كولىك قولجەتىمدىلىگىن جاقسارتۋ جانە قالا ماڭىنداعى ايماقتىڭ تۇرعىندارىن قوعامدىق كولىكپەن قامتاماسىز ەتۋ ءۇشىن الماتى قالاسىنىڭ اكىمدىگى بيىل قالا ماڭىنداعى 10 جاڭا مارشرۋتتى ىسكە قوسۋدى جوسپارلاپ وتىر.
ولار قالا شەگىنەن 50 كم راديۋستا ورنالاسقان الماتى وبلىسىنىڭ تالعار، ىلە، قاراساي جانە جامبىل اۋداندارىنداعى ءبىرقاتار ەلدى مەكەندى قامتيدى، دەپ حابارلايدى Almaty-akshamy.kz.
مارشرۋتتار جەتىسۋ بازارى – داۋلەت كەنتى، «الماتى 1» تەمىرجول ۆوكزالى - تۋعانباي كەنتى، نۇرا، «الماتى 2» تەمىرجول ۆوكزالى – تۇزدىباستاۋ كەنتىندەگى «سۇلتان» كەشەنى، «رايىمبەك باتىر» مەترو بەكەتى – ەلامان كەنتى، «ساياحات» اۆتوۆوكزالى – قاروي كەنتى، «سالەم» بازارى سولتۇستىك اينالما – يسايەۆ كەنتى، «ادەم» ساۋدا ءۇيى – باتىر كەنتى باعىتتارى بويىنشا جۇرەدى. سونىمەن بىرگە، تولە بي-ياسساۋي كوشەلەرىنىڭ قيىلىسىنداعى بۇرىلىستان قارعالى، شامالعان جانە مىڭبايەۆ ەلدى مەكەندەرى باعىتىندا بىرنەشە مارشرۋت ۇيىمداستىرىلادى.
سونىمەن قاتار، بيىل №9 جاڭا قالالىق مارشرۋت اشىلىپ، №97 جانە №89 ەكى جاڭا مارشرۋتتىڭ اشىلۋى جوسپارلانعان.
جاڭا مارشرۋتتار الەۋمەتتىك ماڭىزى بار قاتىناستارعا جانە حالىق ءۇشىن قوعامدىق كولىكتە جول ءجۇرۋدىڭ قولجەتىمدىلىگىن قامتاماسىز ەتۋ ماقساتىندا سۋبسيديالاۋعا جاتادى.
ايتا كەتەيىك، «الماتى قالاسىن دامىتۋدىڭ 2025 جىلعا دەيىنگى باعدارلاماسىنا جانە 2030 جىلعا دەيىنگى ورتا مەرزىمدى پەرسپەكتيۆاعا» سايكەس، 2024 جىلدىڭ سوڭىنا دەيىن الماتى قالاسىنىڭ اكىمدىگى قالا ماڭىنداعى 30 جاڭا مارشرۋتتى ۇيىمداستىرۋدى جوسپارلاپ وتىر.
قازىرگى تاڭدا قالالىق موبيلدىلىك باسقارماسى مارشرۋتتاردى بەكىتۋ جانە ولاردى الەۋمەتتىك ماڭىزى بار مارشرۋتتار تىزىلىمىنە ەنگىزۋ تۋرالى قاۋلى جوباسىن ازىرلەدى. قۇجاتپەن www.legalacts.kz اشىق نورماتيۆتىك-قۇقىقتىق اكتىلەر پورتالىندا تانىسۋعا بولادى. تاسىمالداۋشىنى جانە وسى باعىتتاردى ىسكە قوسۋ مەرزىمىن ايقىنداۋعا ارنالعان بايقاۋ قالا ءماسليحاتى قۇجاتتى بەكىتكەننەن كەيىن وتكىزىلەدى.