ءتاتتى سۋسىندار قاتەرلى ىسىككە اكەلۋى مۇمكىن

ءتاتتى سۋسىنداردىڭ ولىمگە اكەلەتىن ءقاۋپى انىقتالدى.

ۆاشينگتون ۋنيۆەرسيتەتىنىڭ عالىمدارى 30 جىل بويى جۇرگىزگەن زەرتتەۋ ناتيجەسىندە ءتاتتى گازدالعان سۋسىنداردى تۇراقتى تۇتىنۋ اۋىز قۋىسى وبىرىنىڭ دامۋ ءقاۋپىن ەداۋىر ارتتىراتىنىن انىقتادى، دەپ حابارلايدى aqshamnews.kz.

زەرتتەۋ بارىسىندا 162 602 ايەلدىڭ دەرەكتەرى تالدانعان. ناتيجەلەرى JAMA Otolaryngology — Head & Neck Surgery جۋرنالىندا جاريالاندى.

كۇنىنە كەم دەگەندە ءبىر پورسيا ءتاتتى سۋسىن ىشەتىن ايەلدەردىڭ اۋىز قۋىسى وبىرىنا شالدىعۋ ءقاۋپى ايىنا ءبىر رەتتەن از ىشەتىندەرگە قاراعاندا 5 ەسەگە جۋىق جوعارى ەكەنى انىقتالدى. اسىرەسە، تەمەكى شەكپەيتىن جانە الكوگولدى از تۇتىناتىن ايەلدەر اراسىندا بۇل كورسەتكىش ءتىپتى 5،46 ەسەگە ارتقان.

زەرتتەۋ ناتيجەسىندە ءتاتتى سۋسىنداردىڭ اۋىز قۋىسىنىڭ ءارتۇرلى بولىكتەرىنە جاعىمسىز اسەر ەتەتىنى بەلگىلى بولدى. گازدالعان سۋسىنداردى ءجيى تۇتىناتىن ادامداردا ءتىل ىسىگى 4،5 ەسەگە، ال اۋىز قۋىسىنىڭ باسقا بولىكتەرىندە ىسىكتىڭ پايدا بولۋ ءقاۋپى 5،24 ەسەگە جوعارى.

عالىمدار بۇرىن اۋىز قۋىسى وبىرىنىڭ نەگىزگى سەبەپتەرى رەتىندە تەمەكى شەگۋ مەن الكوگولدى تۇتىنۋ قاراستىرىلعانىن، ءبىراق جاڭا دەرەكتەر ءتاتتى سۋسىنداردى شامادان تىس تۇتىنۋ دا ونكولوگيالىق اۋرۋلاردىڭ ءقاۋپىن ارتتىراتىنىن كورسەتكەنىن ايتادى.

ەندى زەرتتەۋشىلەر ونكولوگيالىق اۋرۋلاردىڭ دامۋىنا ءتۇرلى ديەتالىق ادەتتەردىڭ اسەرىن ناقتىلاۋ ءۇشىن اۋقىمدى زەرتتەۋلەر جۇرگىزۋ قاجەتتىگىن العا تارتىپ وتىر.