بۇگىندە قاي ەتنوس بولسىن، ءبارى دە ەلىمىزدە قالاعان جۇمىسىمەن اينالىسىپ، ءوز ءتىلىن، مادەنيەتىن، ءسالت-داستۇرىن ساقتاپ، وركەندەتە الادى. قۇشاعى ىستىق، پەيىلى كەڭ قازاق ەلى ەشكىمدى كەۋدەسىنەن يتەرمەك ەمەس. سەبەبى، بۇل ءبىزدىڭ بابامىزدىڭ قانىمەن كەلە جاتقان ءىرى قاسيەت. سوندىقتان ءبىزدى مەكەن ەتىپ جاتقان باسقا ەتنوس وكىلدەرىنىڭ ءوسىپ، ءونىپ، كوكتەپ وتىرعان جەرىنە العىس ءبىلدىرۋى ورىندى.
العىس ايتۋ كۇنى جاقىنداپ كەلەدى. جىلى ءسوز، ءىلتيپات، ءتۇزۋ پەيىل ادام جانىن نۇرعا تولتىرادى، جاقسىلىقتارعا باستايدى. قازاق جەرىنە ءاردايىم ىستىق ىقىلاسىن بىلدىرۋدەن تارتىنبايتىن جانى ىزگى جانداردىڭ قاتارىندا الماتىلىق وتانداسىمىز، كۇرد دياسپوراسىنىڭ كورنەكتى وكىلى، مەسەنات، قوعام قايراتكەرى رافيك ياكۋبوگلى ميرزويەۆ تا بار. ول بىرنەشە ءتىلدى مەڭگەرگەن، سونىڭ ىشىندە قازاق تىلىنە دە جەتىك.
سونداي-اق، ول كوپمادەنيەتتى، كوپەتنوستى مەملەكەتىمىزدەگى كونفەسسياارالىق جانە ەتنوسارالىق كەلىسىمدى نىعايتۋ جولىندا ۇنەمى ازاماتتىق ۇستانىمىن ءبىلدىرىپ، مەگاپوليستە وتەتىن مادەني-رۋحاني كەشتەردىڭ، قايىرىمدىلىق ءىس-شارالاردىڭ بەلورتاسىنان تابىلىپ جۇرەدى.
تاقىرىپقا وراي
رافيك ميرزويەۆ، «قۇرمەت» وردەنىنىڭ يەگەرى، مەسەنات، قوعام قايراتكەرى:
مەن باقىتتىمىن!
قازاقستان حالقىنىڭ، قازاق اعايىنداردىڭ ورتاسىندا ءومىر ءسۇرىپ، وسى ەلدەن ءوز ورنىمدى تاپقانىما ريزامىن. ماعان عانا ەمەس، تالاي ەتنوسقا قۇتتى قونىس، جىلى ۇيا بولىپ وتىر. ءبارىمىز بەيبىت تاڭمەن تالاسا تۇرىپ، ءوز تىرلىگىمىزبەن الاڭسىز اينالىسىپ، كەشكە شاڭىراعىمىزعا امان-ەسەن ورالۋدىڭ ءوزى ءبىر باقىت. ال ەشكىممەن ارازداسپاي، جايلى، تولىققاندى ءومىر ءسۇرۋ – مىڭ باقىت. وسىناۋ تىنىش ءومىردىڭ ارقاسىندا قازاقستان ءوسۋ، وركەندەۋ جولىنان تايماق ەمەس.
ءبىزدىڭ قازاقستان حالقى اسسامبلەياسى ەلىمىزدە ورىن العان توتەنشە جاعدايلاردان ەشقاشان سىرت قالعان ەمەس. بارلىق ەتنوس بىرىگە كەتىپ، سۋعا كەتكەن ايماقتارداعى وتانداستىرىمىزعا ءۇي سالىپ بەرۋگە كومەكتەستى. وسىناۋ سىن ساعاتتاردا كوپبالالى وتباسىلاردىڭ، مۇمكىندىگى شەكتەۋلى جانداردىڭ، قارتتاردىڭ جانىنان تابىلا بىلدىك. ءبىزدىڭ بىرلىگىمىز، نيەتىمىز وسىنداي ساتتەردە كورىنەدى. ءبىز ءوزىمىز دە وسىلايشا كوپتىڭ العىسىن ارقالاپ ءجۇرمىز. العىس ايتۋ كۇن ءبىزدى بۇرىنعىدان دا جاقىنداستىرا تۇسەدى دەپ ويلايمىن.