قالا جاستارى ۇلتتىق مادەنيەتىمىزدى، ءسالت-داستۇرىمىزدى كەڭىنەن ناسيحاتتادى
مادەنيەت جانە ۇلتتىق ءسالت-داستۇر كۇنىنە وراي الماتى قالاسىنىڭ كوميۋنيتي ورتالىعىندا قالا جاستارى ۇلتتىق مادەنيەتىمىز بەن ءسالت-داستۇرىمىزدى كەڭىنەن ناسيحاتتاۋ ماقساتىندا تەاترلاندىرىلعان كورىنىس دايىندادى. شارا قوناقتارىنا ۇلتتىق تاعامداردان ءدام تاتقىزىپ، قوناقجايلىقتىڭ ادەمى ۇلگىسىن كورسەتتى.
«شارانىڭ ماقساتى - ۇلتتىق قۇندىلىقتاردى دارىپتەۋ، قازاقتىڭ سالت-داستۇرىندەگى ۇلتتىق ونەگەنى ناسيحاتتاۋ»، - دەيدى ۇيىمداستىرۋشىلار.
«ناۋرىز مەيرامى – كوكتەمگى جاڭارۋ مەرەكەسى، كوكتەمگى كۇن مەن ءتۇننىڭ تەڭەسۋىمەن تۇسپا-تۇس كەلەتىن جاڭا جىلدىڭ باسى، بۇل – ماحابباتتىڭ، قۇنارلىلىق پەن دوستىقتىڭ سالتانات قۇرۋ مەرەكەسى. بۇل مەرەكە ءبىزدى ءوز مادەنيەتىمىز بەن تۋعان جەرىمىزدى قۇرمەتتەۋگە، ەلىمىزدە تۇراتىن ءتۇرلى ۇلتتار مەن ۇلىستار اراسىنداعى تاتۋلىق پەن ءوزارا تۇسىنىستىكتى ساقتاۋعا ۇمتىلۋعا ۇيرەتەدى. ناۋرىز مەيرامىن تويلاۋ جاستاردىڭ كوشپەلىلەر وركەنيەتى تۋرالى بىلىمدەرىن قالىپتاستىرۋعا، تاريحي ۇعىمدار تۋرالى بىلىمدەرىن ارتتىرۋعا، كوشپەندىلەر مادەنيەتى مەن قازاق حالقىنىڭ تاريحىنا دەگەن قۇرمەت پەن سۇيىسپەنشىلىكتى تاربيەلەۋگە مۇمكىندىك بەرەدى»، - دەدى المالى اۋدانى كومنيۋنيتي ورتالىعىنىڭ جەتەكشىسى باعدات اناربايەۆا.
سونىمەن قاتار، ناۋرىزناما ونكۇندىگى اياسىندا، قالانىڭ بەلسەندى جاستارى “National day” چەللەندجىن باستادى. چەللەندج اياسىندا، جاستار ۇلتتىق كيىمدەردىڭ زاماناۋي نۇسقاسىن ۇسىنىپ، چەللەندجگە قوسىلۋعا شاقىردى. زاماناۋي ۇلتتىق كيىمدەردى «AR» دەمالىس ورتالىعىنىڭ بەلسەندىلەرى جاساعان.
«وسى ءىس-شارا اياسىندا ءبىز ۇلتتىق كيىم ادەمى عانا ەمەس، سونىمەن قاتار جاستار ءۇشىن وتە ءستيلدى جانە كۇندەلىكتى ومىردە ىڭعايلى بولاتىنىن كورسەتكىمىز كەلدى»، - دەپ اتاپ ءوتتى شارانى ۇيىمداستىرۋشىلار.
ايتا كەتەيىك، ناۋرىز مەيرامى اياسىندا قالاداعى بارلىق كوميۋنيتي ورتالىقتارىندا جاستارعا ارنالعان ءتۇرلى ءىس-شارالار جوسپارلانعان.