جاستارمەن تاربيە جۇمىستارىن جانداندىرۋىمىز كەرەك
ءبىزدىڭ قازاقستانىمىزدا بولعان جانتۇرشىگەرلىك جاعداي ەلىمىزدىڭ ءاربىر ازاماتىنىڭ جانىنا باتىپ، قابىرعامىزدى قايىستىرىپ جاتىر. بولعان وقيعالار بىزگە اششى ساباق بولدى. ءيا، شىندىعىندا ءبىز «دەموكراتيا-دەموكراتيا» دەپ ۇرانداتقان جالعان پاتريوتتارعا، ارانداتۋشىلارعا سەنىپ قالدىق. بەيقامدىعىمىزدىڭ كەسىرىنەن ەلىمىزگە سودىرلار كەلىپ، ويران-توپانىمىزدى شىعاردى. قانشاما جاستارىمىز مەرت بولدى. مەنىڭ بولعان جاعدايعا جانىم اۋىرىپ، جۇرەگىم سىزدايدى. بالاسىنان ايىرىلىپ وتىرعان اتا-انالارعا، جارىنان، اكەسىنەن ايىرىلعان اعايىنعا قاتتى قينالىپ، كوڭىل ايتامىن. ەلىمىز ءۇشىن، ەلىمىزدىڭ تىنىشتىعى ءۇشىن جانىن قۇربان ەتكەن ەرلەرىمىزدىڭ جاندارى ءجانناتتا بولسىن!
بىزدەر، ارداگەرلەر، كەڭەس زامانى كەزىنەن ءارتۇرلى قيىندىقتاردى باسىمىزدان وتكەردىك. ءبىراق مۇنداي باسسىزدىققا حالقىمىز ەشقاشان بارماعان ەدى عوي.
ەلىمىزدە ورىن العان جاعدايلار ءال-فارابي بابامىزدىڭ «تاربيەسىز بەرىلگەن ءبىلىم - ادامزاتتىڭ قاس جاۋى» دەگەن ءتامسىلىنىڭ استارىن ۇعىندىرعانداي. وسى ورايدا ارداگەرلەرگە ايتارىم، جاستاردىڭ بويىنداعى پاتريوتتىق سەزىمدى وياتۋ ءۇشىن قيىندىقتى شىدامدىلىقپەن، سابىرلىقپەن جەڭۋ ءۇشىن ولارمەن تاربيە جۇمىسىن جانداندىرۋ كەرەك ەكەنىن باسا ايتقىم كەلەدى.
ءدال ءقازىر بىزگە، قازاق حالقىنا، تورتكە ءبولىنىپ، بەسكە جارىلماي، بىرىگەتىن ۋاقىت كەلدى. پرەزيدەنتىمىز قاسىم-جومارت كەمەل ۇلىنىڭ ۇندەۋىندەگى ءار ءسوزىن، شەشىمدەرىن قولداي وتىرىپ، ءبىز دە ءوز تاراپىمىزدان كومەگىمىزدى ايامايىق! ەلىمىزدىڭ كوركەيۋىنە ساتتىلىك تىلەيمىز!