تاۋلاردا ءورت ءقاۋپى جوعارى.
الماتى وبلىسىنىڭ تجد مالىمەتىنشە، الماتى وبلىسىنىڭ تاۋلارىندا ءورت ءقاۋپى بار ماۋسىمدا جۇزدەن استام اسكەري قىزمەتشى جاۋىنگەرلىك كەزەكشىلىككە تۇسەدى، دەپ حابارلايدى Almaty-akshamy.kz 24.kz-كە سىلتەمە جاساپ.
مۇنى ەلىمىزدىڭ ءار ايماعىندا بولعان ءىرى ءورت راستايدى. «ءورت ءقاۋپى بار كەزەڭ باستالعاننان بەرى وبلىس اۋماعىندا مەملەكەتتىك ورمان قورى اۋماعىنداعى قۇرعاق ءشوپ پەن وسىمدىكتەر 21 رەت ورتەندى. جالپى اۋدانى 16 418 گا، ماتەريالدىق شىعىنى 19 ملن 681 مىڭ تەڭگە، ەلدى مەكەندەردەن تىس جەرلەردە 148 گا الاڭدا قۇرعاق ءشوپ 99 رەت ورتەندى» دەپ حابارلادى تجد. الماتى وبلىسىنىڭ تالعار جانە قاراساي اۋداندارى مەن بەكەتتەرىندە ءورت ءقاۋپى بار كەزەڭدە قاۋىپسىزدىكتى قامتاماسىز ەتۋ ءۇشىن 120 اسكەري قىزمەتشى جاۋىنگەرلىك كەزەكشىلىك اتقارادى. ولار ىلە وزەنى بويىنداعى قۇتقارۋشىلار بازاسىنداعى ازاماتتىق قورعانىس 28237 اسكەري ءبولىمىنىڭ ساربازدارى.
«اسكەري قىزمەتشىلەرمەن ورمان ورتىنە ارەكەت ەتۋ جانە الدىن الۋ ءىس-شارالارىن جۇرگىزۋ بويىنشا نۇسقاۋلىقتار وتكىزىلدى. الماتى وبلىسى تجد قىزمەتكەرلەرى اسكەري قىزمەتشىلەرمەن بىرلەسىپ كۇن سايىن حالىقتىڭ دەمالاتىن ورىندارىندا رەيدتىك ءىس-شارالار وتكىزەدى. رەيدتىك ءىس-شارالاردى وتكىزۋ ءۇشىن پوليسيا قىزمەتكەرلەرى مەن ەرىكتىلەر، ورمان شارۋاشىلىعى جانە ۇلتتىق پاركتەر تارتىلادى. ازاماتتىق قورعانىس كۇشتەرى، جەرگىلىكتى پوليسيا قىزمەتى، ورمان مەكەمەلەرى مەن جاو-دان 51 ادامنان تۇراتىن 10 ءموبيلدى توپ قۇرىلدى» دەلىنگەن تجد حابارلاماسىندا.
سونداي-اق ۆەدومستۆونىڭ مالىمەتىنشە، قۇرعاق ءشوپتىڭ ورتەنۋىنە اكەلگەن ءورت قاۋىپسىزدىگىنىڭ بەلگىلەنگەن ەرەجەلەرىن بۇزعانى ءۇشىن 23 جەكە جانە زاڭدى تۇلعا اكىمشىلىك جاۋاپقا تارتىلىپ، 1 ملن 483 مىڭ تەڭگە كولەمىندە ايىپپۇل سالىندى. الماتى وبلىسىنىڭ تجد وبلىس تۇرعىندارىنا، تۋريستەرگە جانە قوناقتارعا ءورت ءقاۋپى بار ماۋسىمدا ءورت قاۋىپسىزدىگىنىڭ بارلىق تالاپتارىن ساقتاۋعا شاقىردى.