الماتىدا «Tartyl Fest» تۋرنيكتەن تارتىلۋ رەسپۋبليكالىق فەستيۆالى ءوتىپ جاتىر. سپورتتىق ءىس-شاراعا الماتىلىق تۇرعىندار ۇلكەن ىنتامەن قاتىسىپ، العان اسەرىن بولىسۋدە.
الماتى قالاسىنىڭ تۇرعىنى، «Tartyl Fest»-كە قاتىسۋشى ماجىتباي مەيىرجان بىلاي دەدى:
«ءوزىم بۇرىننان Workout سپورتىنا قىزىعام. «دارا» قورىنىڭ ۇيىمداستىرۋىمەن وتكەن بۇل ءىس-شارانى الەۋمەتتىك جەلىلەردەن كورىپ، بىردەن قاتىسقىم كەلدى. بۇگىن ءوز كۇشىمدى سىناپ، جۇلدەلى ورىنداردىڭ بىرىنەن كورىنەمىن دەگەن ويدامىن. تورەشىلەردىڭ باقىلاۋىمەن 40 رەت تارتىلدىم.
ۇيىمداستىرۋ دەڭگەيى وتە جاقسى، مۇنداي شارانىڭ وتۋىنە سەبەپكەر بولعان بارلىق ادامدارعا العىس ايتقىم كەلەدى. «Tartyl Fest» سىندى بۇقارالىق سپورتتى دامىتاتىن ءىرى سپورتتىق مەرەكەلەر جاستار ءۇشىن كەرەك. Workout-تى ەل ىشىندە دامىتاتىن مۇنداي شارالار كوپ بولاتىن بولسا، ازاماتتارىمىز الەمدىك ارەنادا ۇلكەن جەتىستىكتەرگە جەتەتىنىنە سەنىمدىمىن».
الماتى قالاسىنىڭ تۇرعىنى، «Tartyl Fest»-كە قاتىسۋشى ادىلكەرەي قاسىم ۇلى دا ءوز اسەرى تۋرالى ويىن ورتاعا سالدى:
«فەستيۆال تۋرالى دوستارىمنان ەستىپ، بۇگىن قاتىسۋعا كەلدىم. «Tartyl Fest»-كە قاتىسۋعا ىشكى موتيۆاسيا مەن دامۋعا دەگەن تالپىنىس سەبەپ بولدى. شارانىڭ قالاي ۇلكەن اۋقىمدا ۇيىمداستىرىلعانى جانە بارلىق سايىستىڭ ەرەجەلەرگە ساي ءوتىپ جاتقانى ۇنادى. تۋرنيككە تارتىلعان كەزدە بارلىق قاتىسۋشىنى تورەشىلەر باقىلاپ، ناتيجەنى جازىپ الىپ وتىر.
اسكەردە 47 رەت تارتىلاتىنمىن. ءبىراق ءبىراز ۋاقىتتان بەرى سپورتپەن اينالىسپاي كەتكەندىكتەن بۇگىن 27 رەت تارتىلدىم. بۇل دا مەن ءۇشىن جاقسى ناتيجە. دەگەنمەن بۇگىن ءىس-شارا قايتادان سپورتپەن اينالىسۋعا ۇلكەن سەرپىلىس بەرمەك. الداعى ۋاقىتتا ءوز رەكوردىمدى جاڭارتامىن!»