الماتىنىڭ جاڭا ەتج-دا قالا تۇرعىندارى ءۇشىن الەۋمەتتىك نىسانداردىڭ قادامدىق قولجەتىمدىلىگى قاراستىرىلعان
الماتى اكىمدىگى قالانىڭ 2040 جىلعا دەيىنگى باس جوسپارىنا سايكەس ازىرلەنگەن ەگجەي-تەگجەيلى جوسپارلاۋ جوبالارىن (ەتج) بەكىتتى. وزدەرىڭىزگە ءمالىم، باس جوسپاردا مەگاپوليستى دامىتۋدىڭ مونوسەنتريستىك مودەلىنەن پوليسەنترلىككە كوشۋ قاعيداسى كورسەتىلگەن، ياعني قالا «شىعىس قاقپاسى»، «تاريحي ورتالىق»، «سولتۇستىك»، «وڭتۇستىك-باتىس»، «باتىس» سىندى 5 قوعامدىق جانە ىسكەرلىك قىزمەت ورتالىعىنا بولىنەدى.
الماتىنىڭ دامۋىنىڭ نەگىزگى قاعيداسىنىڭ ءبىرى بالاباقشالارعا، مەكتەپتەرگە، مەديسينالىق مەكەمەلەرگە جانە ايالدامالارعا جاقىن ماڭداعى قولجەتىمدىلىك بولىپ تابىلادى.
الماتى قالالىق جوسپارلاۋ جانە ۋربانيستيكا باسقارماسىنىڭ حابارلاۋىنشا، مەگاپوليستە نۇكتەلى قۇرىلىس بولمايدى، بارلىق قايتا جاڭارتۋ جوباسى قاجەتتى ينجەنەرلىك، كوممەرسيالىق جانە الەۋمەتتىك ينفراقۇرىلىممەن قامتاماسىز ەتىلۋىن ەسكەرە وتىرىپ، كەشەندى تۇردە قارالادى.
ەتج بويىنشا 2040 جىلعا قاراي ءاربىر قالا تۇرعىنى ءۇشىن بالاباقشالار ۇيدەن ورتا ەسەپپەن 300 مەتر جەردە، مەكتەپتەن 500 مەتر قاشىقتىقتا، ال مەديسينالىق مەكەمەلەر تۇرعىلىقتى جەرىنەن ەڭ كوبى ءبىر شاقىرىم جەردە بولادى دەپ كوزدەلگەن.
مىسالى، تۇركسىب اۋدانىندا مەكتەپتەر مەن مەديسينالىق مەكەمەلەردىڭ سانى 1،5 ەسە، بالاباقشالار سانى 3 ەسە وسەدى. 7 دەنە شىنىقتىرۋ-ساۋىقتىرۋ كەشەنى سالىنادى.
ناۋرىزباي اۋدانىندا مەكتەپتەر سانى 2 ەسە بالاباقشالار سانى 10 ەسەگە ارتىپ كەلەدى. سونىمەن قاتار، 11 جاڭا مەديسينالىق مەكەمە، 8 دەنە شىنىقتىرۋ-ساۋىقتىرۋ كەشەنى، مۋزەي، ەكى جاڭا تەاتر مەن كىتاپحانا جوسپارلانعان.
ەتج-عا سايكەس، بوستاندىق اۋدانىندا 8 مەكتەپ، 5 بالاباقشا، 3 مەديسينالىق مەكەمە، 2 دەنە شىنىقتىرۋ-ساۋىقتىرۋ كەشەنى سىندى جاڭا الەۋمەتتىك ينفراقۇرىلىم قۇرۋ عانا ەمەس، سونىمەن قاتار، 4 كىتاپحانا، 1 مۋزەي، 1 تەاتر سىندى جاڭا مادەني نىساندار قۇرۋ دا كوزدەلگەن.
المالى اۋدانىندا جاڭا الەۋمەتتىك ينفراقۇرىلىم قۇرۋ نەگىزىنەن مەكتەپتەرگە باعىتتالعان – بۇل 8 نىسان جانە 10 بالاباقشا. مۋزەيدىڭ دە قۇرىلىسى جوسپارلانعان.
مەدەۋ اۋدانىنىڭ اۋماعىنداعى الەۋمەتتىك ينفراقۇرىلىم قازىرگى ولقىلىقتىڭ ورنىن تولتىرۋعا باعىتتالعان: بۇل 14 مەكتەپ، 16 بالاباقشا، 11 مەديسينالىق مەكەمە، 5 دەنە شىنىقتىرۋ-ساۋىقتىرۋ كەشەنى جانە كىتاپحانا.
جولاۋشىلار ينفراقۇرىلىمىن كەڭەيتۋ كوزدەلىپ وتىر، 2027 جىلعا قاراي – قازىرگى قولدانىستاعى 1208 ايالدامادان 1245 ايالداماعا دەيىن ارتىپ، ەڭ جاقىن ايالداما كەشەنىنە 5-7 مينۋت ىشىندە بارۋعا بولادى.
جالپى، ەتج تۇراقتى جانە فۋنكسيونالدى قالالىق كەڭىستىك قۇرۋعا باعىتتالعان. ول قالا قۇرىلىسىن ايماقتارعا ءبولۋدىڭ، قىزىل سىزىقتاردىڭ، حالىققا الەۋمەتتىك، مادەني جانە كوممۋنالدىق قىزمەت كورسەتۋ نىساندارىن ورنالاستىرۋ ءۇشىن اۋماقتاردى رەزەرۆتەۋدىڭ، كوشە-جول جەلىسىن ۇيىمداستىرۋدىڭ، ينجەنەرلىك كوممۋنيكاسيالاردى جۇرگىزۋدىڭ، اۋماقتاردى اباتتاندىرۋ مەن كوگالداندىرۋدىڭ نەگىزگى باعىتتارىن بەلگىلەيدى.