڭدەرىن مانەرلەپ وقىدى.
ادەبي كەش بارىسىندا وقۋشىلارعا «ءتىل تاعدىرى – ۇلت تاعدىرى» فيلمىنەن ءۇزىندى كورسەتىلىپ، 8-9-سىنىپ وقۋشىلارى ۇلت زيالىلارىنىڭ ءتىل تۋرالى قاناتتى سوزدەرىن وقىدى. قازاق ءتىلى مەن ادەبيەتى ءپان بىرلەستىگىنىڭ ۇستازدارى انا ءتىلىمىز جايىندا ولەڭ شۋماقتارىن مانەرلەپ وقىپ، وقۋشىلاردى ءتىلىمىزدى شۇبارلاماۋعا، انا ءتىلىمىزدى قۇرمەتتەۋگە، مارتەبەمىن بيىك ۇستاۋعا شاقىردى. ادەبي كەشتە كورەرمەندەرگە كۇمبىرلەگەن كۇيىمەن بويعا شابىت سىيلاعان مەكتەبىمىزدىڭ كۇيشى وقۋشىلارى ءوز ونەرلەرىن كورسەتسە، مىڭ بۇرالعان «شاشۋ» بي توبى كەشىمىزدىڭ ءسانىن كەلتىردى.
مەكتەپ-گيمنازيا ديرەكتورى نۇرجامال ەسىركەپوۆنا مەن ديرەكتوردىڭ وقۋ-تاربيە ءىسى جونىندەگى ورىنباسارى ابىلاي كوپبەرگەن ۇلى ءسوز كەزەگىن الىپ، وقۋشىلارعا انا ءتىلىنىڭ مەملەكەت ءۇشىن ماڭىزىن ايتا كەلىپ، ادەبي كەشتى جوعارى دەڭگەيدە ۇيىمداستىرىلعان رۋحاني ازىق بولاتىن كەش بولدى دەپ ءوز باعاسىن بەردى. كەش سوڭىندا ۇستازدارىمىز «جاسا، قازاقستان» ءانىن ورىنداپ، كەشتىڭ نۇكتەسىن قويدى. انانىڭ اق سۇتىمەن، اجەنىڭ الديىمەن بويىمىزعا دارىعان انا ءتىلىمىزدى ارداقتاي بىلەيىك! تۋعان ءتىلىمىز ەگەمەندىگىمىزدىڭ بەلگىسىنە، تاۋەلسىزدىگىمىزدىڭ سيمۆولىنا اينالسىن!