قازاقستاننىڭ تاشكەنتتەگى ەلشىلىگىنىڭ جانىنداعى رەفەرەندۋم ۋچاسكەسى جەرگىلىكتى ۋاقىت بويىنشا تاڭعى ساعات 07:00-دە ءوز جۇمىسىن باستادى، دەپ حابارلايدى aqshamnews.kz Kazinform اگەنتتىگىنە سىلتەمە جاساپ.
تاشكەنتتەگى № 399 رەفەرەندۋم ۋچاسكەسى شەتەلدەردەگى ەڭ ءىرى ۋچاسكەلەردىڭ ءبىرى بولىپ تابىلادى. بۇگىنگى تاڭدا بۇل ۋچاسكەدەگى سايلاۋشىلار تىزىمىنە وزبەكستاندا تۇراقتى تۇراتىن جانە ۋاقىتشا جۇرگەن 600 قازاقستاندىق ازامات ەنگىزىلگەن.
№ 399 ۋچاسكەنىڭ ءتوراعاسى جاسلان يسكاكوۆتىڭ ايتۋىنشا، مۇمكىندىگى شەكتەۋلى ازاماتتاردىڭ داۋىس بەرۋىن قامتاماسىز ەتۋ ءۇشىن ارنايى توپتار جاساقتالىپ، ۇيدە داۋىس بەرۋ جاشىكتەرىن جەتكىزۋ جۇمىستارى ۇيىمداستىرىلعان.
اتالعان ۋچاسكەدە وزبەكستاندا وقيتىن قازاقستاندىق ستۋدەنتتەر، ۋاقىتشا جۇمىس ىستەپ جۇرگەن نەمەسە تۇرىپ جاتقان وتانداستارىمىز، تۋريستەر مەن ءىسساپاردا جۇرگەن ازاماتتار داۋىس بەرەدى دەپ كۇتىلۋدە.
تاشكەنت قالاسىنداعى № 399 رەفەرەندۋم ۋچاسكەسى قازاقستان رەسپۋبليكاسىنىڭ ەلشىلىگى عيماراتىندا (اباي كوشەسى، 1) ورنالاسقان. داۋىس بەرۋ جەرگىلىكتى ۋاقىت بويىنشا 20:00-گە دەيىن جالعاسادى.