ەلىمىزدە اەس قۇرىلىسىنا قاتىستى رەفەرەندۋم ءوتىپ جاتىر

داۋىس بەرۋ كەشكى 20.00-گە دەيىن جالعاسادى.

aqshamnews.kz سايتى كۇنى بويى ءوز وقىرمانىن رەفەرەندۋمنىڭ بارىسىمەن حاباردار ەتەدى.

رەفەرەندۋم بيۋللەتەنىندە "ءسىز قازاقستاندا اتوم ەلەكتر ستانساسىنىڭ سالىنۋىمەن كەلىسەسىز بە؟" دەگەن سۇراق بار، ال سايلاۋشىلار "ءيا، كەلىسەمىن" نەمەسە "جوق، كەلىسپەيمىن" دەپ تاڭداۋ جاساي الادى. سايلاۋشى ءوز تاڭداۋىن بەلگىلەگەن جاۋاپ نۇسقاسىنىڭ جانىنداعى بوس شارشىعا كەز كەلگەن بەلگىنى قويۋ ارقىلى كورسەتەدى.

رەسمي اقپاراتقا سايكەس، 6 قازاندا ەلىمىزدەگى سايلاۋ ۋچاسكەلەرىنىڭ كوپشىلىگى ساعات 7:00-دە اشىلىپ، كەشكى ساعات 20:00-گە دەيىن جۇمىس ىستەيدى. داۋىس بەرۋ تىزىمىنە 12،3 ميلليونعا جۋىق قازاقستاندىق ەنگىزىلگەن.

رەفەرەندۋمعا 30 شەت مەملەكەت پەن ءتورت حالىقارالىق ۇيىمنان (تاۋەلسىز مەملەكەتتەر دوستاستىعى، شانحاي ىنتىماقتاستىق ۇيىمى، تۇركى مەملەكەتتەرى ۇيىمى، ازياداعى ءوزارا ءىس-قيمىل جانە سەنىم شارالارى جونىندەگى كەڭەس) 177 بايقاۋشى قاتىسادى. سونداي-اق، 14 مەملەكەتتىڭ سايلاۋ ورگاندارىنىڭ وكىلدەرى، ونىڭ ىشىندە ءازىربايجان، بەلارۋس، تاجىكستان جانە وزبەكستان ورتالىق سايلاۋ ورگاندارىنىڭ باسشىلارى داۋىس بەرۋ بارىسىن باقىلاپ وتىر.

قازاقستان رەسپۋبليكاسى سىرتقى ىستەر مينيسترلىگىنىڭ مالىمەتىنشە، 37 ەلدەن 200 شەتەلدىك جۋرناليست اككرەديتتەلىپ، رەفەرەندۋم بارىسىن باقىلاپ، اقپارات تاراتۋدا.

ەلىمىزدە بارلىعى 10 323 سايلاۋ ۋچاسكەسى جۇمىس ىستەۋدە، سونداي-اق، 59 ەلدە ورنالاسقان شەتەلدىك مەكەمەلەردە 74 سايلاۋ ۋچاسكەسى اشىلعان. رەفەرەندۋم ناتيجەلەرى داۋىس بەرۋ كۇنىنەن باستاپ جەتى كۇن ىشىندە بۇقارالىق اقپارات قۇرالدارىندا جاريالانادى.